31
Ijkuak nochi on yotlan, nochimej on israelitas yejuan ompa nemiyaj, oyajkej ipan inuejueyikalpanuan Judá niman okintetlajtlapan on temej yejuan on chanejkej kinmauistiliyaj, niman okintsojtsontek on kojtin* kampa nestikatkaj ixnexkayouan on diosa Asera. Niman no okinxoxotonijkej on pipitikej tiopamej kampa kinmauistiliayaj ídolos tlakpak ipan tepetsitsimej niman nochi intlaixpanuan, hasta kaman otlankej nochi kixoxotoniaj on tlajtlamach ipan nochi Judá niman ipan on uejueyitlalpanmej de Benjamín, de Efraín niman de Manasés. Kemaj nochimej on israelitas onokuepkej ipan iminuejueyikalpanuan, cada se ipan ichan.2 Sakin Ezequías okinxexeloj on tiopixkej niman levitas kenijki nopatlatiaskej cada se, kamanon kitocaroua tekitis niman tlinon kichiuas. Sekimej kitemakayaj uentli de yoltlalilistli noso para tlapojpoluilistli de tlajtlakojli. Sekimej kimakayaj tlaxtlauijli niman kimauistiliayaj toTEKO, niman oksekimej tlajpiyayaj ipan ikalakiyan on ueyitiopan. 3 Niman on rey no okitemakak de yejua iyaxka on uentli yejuan nochi tlatla para ijkuak kualkan niman ijkuak tiotlak, on uentli para ipan on sábado, de on iluitl ijkuak yenkuik metstli niman para ipan on uejueyi iluimej, ken tlajkuilolnestikaj ipan iley toTEKO. 4 No okinnauatij on chanejkej de Jerusalén ma kitemakakan tlanechikojli para kinmakaskej on tiopixkej niman on levitas intlaxtlauil yejuan kintocaroua kiseliskej, para ijki uelis san ika nokauaskej kichiuaskej on tlen tlanauatia iley toTEKO. 5 Niman ijkuak on tlanauatijli okimatkej nochiuiyan, on israelitas okitemakakej miyek on tlen achtoj otlak de trigo, vino, aceite, nekutli niman nochi on tlajtlamach yejuan otlak ipan intlatok. No ijki okiktikej on diezmo de on miyek tlajtlamach yejuan okipixkakej.
6 No ijki on chanejkej ne Israel niman on yejuan chantiyaj ipan oksekimej iuejueyikalpanuan Judá okuajkikej on diezmo* de uakaxtin niman borregos, niman on diezmo de on tlajtlamach yejuan okitiochijkatlalilijkej iminTEKO Dios. Nochi okitepayolojkej san sekan. 7 Ipan on ika yeyi metstli opeu kisentlaliaj on tlajtlamach, niman otlankej ipan chikome metstli. 8 Niman ijkuak Ezequías niman on tlayekankej oyajkej okitatoj on tlen okisentlalijkej, okiueyitenejkej toTEKO niman okintiochijkej on chanejkej Israel. 9 Kemaj Ezequías okintlajtlanilij on tiopixkej niman on levitas ma kijlikan de nochi on tlen okisentlalijkej, 10 niman on tleyekanki tiopixki Azarías, yejuan ualeua itech ifamilia Sadoc, okinankilij: “Desde ijkuak opeu kuajkij tlanechkoli ipan iueyitiopan toTEKO, xtechpoloua tlakuajli niman miyek yonokau, pampa toTEKO yokintiochiu itlapejpeniluan.”
11 Yejua ika tej, Ezequías otlanauatij ma kinkuektlalijkan on kaltlayejyeualoltin kampa tlayejyeuaskej ipan iueyitiopan toTEKO.. Ijkuak yokinkuektlalijkej, 12 ompa okalaktijkej nochi kech onosentlalij on tlanechikojli, on diezmo niman nochi on tlen okimaktilijkej toTEKO. Conanías on levita, yejua okitlalijkej ken más ueyitlayekanki niman Simei, on ikniu, itopilejkau, para cuidarouayaj nochi on tlajtlamach. 13 On rey Ezequías iuan Azarías on ueyitlayekanki tiopixki ipan iueyitiopan Dios, okintenejkej in tlakamej: Jehiel, Azazías, Nahat, Asael, Jerimot, Jozabad, Eliel, Ismaquías, Mahat niman Benaía ken tlajpixkej para kitlajpiyayaj on tlajtlamach ipan on templo. Niman Conanías iuan Simei, ikniu, okintenejkej para tlayekanaya. 14 Kampaka ikisayan tonaltsintli ipan on tsakuijlotl tlajpiyaya on levita itoka Coré ikoneu Imna. Yejua kiseliaya on tlayokoliltin yejuan kimakayaj Dios, niman kitexelouiliayaj on tlayokoliltin yejuan kimakayaj toTEKO niman de on tlajtlamach tlatiochijtli. 15 On tiopixkej Edén, Miniamín, Jesús, Semaías, Amarías niman Secanías kipaleuiyayaj Coré para texelouiliayaj on tlen cada se kitocarouaya kiselis, ipan on ueueyikalpanmej kampa chantiyaj on intiopixkaxiuan. Yejuamej sanoyej kuajli kichiuayaj, niman kinmakayaj sano ichkich on yejuan más uejueyixtokej niman yejuan xmás uejueyixtokej. 16 No, kinxelouiliayaj tlayokoliltin on yejuan mojmostla yayaj ipan on ueyitiopan para kichiuayaj imintekiu ijkon ken kintocarojtiaya niman kampa kintocarouaya. Kinxelouiliayaj tla imintoka tlajkuilolnestikatka ipan on tlakamekayomej. Ijkon kiseliayaj tla kipiyayaj yeyi xipan para tlakpak. 17 On tiopixkej okinmakakej imintekiu ipan on ueyifamilia kampa yejua nemiya niman on levitas yejuan kipiyayaj 20 xipan para tlakpak okinmakakej imintekiu niman imingrupos. 18 Yejuamej no tlajkuilolnestokej inuan nochimej on kokonej pipitikej, on tesiuauan, on tekoneuan yejuan tlakamej niman yejuan siuamej, ipampa on tekitl yejuan okinmakakej ne ipan iueyitiopan toTEKO. 19 On rey Ezequías okinteneu tlakamej para kinxelouiliayaj tlen kikuayaj on tiopixkej niman on levitas yejuan chanitayaj ipan on uejueyikalpanmej de nomanauiloyan yejuan okinmakakej iuejkakoneuan Aarón niman ipan on tlaltin kampa kintlakuajkualtiayaj inyolkauan. Kixelouiliayaj cada tlakatl ipan ifamilia on tiopixki niman cada levita yejuan tlajkuilolnestikaj ipan on lista de levitas.
20 Ezequías okichiu yejua in nochiuiyan ipan Judá. Yejua okichiu tlen kuajli, melajki niman ikan kuajli iyojlo ixpan iTEKO Dios. 21 Nochi tlen okichiu para on tekitl ipan iueyitiopan Dios noso para on leyes niman tlanauatiltin, nochi okichiu para okitejtemoj Dios ikan nochi iyojlo. Yejua ika, nochi kuajli okis on tlen okichiu.