Datu Nebukadnesar mangipi au karombelana
4
1 Idemi pepopaisa hangko i Datu Nebukadnesar au napahawe i tauna au ara i humalele ngamba, lembo hai hinangka basa i humalele kadatua Babeli:Roa ngkatuwo irikamu katetetambaia. 2 Ina mampololitana tanda au mewulii hai au melangaki au nababehimi Pue Ala au makuasa iriko.
3 Rumihi mpuu kamahilena tanda kuasa au Nababehi!
Maroho mpuu tanda metingkarai au Napopewali!
KadatuaNa iami kadatua au monono,
hai poparentaNa hawe i hae-haena.
4 Iko, Nebukadnesar, tinda lalungku maida i soungku, tuwongku i kadatuangku maroa hai meawa. 5 Agaiana tangangku leta, laembengi mangipi mbulina. Pangipi iti mopatingkara pekiringku hai hinangka au kuita i lalu pangipi iti mopamasusa lalungku. 6 Roo nodo, kukakiohe ope-ope tomapande i Babeli bona rauliangaana lempona pangipi iti. 7 Hangko indo, tomapande, topedodi hai au raisa mampeita betue, maihe iriko, hai kutuntuamohe pangipingku iti, agaiana bara rabuku mopahaweana lempona pangipi iti.
8 Kahopoana Danieli au rahanga wori Beltsasar moula hanga anitungku, mai iriko, ia nanini kuasa au malelaha, hai kutuntuami pangipingku:
9 “Ee Beltsasar, tadulako tomapande! Kuisa oio nanini mpuuko anitu au malelaha iti. Hinangka au tewuniangi bara nupomapari! Mewali, pehadingi kupololita irio apa au kuita i lalu pangipingku bona nuuliangaana lempona. 10 Tangangku leta, kuita i pangipingku, node: i tanga-tanga dunia tuwo hampoa kau au mapangka ntepuu. 11 Kau iti kahile-hilea hai karoho-rohoa, kapangkana hawe i langi, hai ope-ope tauna i dunia moita kau iti. 12 Marumba tawena, wuana ngkaia, kau iti mopaara paande i hinangka au tuwo. I woina meonga hinangka pupu tampo; tadasi i laerawa mohara i penga-pengana, hai hinangka au tuwo moande wuana.
13 I lalu pangipi iti, kuita hadua topekampai au malelaha, iami malaeka au mendaulu hangko i suruga. 14 Ia mololita maoni-oni, nauli node:
Tiwimide kau iti, hinangka daana nitata, ope-ope tawena nioru, hai wuana nihawu-hawu. Pogiangaa ope-ope pupu tampo melangka hangko i woina, hai hinangka tadasi au i penga-pengana membaro.
15 Agaiana palikangaamide patoana roo-roo i lalu tampo, tetaka rante besi hai tambaga. Pogiangaamide mawuru kana langalo au hangko i langi hai moande hehi hihimbela hai pinatuwo i dunia!
16 Palikangaamide tauna iti tebaliki pekirina mewali nodo pekiri binata. Ina nodo pewalina i lalu pitu parena.
17 Parenta au rapahawe ide, pobotusindami malaeka au malelaha. Tunggaiana bona ope-ope tauna moisa kaPue Alanami au makuasa i kadatua manusia. Kadatua iti Nawei i hema-hema pea au Napilei, nauri tauna iti tepaiwoi tuwona.
18 Itimi au kuita i lalu pangipingku. Mewali Beltsasar, ide-ide nuuliangaana lempona, lawi ope-ope tomapande i kadatuangku ide, bara huba hadua au nabuku mouliangaana lempona. Oio pea au mobuku, lawi naniniko kuasa malelaha au kupenombai.”
Danieli mopahowa lempona pangipi
19 Roo indo, Danieli au rahanga wori Beltsasar, tingkara hai marinti lindona, mapari pekirina. Mololitami datu, nauli, “Beltsasar, inee pangipi hai lempona iti mopamasusako!”
Mehana Beltsasar, nauli, “Ampuku, aginami pangipi ide morumpahe ope-ope iwalina ampuku! 20 Kau au naita ampuku iti, mahile hai maroho. Kapangkana hawe i langi, hai raita ope-ope tauna i humalele dunia. 21 Marumba tawena, wuana ngkaia, kau iti mopaara paande i hinangka au tuwo. I woina meonga hinangka pupu tampo, hai tadasi i laerawa mohara i penga-pengana.
22 O datu, kau iti iami ampuku. Kadatuamu mahile hai maroho; kamakuasamu hawe i langi hai i wuntu dunia!
23 Topekampai au naita ampuku iti iami hadua malaeka au malelaha au mendaulu mai hangko i langi hai mololita, nauli, ‘Tiwi peamide kau ide, hai niboho-boho, agaiana patoana palikangaamide roo-roo i lalu tampo, tetaka rante besi hai tambaga. Pogiangaamide mawuru kana langalo au hangko i langi hai moande hehi hihimbela hai pinatuwo i pada. Itimi au ina mewali i lalu pitu parena kamahaena.’ 24 O datu, idemi lempona hai idemi popakanotona Pue Ala au makuasa kana i ampuku datu: 25 ampuku datu ina rawura hangko i olo tauna hai ina maida i olonda pupu tampo i pada. Ampuku ina mangkuku nodo japi hai naturu langalo hangko i langi alana mawuru. Iti ina mewali i lalu pitu parena kamahaena duuna ampuku mopangaku kaPue Alana pea au makuasa i kadatua manusia hai mowei kadatua iti i tauna au Napilei. 26 Au nauli malaeka iti: palikangaa patoa kau iti roo-roo i lalu tampo, lempona ampuku ina moparenta hule i kadatuana, ane ampuku mopangaku kaPue Alanami au makuasa i humalele dunia. 27 Mewali kuperapi i ampuku datu, hangangaa nupeulai paturongku: nukabahami mobabehi dosa, nubabehimi au maroa hai manoto, hai tauna au meahi-ahi nupokaahihe. Ane iti nababehi ampuku, ampuku ina molambi roa ngkatuwo.”
28 Hinangkana iti mewali i watana Datu Nebukadnesar. 29 Liumi hampulo hai rombula, i tempona molulumao i wongko sou kadatua Babeli,a 30 mololitami, nauli, “Peita peraena wanua Babeli. Ikomi au moaro wanua iti bona mewali pohudaa kadatuangku au mopatongawa kuasangku hai kamarohongku, peawangku hai kamahilengku.” 31 Bara mani hopo lolitana datu, nahadimi hambua wotu hangko i langi au manguli, “Datu Nebukadnesar, rapatongawaamoko katelimbanami kadatuamu hangko irio. 32 Ina rawuragako hangko i olo tauna hai ina maidako hihimbela hai binata i pada. Ina moandeko hehi nodo japi. Itimi au ina mewali irio i lalu pitu parena, duuna nupangaku kaPue Alana pea au makuasa i kadatua manusia hai au mowei kadatua iti i tauna au Napilei.” 33 I tempo iti peawomi, lolita iti mewali i Datu Nebukadnesar. Ia rawura hangko i olo tauna, hai mangkuku nodo japi. Watana mawuru naturu langalo hangko i langi. Weluana mewali mandoe nodo wulu tadasi ngkaia, hai kanuna nodo kanu tadasi.
34 Liumi pitu parena, iami tempo au rapakanotomi, iko, Nebukadnesar, mengoana i langi, hai pekiringku mesule hule mewali pekiri tauna. Roo indo, kutoiami Pue Ala au makuasa. Kupomahile hai kupolinga, lawi kamakuasaNa monono hai kadatuaNa bara mokahopoa. 35 Ope-ope tauna i dunia bara mobundu i peitaNa. Malaeka i langi hai tauna i dunia Nakuasaihe moula peundeaNa. Bara ara au nabuku moae hawaNa hai mekune Iria, nauli, “Apa au Nubabehi?” 36 I tempona pekiringku manoto hule, kamahile hai kameawa au mopatolele kadatuangku mesule mbuli iriko. Laona radupa ope-ope topobagongku hai ope-ope au mapangka lantinda i kadatuangku. Rapopohuda mbulimona i kadatuangku, hai anti kamaahina Pue Ala, peawa au mahile hangko i nguruna, Naweina.
37 Mewali ide-ide, iko, Nebukadnesar, kutoia, kupomahile hai kupolingami Pue Ala, Datu Suruga. Hinangka bagoNa hai raraNa, tou hai manoto. Nabuku mopaiwoi tauna au mampemahile.