Manasés otlamandaroj Judá
33
Manasés kipiyaya majtlaktli uan ome xipan ijkuak opeu tlamandaroua ken rey, niman otlamandaroj 55 xipan ne Jerusalén. 2 Pero okichiu tlen xkuajli ixpan toTEKO. Okichiu on tlen sanoyej xkuajli ken kichiuayaj on oksekimej naciones, yejuan toTEKO okinuajkixtij ipan on país ijkuak okalakkej on israelitas. 3 Manasés oksejpa okinchijchiu on pipitikej tiopanmej ne inkuapan on tepetsitsimej yejuan Ezequías, itataj okinxoxotonijka, okinchijchiu on tlaixpanmej para on baales, niman no okintlalij on kojtin* kampa nestikatkaj ixneskayouan on diosa Asera. Niman no inmixpan onotlakuantelkets niman okinmauistilij nochi on tlen onokej ipan cielo: tonaltsintli, metstli niman sitlalimej. 4 Okinchijchiu tlaixpantin para on xmelauak dioses ipan iueyitiopan toTEKO, kampa yejua toTEKO yokijtojka: "Ne Jerusalén ompa nokauas notokatsin para nochipa." 5 Manasés no okinchijchiu tlaixpantin para on sitlalimej yejuan onokej ipan cielo ipan on okan ikiauak iueyitiopan toTEKO. 6 Okintlatij ikoneuan ken uentli ipan on ixtlauatl de Ben-henón. Okejekoj magia, nauajlotl, niman tetlatejtemouilistli. Yejua kiminnotsaya mikatsitsimej niman on yejuan tetlamachilisitaj. Okichiu mejyek tlajtalmach yejuan xkuajli ixpan toTEKO, niman ijki sanoyej okualanij toTEKO. Yejua kiminnotsaya mikatsitsimej niman on yejuan tetlamachilisitaj. 7 No okitlalij ipan iueyitiopan toTEKO, sen ixneskayo on ídolo yejuan okichijchijka. Ne kampa toTEKO yokijlijka David niman Salomón, ikoneu: "In ueyikalpan Jerusalén, niman in ueyitiopan, yejua oniktlapejpenij de intsajlan nochimej on tribus de Israel, para ompa nichantis nochipa. 8 Nejua xkaman nikchiuas para on israelitas ma kisakan ipan on tlajli yejuan onikinmakak inuejkatajuan, tla nochi nenkitlakamatij on tlen onemechnauatij, nochi on temachtiltin, on leyes niman on tlanauatiltin yejuan onemechmakak itechkopa Moisés." 9 Pero Manasés okichiu para on chanejkej Judá niman Jerusalén, ma kitokakan on xkuajli ojtli niman ma kichiuakan on tlen más xkuajli xken on naciones yejuan toTEKO okinkixtij ijkuak okalakkej on israelitas.10 ToTEKO okinots Manasés niman ichanejkauan, pero xokinekkej okakkej. 11 Yejua ika, toTEKO okinuajtitlan on soldadostlayekankej de on rey de Asiria, niman okajsikej Manasés, okitepitskualtijkej tepostli ipan iyak, niman okisalojkej ikan teposcadena de bronce. Kemaj okuikakej Babilonia. 12 Pero ijkuak onomat ipan ueyi ajmantli, onoueyikatsajtsilij itech toTEKO, Dios de iuejkatajuan, niman onoknelij ixpan toTEKO. 13 Kemaj onoueyikatsajtsilij itech toTEKO, niman yejua okak on tlen okitlajtlanilij niman okauilij ma nokuepa Jerusalén niman oksejpa otlamandaroj. Ijkon tej, Manasés okajsikamat ika toTEKO san yejua Dios.
14 Sakin de nochi yejua in, Manasés okichijchiu sen kiauak tepantli kampa itoka Iueyikalpan David, yejuan peuaya desde kampaka ikalakiyan tonaltsintli de Gihón, ipan on ixtlauatl hasta itech itsakuijlou on Michimej, niman kiyeualojtoya on tepetsintli Ofel. Niman okintlalij soldadostlayekankej ipan nochi on ueyikalpan yejuan kuajli yeualtsakutikaj ne Judá. 15 No okejkuanij ipan iueyitiopan toTEKO on dioses yejuan xchanejkej, on ídolo niman nochi on tlaixpanmej yejuan okinchichijkaj ipan on tepetsintli kampa onkaj iueyitiopan toTEKO niman imanian Jerusalén niman okinxinitoj uejka de on ueyikalpan. 16 Sakin okuektlalij on itlaixpan toTEKO niman okitemakak uentli de yoltlalilistli, niman uentli de tlaxtlauijli. Okinnauatij on chanejkej ne Judá ma kimauistilikan niman ma kitekipanokan toTEKO, Dios de Israel. 17 Pero on chanejkej sanken kitemakaya uentli ipan on pipitikej tiopanmej yejuan para ídolos ne inkuapan on tepetsitsimej, pero on uentli yejuan kitemakayaj, san kimakayaj iminTEKO Dios.
18 On okseki tlajtlamach yejuan okichiu Manasés, niman iueyikatsajtsilis itech toTEKO, on tlinon okijlijkej on tiotlajtojkej ikan itokatsin toTEKO, Dios de Israel, tlajkuilolnestikaj ipan on amamoxtli kampa tlajkuilolnestikaj iminnemilis on reyes de Israel. 19 On iueyikatsajtsilis niman on kenijki Dios okinankilij, on itlajtlajkoluan niman ixko yejyeualis, on kampa okinchijchiu on pipitikej tiopanmej ikuapan tepetsitsimej, niman kampa okintlalij ixneskayouan on diosa Asera niman on oksekimej ídolos ijkuak xe nokneliaya itech Dios, nochi tlajkuilolnestikaj ipan on amamoxtli de on tiotlajtojkej. 20 Ijkuak Manasés omik okitôkakej ipan on xochitlan de ipalacio. Kemaj Amón, ikoneu, kej yejua okalak rey.
Amón otlamandaroj ne Judá
21 Amón kipiyaya 22 xipan ijkuak opeu tlamandaroua ken rey, niman otlamandaroj Jerusalén ome xipan. 22 Pero okichiu tlen xkuajli ixpan toTEKO, ken okichijka Manasés, on itataj. Otlauentlalij intech on ídolos yejuan okinchijchijka itataj, niman okinmauistilij. 23 Pero Amón xonoknelij ixpan toTEKO, ijkon ken okichijka Manasés itataj. Yej okichiu más miyek tlajtlakoltin.