Josías otlamandaroj Judá
34
Josías kipiyaya chikueyi xipan ijkuak okalak rey, niman otlamandaroj Jerusalén 31 xipan. 2 Josías okichiu tlen kuajli ixpan toTEKO, niman onouikak ken David iachtojtataj. Yejua nion achijtsin xokitlalkauij.3 Ijkuak ye kuikaya chikueyi xipan ika tlamandarouaya, maski semi telpokakonetl katka, Josías opeu kitejtemoua iDios David, iachtojtataj. Niman ipan on majtlaktli uan ome xipan opeu kichipaua Judá niman Jerusalén; okinmejkuanij on pipitikej tiopanmej, ixneskayouan on diosa Asera niman on ídolos yejuan okinxinkej niman ídolos yejuan okinchijchijkej ikan atki tepostli. on ixneskayomej de tepostli yejuan okipatlakej. 4 Niman okinxoxotonijkej on ixneskayomej de on baales niman imintlaixpanuan kampa kitlatiayaj kopajli. No okinkuejkuechtilij ixneskayouan on diosa Asera, on ídolos, niman on ixneskayomej de tepostli yejuan okipatlakej. Kemaj, okixinitoj ipan intlalkon on yejuan kinmakayaj on uentli. 5 Niman no okintlatij inomiyouan on intiopixkauan on ídolos ipan imintlaixpanuan kampa tlamauistiliayaj. Ijkon okichipau Juda niman Jerusalén. 6 Sano ijki okichiu ipan on uejueyikalpanmej yejuan onkaj ipan on ueyitlalpanmej de Manasés, Efraín, Simeón niman hasta Neftalí, niman ipan on kalpanmej yejuan onkatkaj inyeualkan. 7 Ipan nochi on región de Israel, okinxoxotonij on tlaixpanmej, on ídolos niman on ixneskayouan on diosa Asera yejuan onokau ken tlalteutli. Niman no okinxoxotonij on tlaixpanmej kampa kitlatiayaj kopajli. Kemaj oyaj para Jerusalén.
8 Ijkuak ye kuikaya majtlaktli uan chikueyi xipan ika tlamandarouaya, sakin ijkuak yokichipau on país niman on ueyitiopan, ijkuak yotlan kixtia on mauistilistli de ídolos, Josías okititlan yeyi tlakatl para ma kuektlalikan iueyitiopan toTEKO Dios: Safán ikoneu Asalías, niman Maseías, on tlapaleuijketl ipan on ueyikalpan iuan on tlajkuilojketl Joa ikoneu Joacaz. 9 Yejuamej okitatoj on más ueyitlayekanki tiopixki Hilcías niman okimakakej on tomin yejuan okuitoj ipan iueyitiopan toTEKO yejuan on levitas tsakuijlotlajpixkej okiselijkej. Yejuamej okiselijkej de inchanejkauan Manasés, de Efraín, niman de on oksekimej yejuan onokajkej imanian iueyitlalpan Israel, de nochi Judá niman Benjamín niman de ichanejkauan Jerusalén. 10 Kemaj on tomin okinmakakej on yejuan kiyekanayaj on tekitl ipan on ueyitiopan. Niman on tlayekankej okinmakakej on tekitkej yejuan kuektlaliayaj on iueyitiopan toTEKO. 11 No okinminmakakej tomin on kojxinkej, on tepanchijkej para ma kouakan temej de cantera, kojtin para kuamantin niman kojtin para kintemaskej ken vigas. Nochi in okitekitiltijkej para okuektlalikej on kaltin yejuan on reyes de Judá okauilijkej ma xixinikan.
12-13 In tlakamej sanoyej kuajli kichiuayaj intekiu. On yejuan tlayekanayaj katkaj on levitas Jahat, niman Abdías yejuan iuejkakoneuan Merari, niman Zacarías, niman Mesulam. Nochimej in katkaj iuejkakoneuan Coat. Yejuamej no kinyekanayaj on tlasakakej niman kinyekanayaj on yejuan kichiuayaj on tekitl. Nochimej on levitas tlatsotsonkej katkaj, sekimej amamoxtlajkuilojkej katkaj, sekimej tekiuajtiyaj niman sekimej tsakuijlotlajpixkej katkaj.
Hilcías okinextij on amamoxtli de on ley
14 Ijkuak konkixtiayaj on tomin ipan on kaltlayejyeualoyan yejuan kitemakayaj ipan itiopan toTEKO, on tiopixki Hilcías okinextij on amamoxtli de iley toTEKO yejuan okitemakaka Moisés. 15 Hilcías okijlij on tlajkuilojketl Safán: " Oniknextij on amamoxtli de on ley ipan iueyitiopan toTEKO. Kemaj okimakak Safán, 16 niman Safán okiktilij on rey. Niman okijlij:
—Motekitkauan, tejua ueyixtikaj rey, kichijtokej nochi tlen otikinnauatij ma kichiuakan. 17 Yokisentlalijkej on tomin yejuan onkatka ipan iueyitiopan toTEKO niman okinmakakej on yejuan kiyekanaj on tekitl niman on tekitkej.
18 Kemaj Safán okitlajtlajtouilij on rey ika on tiopixki Hilcías okimakak sen amamoxtli. Kemaj Safán okinomachtij ixpan on rey. 19 Ijkuak on rey okak on tlen kijtouaya on ley, okitsayantiaj itlaken pampa sanoyej onajman. 20 Kemaj nimantsin okinauatij Hilcías, Ahicam ikoneu Safán, Abdón ikoneu Micaías, Safán on tlajkuilojketl niman Asaías iueyitlayekankau on rey: 21
—Xuiyan xtlajtoltitij toTEKO nopampa niman impampa on chanejkej de Israel niman de Judá, de on tlen kijtoua in amamoxtli yejuan okinextijkej. Manin toTEKO sanoyej kualani touan pampa toachtojtajuan xokitlakamatkej itlajtoltsin toTEKO, nion xokichijkej ken tlajkuilolnestikaj ipan in amamoxtli.
22 Hilcías niman on yejuan okinteneu on rey oyajkej okitlajtoltitoj on siuatiotlajtojketl itoka Hulda. Yejua katka isiuau Salum ikoneu Ticva niman ixuiu Harhás, yejuan cuidarouaya on tlakentin de on ueyitiopan. In siuatl chantiya ipan on ika ome colonia ne Jerusalén. Niman ijkuak okinotskej 23 yejua okiminankilij:
—Ijkin kijtoua toTEKO, Dios de Israel: "Xkijlikan on yejuan omechajtitlan para xnechtlajtoltikij 24 ika nejua, nemoTEKO nemechmachistia: nikuajtitlanis itlaj sanoyej temojtij nikan, niman ipan in chanejkej nejua nikchiuas para impan ma uetsi nochi on tlaueliltin yejuan tlajkuilolnestikaj ipan in amamoxtli yejuan okinomachtijkej ixpan on rey de Judá. 25 Pampa onechtlalkauijkej niman okitlatijkej kopajli inmixpan oksekimej dioses, sanoyej onechkualanijkej ika on tlen okichijkej. Yejua ika, notlauel uetsis nikan kampa chantij niman xkaman seuis. 26 Niman on rey de Judá, yejuan otlatitlan para ma nechtlajtoltikij nejua nemoTEKO Dios de Israel, no ijkin kijtoua: pampa otikmojkakak on tlen otikak, 27 niman pampa otimoyolkokoj niman otimoknelij ixpan Dios ijkuak otikak itlajtoltsin tlinon kichiuilis in iueyikalpan Jerusalén iuan ichanejkauan, niman pampa otinechtitij ika otimoknelij ijkuak otiktsayan motlaken niman ijkuak otichokak nixpan, nejua no yonimitskak. Nejua moTEKO nikijtoua. 28 Nejua nimitskauilis timikis moyolika niman mitstôkaskej iuan mouejkatajuan. Xtikitas on tlaxoxotonilistli yejuan nikuajtitlanis nikan ipan in chanejkej."
Niman yejuamej oyajkej okijlitoj on rey. 29 Kemaj on rey Josías okintekuitlan on uejueyitlayekankej de Judá niman de Jerusalén para ma nosentlalikan. 30 Kemaj on rey oyaj ipan iueyitiopan toTEKO iuan nochi ichanejkauan Judá niman de Jerusalén, on tiopixkej, on levitas niman nochi on nación desde yejuan más konetl hasta yejuan más ueyi. Oyajkej ipan iueyitiopan toTEKO. Ompa on rey okinomachtij chikauak nochi on amamoxtli tlen kijtoua on pacto yejuan okinextijkej ipan iueyitiopan toTEKO. 31 Kemaj on rey onotelkets itech on pilar de tekiuajyotl, niman ixpan toTEKO okichiu pacto. Okiprometeroj kitlakamatis toTEKO, ika nochi iyojlo niman ika nochi ialma, niman okiprometeroj kichiuas nochi on sesekneka tlanauatiltin de on pacto ken tlajkuilolnestikaj ipan in amamoxtli. 32 Sakin okinchiualtij para nochimej on yejuan nemiyaj ne Jerusalén niman de itribu Benjamín ma kijtokan ika no kichiuaskej. Niman ijkon on chanejkej de Jerusalén okichijkej pacto iuan Dios, on Dios de inachtojtajuan. 33 Josías okitekaualtij nochi on tlen sanoyej xkuajli kichiuyaj yejuan kichiuayaj ipan nochi on ueyitlalpan de on israelitas, niman nochimej yejuan nemiyaj ne Israel okinchiualtij ma kitekipanokan toTEKO Dios. Niman chika Josías nemiya, xokitlalkauijkej toTEKO Dios, Dios de inachtojtajuan.