Senaquerib okuijsok Judá
(2 R 18.13—19.37; Is 36-37)
32
Sakin de nochi on tlen okichiu Ezequías niman ijkuak yokiteititij ika kipiya kuajli iyojlo, oyejkok Senaquerib, rey de Asiria, okuijsok Judá. Okinyejyeualojkej on uejueyikalpanmej yejuan kuajli yeualtsakutokej, para kinnoyaxkatiskej.2 Ijkuak Ezequías okitak ika Senaquerib yoajsik para kuijsokis Jerusalén, 3 onosentlalij inuan on itlapeliuikauan niman on isoldadojtlayekankauan, niman okinmijlij nonekej kintsakuaskej on ameltin yejuan onkaj nisiu on ueyikalpan, niman yejuamej okinekkej. 4 Kemaj onosentlalijkej miyekej tlakamej niman okintsakukej nochimej on ameltin, niman on apantli yejuan onkaj ijtik tlajli, para ijki ijkuak yejkoskej on reyes de Asiria xkinextiskej miyek atl.
5 Ezequías onoyolchikau niman okueltlalij on tepantli, niman no okinchijchiu torres ipan on tepantli, niman okse tepantli kiauak. Niman no okitlakpaktilij on tlalmanko ipan on ueyikalpan yejuan itoka Iueyikalpan David, niman okichijchiu miyek lanzas niman escudos. 6 Kemaj okintlalij tlapaleuijkej para ma kinyekanakan on tlakamej. Okinsentlalij ipan on plaza yejuan nokaua ixpan itsakuijlou on ueyikalpan niman okinyolchikau. Ijkin okinmijlij: 7 “¡Xmokojtilikan niman xmoyolchikauakan! Maka xmomojtikan nion maka xmoyolmajxalokan ixpan on rey de Asiria niman inmixpan on miyekej soldados yejuan kinuajuika, pampa tejuamej tikpiyaj más poder xken yejua. 8 Yejua kimpiya on soldados yejuan kojtikej, pero tejuamej touan nemi toTEKO Dios para techpaleuis tlauijsokis touan.” Ijkuak okakkej itlajtol on rey Ezequías, nochimej onoyolejkej.
9 Sakin Senaquerib, rey de Asiria, ye kuijsoktikatka on ueyikalpan Laquis iuan nochimej isoldados, okintitlan Jerusalén sekimej on iueyitekitkauan, para ma kijlitij Ezequías, rey de Judá, niman nochimej on chanejkej Judá yejuan nemiyaj ompa Jerusalén, yejua in tlajtojli: 10 “Senaquerib, rey de Asiria, otechajtitlan ma temechijlikij: ‘¿Tline nemokauaj ne Jerusalén niman nenkinemiliaj ika xitlaj nemopan nochiuas maski yotikyejyeualojkej moueyikalpan para tikuijsokiskej? 11 Ijkuak Ezequías mechijlia ika iTEKO Dios mechmanauis nomak mechkajkayajtikaj niman uelis nenmikiskej ikan apistli niman amiktli. 12 ¿Tlen xokinxoxotonij Ezequías on ipan tepetsitsimej kampa kimauistiliayaj niman on tlaixpanmej, niman otlanauatij para on tlakamej de Judá niman de Jerusalén ma kimauistilikan niman ma kitlatikan kopajli san ipan sen tlaixpan? 13 ¿Xnenkimatij on tlen nejua niman noachtojtajuan yotikchijkej iminuan nochimej on tlakamej ipan oksekimej países? ¿Tlen ouelkej on dioses de on naciones okinmakixtijkej itech nopoder. 14 Katlejua de nochimej on dioses de on naciones yejuan okinxoxonijkej noachtojtajuan ouel okimakixtij ipaís de nopoder? ¿Tline nenkinemiliaj ika nemoDios uelis mechmakixtis? 15 Yejua ika tej, maka xkauilikan ma mechkajkayaua nion maka itlaj xneltokilikan Ezequías, pampa tla nion se dios de on naciones ouel okimmanauij on tlakamej de nopoder niman inpoder noachtojtajuan, ¡nemoDios más xuelis mechmanauis de nopoder!’ ”
16 Yejua in, niman okseki tlajtlamach ika iueyitekitkauan on rey de Asiria okuijuikaltijkej Dios, toTEKO, niman Ezequías itekitkau.' " 17 Senaquerib no okijkuiloj amatlajkuiloltin kampa tlamach kijtouiliaya toTEKO, Dios de Israel, niman kampa ijkin kijtouaya: “Ijkon kenon dioses ipan oksekimej naciones xokinmakixtijkej iminchanejkauan, no ijki iDios Ezequías xuelis kimakixtis ichanejkauan de ipan nopoder." 18 On iueyitekitkauan Senaquerib okomintakej on tlakamej de Jerusalén, yejuan nemiyaj tlakpak ipan on tepanchinantli. Yejua ika, okonminotskej sanoyej chikauak ika hebreo tlajtojli para kinmomojtiskej niman kinmojkakuitiskej, para ijki más uelis kinoyaxkatiskej on ueyikalpan Jerusalén. 19 Yejuamej kiteneuayaj on Dios de Jerusalén sano ijki ken kinteneuaskiaj on dioses yejuan san okinmachijchijkej on tlakamej.
20 Kemaj, on rey Ezequías niman on tiotlajtojketl Isaías, ikoneu Amoz, okichijkej oración niman okitlajtlanilijkej Dios para ma kimpaleui. 21 Kemaj toTEKO okuajtitlan sen ángel yejuan okinmiktij nochimej on soldados, soldadostlayekankej niman on yejuan más uejueyixtokej soldadostlayekankej ipan icampamento on rey de Asiria. Yejua ika, Senaquerib onokuep ipan ipaís ikan miyek pinaualistli. Niman ijkuak okalak ipan itiopan idios, ompa okimiktijkej sano ikoneuan.
22 Niman ijkon, toTEKO okimanauij Ezequías niman on chanejkej ne Jerusalén de ipoder Senaquerib on rey de Asiria, niman de inpoder nochimej on oksekimej intlauelikniuan. Ijkon tej, okinmakak yolseuilistli iuan nochimej inisiuchanejkauan. 23 Kemaj sanoyej miyekej okiktikej ne Jerusalén uentin para toTEKO, niman tetlayokoliltin yejuan patioj para Ezequías, rey de Judá. Niman desde ijkuakon, on rey sanoyej okixmatkej, niman okitlakaitakej ipan nochimej on oksekimej naciones.
Ezequías sanoyej okualok pero opajtik
(2 R 20.1-11;I s 38.1-22)
24 Ipan on tiempo, Ezequías okajsik sen temojtij kokolistli, pero okichiu oración itech toTEKO, niman yejua okinankilij ikan sen tlamauisojli. 25 Pero, maski okiselij tlen kuajli, Ezequías xokitlajsojkamat, yej sanoyej onoueyimat. Yejua ika, toTEKO okualan iuan niman no iuan Judá niman Jerusalén.
26 Pero maski Ezequías onoueyimatka, sakin onoknelij ixpan toTEKO, niman no onoknelijkej on chanejkej Jerusalén. Yejua ika, toTEKO xokincastigaroj chika Ezequías nemiya.
Ezequías sanoyej oricojtiak
27 Ezequías sanoyej oricojtiak niman okitlakaitakej. Okinchijchiu on kaltlayejyeualoltin kampa okejkej on plata, oro, tetsitsimej yejuan kualtsitsimej, ajuiyalistli, escudos niman nochi tlajtlamach tlen patioj. 28 No okinchijchiu kaltin kampa keuayaj trigo, vino niman aceite. Niman okinchijchiu kampa kintsakuayaj nochi seseknekamej yolkej niman corraltin kampa kintsakuayaj borregos niman chivos. 29 Niman no otlanauatij ma kinchijchiuakan uejueyikalpanmej, niman okimpix sanoyej miyekej uakaxtin niman borregos, pampa Dios okimakak sanoyej miyek tlajtlamach.
30 Ezequías no otlanauatij ma kitsakuakan on atl yejuan kisaya de on amejli yejuan onkaj ne Gihón, niman okitlalilij apantli tlatsintlankopa, kampaka ikalakiyan tonaltsintli ipan on ueyikalpan yejuan itoka Iueyikalpan David. Ijkon tej, sanoyej kuajli okis nochi tlen Ezequías okichiu.
Ezequías okinselij on yejuan okinuajtitlankej Babilonia
(2 R 20.12-19; Is 39.1-8)
Ezequías omik
(2 R 20.20-21)
32 On okseki tlen okichiu Ezequías niman de nochi on tlen sanoyej kuajli okichiu, tlajkuilolnestikaj ipan on amamoxtli de on tiotlajtojketl Isaías, ikoneu Amoz, niman ipan on amamoxtli de on reyes de Judá niman de Israel. 33 Ijkuak omik Ezequías, okitôkakej tlakpakopa kampa tôktoyaj ifamilias David. Nochi Judá niman on chanejkej de ne Jerusalén okiteititijkej tetlakaitalistli para on rey Ezequías. Kemaj Manasés, ikoneu, kej yejua okalak rey.