Josías okichiu on iluitl Pascua
(2 R 23.21-33)
35
Josías okichiu ne Jerusalén on iluitl Pascua para itlakaitalis toTEKO: ipan on tonajli majtlaktli uan naui de on achtoj metstli ipan on xipan, okimiktijkej on borreguito para on iluitl Pascua. 2 On tiopixkej okinxexeloj cada se okau ipan itekiu, niman okinyoleu para ma kichiuakan kuajli on tekitl ipan iueyitiopan toTEKO. 3 Niman no, on levitas, yejuan temachtiayaj ipan nochi Israel niman ika tlakauiltin katkaj itech toTEKO, okinmakak in tlanauatiltin: “Xtlalikan on yekcaja tlatiochijtli ipan on ueyitiopan yejuan okichijchiu Salomón, ikoneu David niman rey de Israel. Xok nonekis nenkiktiskej nemokechpan. Aman sa ika xmokauakan xtekipanokan nemoTEKO Dios, niman Israel, on itlapejpeniluan toTEKO. 4 Xmoxexelokan ikan familias niman kamanon nemopatlatiaskej ipan nemotekiu, ijkon ken okitlajkuiloltlalij David rey de Israel, niman Salomón ikoneu. 5 Nemejuamej levitas xmokauakan ipan on yektiopan ikan grupos sano ijki ken noxexeloskej ikan grupos on familias, para uelis nenkimpaleuiskej nochimej on nemokniuan israelitas yejuan tekoneuan intech on israelitas. 6 Xmiktikan on borreguito de on iluitl Pascua. Xmochipauakan ixpan Dios, niman xpiyakan nochi tlen nonekis para ijki nemokniuan uelis kichiuaskej nochi on tlen toTEKO otlanauatij itechkopa Moisés.”7 Kemaj, Josías okinman yejua iyolkauan, para okinmakak nochimej on tlakamej yejuan ompa nemiyaj para okichijkej on iluitl Pascua. Okinmakak borreguitos, niman chivitos, de nochimej katkaj 30 mil. Niman no okintemakak 3 mil uakaxtin yejuan okintomajkej. 8 Niman itlapeliuikauan on rey no okinekkej okintlatlayokolijkej on tlakamej, on tiopixkej niman on levitas. Niman Hilcías, Zacarías nima Jehíel, yejuan tekitij ipan iueyitiopan Dios, okinmakakej on tiopixkej 2 mil 600 yolkej para kichiuaskej on iluitl Pascua, niman 300 uakaxtin yejuan okintomajkej. 9 Conaías iuan on ome ikniu Semanías niman Natanel, niman on oksekimej levitas tlayekankej Hasabaías, Jehiel niman Josabad, okitemakakej 5 mil yolkej niman 500 uakaxtin yejuan okintomajkej para okichijkej on iluitl Pascua.
10 Ijkuak ye nochi kipiyayaj para on iluitl Pascua, on tiopixkej oyajkej kampa noneki nemiskej niman on levitas onoxexelojkej para nopatlatiaskej, ijkon ken otlanauatij on rey. 11 Kemaj, on levitas okinmiktijkej on yolkej para on iluitl Pascua, niman on yestli kinmakatiayaj on tiopixkej. Kemaj, on tiopixkej kajuichiayaj on tlaixpan ika on yestli chika on levitas kinxipeuayaj on yolkej. 12 Kemaj okixtilijkej on chauak yejuan noneki kitlatiskej, ijkon kech nemiyaj on familias ikan grupos yejuan ompa nemiyaj, para okiuentlalilijkej toTEKO, ijki ken nestikaj ipan on amamoxtli de Moisés. No ijki okichijkej inuan on uakaxtin yejuan okintomajkej. 13 Kemaj on levitas okitliuatskej innakayo on yolkej para on iluitl Pascua, ijki ken tlajkuilolnestikaj, niman on okseki uentin tlatiochijtin okikxitijkej ipan kontin, calderos niman sartenes, niman amanaman okinxexelouilijkej nochimej on tlakamej para ouel okikuajkej. 14 Kemaj on levitas okuektlalijkej on tlen kintocarouaya kiseliskej yejuamej niman on tiopixkej, pampa on tiopixkej, iuejkakoneuan Aarón, sanoyej okipixkej tekitl desde saniman kualkan hasta tlayoua kiuentlalijtikatkaj on uentli yejuan nochi tlatla niman on chauak. Yejua ika, on levitas okuektlalijkej on tlen yejuamej kintocarouaya kiseliskej niman on tiopixkej, iuejkakoneuan Aarón.
15 Niman on yejuan nokuikatiayaj, iuejkakoneuan Asaf, no nemiyaj kampa okintocaroj ken otlanauatijkej David, Asaf, Hemán niman Jedutún on tlachixkej yejuan tekitiyaj itech on rey. On tlajpixkej ipan tsakuijlomej nemiyaj itech on tsakuijlotl yejuan okintocaroj. Nion se de yejuamej xokinek okitlalkauij itekiu, pampa on incompañeros levitas yejuan iuan yayaj, okinkuektlalilijkej on uentli yejuan kintocarouaya kikuaskej.
16 Ijkon onochiu nochi itekiu toTEKO on tonajli para onochiu on iluitl Pascua. Okitemakakej nochi on uentin yejuan tlatla ipan itlaixpan toTEKO, ijkon ken otlanauatijka on rey Josías. 17 Nochimej on israelitas yejuan ompa nemiyaj Jerusalén okichijkej on iluitl Pascua, niman no okichijkej on okse iluitl okse chikome tonajli ijkuak kikuaj pan yejuan xkipiya tlaxolilistli. 18 Ne Israel xkaman okichijkaj on iluitl Pascua ken in desde ijkuak nemiya Samuel. Nion se de on reyes de Israel okichiu on iluitl Pascua ken okichiu Josías iuan on tiopixkej niman levitas niman on chanejkej ne Judá niman de Israel yejuan ompa nemiyaj, niman iminuan on chanejkej Jerusalén. 19 On iluitl Pascua onochiu ijkuak Josías kipiyaya majtlaktli uan chikueyi xipan ika tlamandarouaya ken rey.
Josías omik
(2 R 23.28-30)
20 Más sakin, ijkuak Josías yotlanka kuektlalia on ueyitiopan, Necao, rey de Egipto, oyaj kampaka onkaj on río Éufrates para tlauijsokis ne Carquemis. Josías iuan isoldados okixnamikitoj. 21 Pero Necao okintitlanilij temachistijkej para ma kijlitij: “Xnechkaua kuajlotika, rey de Judá. Aman xniuajlau para nimitsuijsokis tejua, yej oniuajlaj onikuijsokiko on nación yejuan iuan ninemi ipan nouijsokilistli. Dios yonechnauatij ma nikchiua niman. Ijkon tej, para maka itlaj mopan nochiuas, maka xkixnamiki Dios, yejuan nemi nouan, niman ijki xmitsmiktis.”
22 Pero Josías xokinek okak on tlen kijliayaj Necao yejuan Dios melauak okuajtitlan. Yej okijtoj yas konuijsokis. Ijkon tej, Josías oyaj okuijsokito Necao ipan on ixtlauatl Meguido. 23 Niman on yejuan tlamotlayaj ikan tlaminajli okimotlakej on rey Josías. Kemaj on rey okinnauatij itlapeliuikauan: “¡Xnechkixtikan de nikan, pampa sanoyej nitlakokojli!” 24 Itlapeliuikauan okixtijkej ipan on carreta de guerra, okitlejkoltijkej ipan okse carreta yejuan ika ome kipiyaya, niman okuikakej Jerusalén, kampa omik. Okitôkakej ne kampa okintôkakej iachtojtajuan. Nochi Judá niman Jerusalén ochokak ipampa imikilis Josías. 25 Jeremías okinmijkuiloj kuikamej de ajmantli para okimakak tlakaitalistli Josías. Hasta aman in tonajli, nochimej on yejuan nokuikatiaj, tlakamej niman siuamej, kelnamikij Josías ika on kuikamej de ajmantli. In kuikamej nochipa kinnokuikatiaj ne Israel niman tlajkuilolnestokej ipan on amamoxtli kampa tlajkuilolnestokej kuikamej de ajmantli.