23
Kemaj on rey otlanauatij ma kintekuitlanikan nochimej on uejueyixtokej tlayekankej ne Judá niman ne Jerusalén, para ma nosentlalikan iuan yejua. 2 Iuan on rey yayaj ipan iueyitiopan toTEKO nochimej on chanejkej ne Judá, on chanejkej ne Jerusalén, on tiopixkej, on tiotlajtojkej niman nochi on nación, desde yejuan más konetl hasta yejuan más ueuentsin. Ompa on rey okinomachtij chikauak on tlen tlajkuilolnestikaj ipan on amamoxtli* de on pacto* yejuan okinextijkej ipan iueyitiopan toTEKO. 3 Kemaj on rey onotelkets itech on pilar, niman okiprometeroj ixpan toTEKO ika kitlakamatis, ika nouikas ikan nochi iyojlo ipan itlanauatiluan, niman ileyes, niman kichiuas on tlen kijtoua on pacto* yejuan tlajkuilolnestokej ipan on amamoxtli*. Niman nochimej on tlakamej no okiprometerojkej kichiuaskej.Josías okuektlalij miyek tlajtlamach* ipan on país
4 Kemaj on rey okinauatij Hilcías, on ueyi tlayekanki tiopixki, niman on oksekimej uejueyitiopixkej niman on tlajpixkej ipan ikalakiyan on ueyitiopan, para ma kixtikan ipan iueyitiopan toTEKO nochi on tlajtlamach* yejuan ika kimauistiliaj Baal, Asera, niman nochimej on sitlalimej yejuan onokej ipan cielo. Niman okinauatij ma kintlati ikiauak Jerusalén, ipan on ixtlauatl de Cedrón, niman kemaj okiktik on tlikonextli ne Betel. 5 No okinkuilij intekiu on tiopixkej yejuan on reyes de Judá okintlalijkaj para ma kitlatikan kopajli ipan on tiopanmej pipitikej kampa kinmauistiliayaj idolos ikuapan tepetsitsimej, yejuan onkatkaj ipan on uejueyikalpanmej de Judá niman nijnisiu iyeuelkan Jerusalén. Okinkixtij on tiopixkej yejuan kitlatiayaj kopajli para Baal, on tonaltsintli, on metstli niman para nochimej on sitlalimej yejuan onokej ipan cielo. 6 Okixtij uejka de Jerusalén on kojtli* yejuan kipiyaya on ixneskayo on diosa Asera yejuan onkatka ipan iueyitiopan toTEKO, okitlatij ipan on ixtlauatl Cedrón hasta kualtsin okuejkuechtilij, niman kemaj, okichajchayau ipan nochimej on tlalkontin yejuan onkatkaj ipan on mikiloyan. 7 Niman no okinxoxotonij on kaltin yejuan tlakauiltin katkaj para on tlakamej ompa auilnemiyaj sano inuan tlakamej yejuan ikon kinmauistiliayaj imindioses, niman kampa on siuamej kinmachijchiuayaj niman kintlajmachyotiayaj itlakeuan uejueyakej on diosa Asera.
8 Sakin otlanauatij ma uajlakan Jerusalén nochimej itiopixkauan toTEKO yejuan chantiyaj ipan on uejueyikalpanmej de Judá. Niman okinxoxotonij nochimej tiopanmej pipitikej kampa kinmauistiliayaj ídolos niman kampa kitlatiayaj kopajli ne ikuapan tepetsitsimej, desde Geba hasta Beerseba. Niman no okinxoxotonij on tlaixpanmej kampa on tlakamej kinmauistiliayaj ídolos yejuan onkatkaj itech on tsakuijlotl yejuan Josué, on gobernador ipan on ueyikalpan, okichijchijka. Intlaixpanuan onkatkaj iopochmakopa ikalakiya on ueyikalpan. 9 On tiopixkej yejuan tlauentlaliayaj ipan on tiopanmej pipitikej kampa nemiyaj on ídolos ne imkuapan tepetsitsimej, xkinkauiliayaj tekitiskej ipan itlaixpan toTEKO ne Jerusalén. Pero ueliyaj kikuayaj pan, yejuan xkipiya tlaxokolilistli*, iminuan on tiopixkej yejuan tekitiyaj ipan on ueyitiopan ne Jerusalén.
10 Josías no okixoxotonij on tlaixpan yejuan onkatka ipan on ixtlauatl de Ben-hinom, para maka yakaj ma kitlati ikoneu tlakatl, noso siuatl ken uentli para Moloc. 11 Okinkixtij iminnixneskayouan on caballos yejuan on reyes de Judá okinyaxkatikaj tonaltsintli. Yejuamej onkatkaj ipan ikalakiyan iueyitiopan toTEKO, itech on kalijtik kampa kochi Natán-melec, on yejuan ompa tlajpixki. Niman no okintlatij on carretas de guerra yejuan okimaktilijkej on tonaltsintli. 12 Niman okinxoxotonij on tlaixpanmej yejuan on reyes de Judá okinchijchijkaj ne ipan itecho on palacio tlapani de ikalijtik Acaz. Niman no okinxoxotonij on tlaixpanmej yejuan Manasés okinchijchijka ipan on ome tiopankiauak de on iueyitiopan toTEKO. Okinkuejkuechtilij, niman kemaj okixinitoj ipan on ixtlauatl de Cedrón.
13 On rey Josías no okinxoxotonij on tiopanmej pipitikej kampa kinmauistiliayaj on ídolos yejuan onkatkaj kampaka ikisayan tonaltsintli de on ueyikalpan Jerusalén, niman tlatsintlankopa de on tepetl itoka Olivos. On tiopanmej okinchijchijka on rey Salomón, para ompa okitlalijkej on sanoyej xkuajli ídolo Astarté, iminídolo on sidonios; para on sanoyej xkuajli ídolo Quemos, iminídolo on moabitas; niman on sanoyej xkuajli ídolo Milcon, iminídolo on amonitas. 14 No okinkuejkuechtilij on temej yejuan kinmauistiliyaj, niman okintsontekej on kojtin* yejuan kipiyayaj ixneskayouan on diosa Asera, niman okinxinito inmikaomiyouan on tlakamej ipan on tlajli kampa onkatkaj on ídolos. 15 Josías okinxoxotonij on tiopamej pipitikej kampa kinmauistiliayaj ídolos ne Betel yejuan okichijchika on Jeroboam I, ikoneu Nabat, ijkuak okichiu para ma tlajtlakokan on israelitas. Niman yejua okixoxotonij on tlaixpan* niman okinkuejkuechtilij on temej. Niman no, okitlatij on kojtli* kampa nestikaj ixneskayo on diosa Asera.
16 Ijkuak Josías onokuep niman okintak on tlalkontin yejuan onkatkaj ipan on tepetl, otlanauatij ma kinkixtikan on omimej yejuan ompa onkatkaj, niman okintlatij ipan on tlaixpan*, para okijtlakoj ixpan Dios. Ijki onocumpliroj itlajtol toTEKO yejuan ye uejkaui okitemachistij intechkopa on tiotlajtojkej yejuan ijkin okiteijlijkaj. 17 Kemaj otetlajtoltij:
—¿Akinon iyaxka* on tetl yejuan nikita kampa nestikaj itoka on mikatsintli?
On chanejkej ipan on ueyikalpan okinankilijkej:
—Ueyixtikaj rey, on itlalkon on tiotlajtojketl yejuan oualeu Judá niman okijtoj on tiotlajtojli ijkon ken otikchiu ika on tlaixpan* de Betel.
18 Kemaj Josías otlanauatij:
—Ijki xkauakan on tlalkontli. Maka yakaj ma kintelo iomiyouan.
Ijki okitlakaitakej iomiyouan niman iomiyouan on okse tiotlajtojketl yejuan oualeu Samaria.
19 Niman Josías okinxoxotonij nochimej on tiopanmej pipitikej kampa kinmauistiliayaj ídolos ikuapan on tepetsitsimej, yejuan onkatkaj Samaria, yejuan okinchijchijkaj on reyes de Israel niman ijki okualanijkej toTEKO. Josías ijki okinxoxotonij nochiuiyan ipan Samaria ken okichiu ne Betel. 20 No ijki okinmiktij on intiopixkauan on ídolos impan imintlaixpan* kampa kintekipanouayaj. Niman impan nochimej on tlaixpanmej* okintlatij on inomiyouan on tlakamej. Kemaj onokuep Jerusalén.
Josías kichiua on iluitl Pascua
21 On rey Josías okinnauatij nochimej ma kichiuakan on iluitl Pascua para tlakaitalistli de iminTEKO Dios, ijkon ken tlajkuilolnestikaj ipan on amamoxtli* de on pacto*. 22 Xkaman onochijka on iluitl Pascua ken in, desde ijkuak on jueces tlayekanayaj ipan Israel, nion ipan on tonaltin ijkuak ireyes Israel niman Judá tlamanarouayaj. 23 Pero ijkuak on rey Josías otlamandaroj 18 xipan, on iluitl Pascua onochiu para okitlakaitakej toTEKO ne Jerusalén.
Josías okichiu ikan nochi iyojlo tlen kipaktia Dios
24 Josías no okinkixtij nochimej on yejuan tenaualuiyayaj niman tetlatejtemouiliayaj, niman on ídolos yejuan onkaj impan iminchan on tlakamej, niman nochi on tlajtlamach* tlen sanoyej tetlajyeloj* yejuan kitekitiltiayaj ijkuak kinmauistiliayaj iminídolos yejuan onkatkaj ne Judá niman Jerusalén. Okichiu kanika para okintlakamat nochi on leyes yejuan onkaj ipan on amamoxtli* yejuan on tiopixki Hilcías okinnextij ipan iueyitiopan toTEKO. 25 Xkaman onen sen rey, nion achtoj, nion sakin* de yejua, yejuan onokuep itechika toTEKO ikan nochi iyojlo, ikan nochi ialma niman ika nochi ichikaualis, okintlakamat on leyes yejuan Moisés otemakak.
26 Pero toTEKO sanken* kualantikatka itechkopa Judá ipampa nochi on tlajtlakoltin yejuan Manasés okichiu. 27 Yejua ika, toTEKO okijtoj ika kitlalkauis Judá ken okitlalkauij Israel, niman ika kichichiuas on ueyikalpan Jerusalén yejuan okitlapejpenijka, niman on ueyitiopan kampa okijtojka chantiskia.
28 Nochi on tlajtlamach* yejuan okichiu Josías tlajkuilolnestikaj ipan on amamoxtli* kampa tlajkuilolnestikaj iminnemilis on reyes de Judá.
Josías omik
29 Ipan on tonaltin, on rey Necao, rey de Egipto, oyaj itech on río Éufrates para kipaleuis on rey de Asia. On rey Josías oyaj para okixnamikito, pero ne Meguido, ijkuak Necao okitak, okimiktij. 30 Iuejueyitekitkauan okitlalijkej imikatlakayo ipan sen carreta de guerra niman oonejkej desde Meguido para okuikakej Jerusalén, kampa okitôkakej ipan itlalkon. Kemaj on tlakamej okitlapejpenijkej Joacaz, ikoneu Josías, para tlamandaros, niman okuatêkijkej ikan aceite ken rey yejuan okipatlak itataj.
Joacaz otlamandaroj ne Judá
31 Joacaz kipiyaya 23 xipan ijkuak opeu tlamandaroua, niman otlamandaroj yeyi metstli ne Jerusalén. Inanaj itoka katka Hamutal, ichpoch Jeremías, niman ualeuaya on ueyikalpan Libna. 32 Pero okichiu tlen xkuajli ixpan toTEKO, no ijki ken iachtojtajuan. 33 On rey Necao okajsik, niman okitsaku ne Riblá, ipan on iueyitlalpan Hamat, para maka tlamandaros ne Jerusalén. Niman otechiualtij ipan on país ma kitlaxtlauakan impuestos de 3 mil 300 kilos de plata niman 33 kilos de oro cada xipan. 34 Niman no, on rey Necao okiteneu Eliaquim, ikoneu Josías, rey de Judá yejuan okipatlak itataj. Niman okipatilij itoka. Okitokayotij Joacim. Niman Joacaz okuikak Egipto kampa omik.
35 Joacim okimakak Necao on plata niman oro yejuan okitlajtlanilij, pero yejua yej okichiu para on chanejkej ipan on país ma yejuamej kitlaxtlauakan impuestos. Cada se okitemakak on plata niman oro ijkon kenon rey Joacim okixtlaloj kech uelis kitemakas. Ijkon tej, okimakak on rey Necao.
Joacim otlamandaroj ne Judá