Ezequías okichiu on iluitl Pascua
30
Ezequías otlanauatij ma kiteijlitij ipan nochi Israel niman Judá, niman no okintitlanilij amatlajkuiloltin Efraín niman Manasés, para ma uiyan ipan iueyitiopan toTEKO ne Jerusalén pampa kichiuaskej on iluitl Pascua de toTEKO, Dios de Israel. 2 Sakin on rey okinnots itlapaleuijkauan niman nochimej on chanejkej ne Jerusalén, okinmijlij para kichiuas on iluitl Pascua ipan on ika ome metstli. 3 Ijkin okijtoj pampa xouel okichijkej ijkuak nonekiya pampa xnemiyaj miyekej tiopixkej yejuan yonochipajkaj ixpan Dios nion on chanejkej xonosentlalijkaj ne Jerusalén. 4 Pampa on rey inuan nochimej on chanejkej okitakej kuajli kichiuaskej on iluitl ipan on tonajli ken okijtojkej, 5 okinekkej kitemachistiskej ipan nochi Israel, desde Beeseba kampaka sur hasta Dan kampaka norte. Yejua ika, otenotskej para ma uiyan ipan on iluitl ne Jerusalén ipan iPascua toTEKO, Dios de Israel. Ipan miyek tiempo xokichijkaj on iluitl iminuan miyekej, ken tlajkuilolnestikaj ipan on ley.6 Ijkon tej, okiskej temachistijkej ipan nochi Israel niman Judá ikan amatlajkuiloltin de itlanauatil on rey niman de on itlapaleuijkauan yejuan ijkin kijtouaya: “Israelitas: xmokuepakan itech toTEKO, iminDios Abraham, Isaac niman Israel, niman yejua nokuepas nemotech nemejuamej yejuan xonenuetskej inmak on reyes de Asiria. 7 Maka xmouikakan ken nemoachtojtajuan nion ken nemokniuan yejuan ixko oyejyekej iminTEKO Dios inachtojtajuan. Yejua sanoyej okincastigaroj, ken nemejuamej nenkitaj. 8 Yejua ika, maka xmoyoltechikauakan ken nemoachtojtajuan, yej xtlakamatikan. Xuajlakan itech iueyitiopan yejuan yejua yokitiochijkatlalij para nochipa, niman xmauistilikan para xok kualanis nemouan. 9 Tla nemejuamej nemokuepaj itech toTEKO, on nemotlauelikniuan yejuan okinmajsikej nemokniuan niman nemokoneuan kinmikneliskej niman kinkauiliskej ma nokuepakan ipan in país, pampa nemoTEKO Dios teikneliani niman tetlajsojtla. Yejua xmechichiuas nemejuamej, tla nemejuamej nemokuepaj itech yejua."
10 On temachistijkej okistinenkej ipan nochi iueyitlalpan Efraín niman Manasés. Yejuamej yayaj ipan sen ueyikalpan niman ipan okse ueyikalpan hasta ijki oajsikej ipan iueyitlalpan Zabulón. Pero on tlakamej san kinuejuetskiliayaj on temachistijkej niman kimpijpinauiyayaj. 11 Pero sekimej tlakamej yejuan kisaj ipan itribu Aser, Manasés niman Zabulón onoknelijkej ixpan Dios niman oyajkej Jerusalén. 12 Dios no okichiu para on tlakamej de Judá no ma kinekikan kichiuaskej itlanauatil on rey niman de on tlayekankej, ijkon ken otlanauatij toTEKO.
13 Ijkon tej, sanoyej otojlantik ipan on ome metstli ne Jerusalén para okichijkej on iluitl de on pan yejuan xkipiya tlajxokolilistli. 14 Opejkej kinmejkuaniaj nochimej on tlaixpanmej de on oksekimej dioses niman kampa kitlatiayaj kopajli yejuan onkatkaj ne Jerusalén, niman okominxinijkej ipan on ayajtok Cedrón. 15 Ipan on tonajli majtlaktli uan naui ipan on ome metstli, okimiktijkej on borrego para on iluitl Pascua. On tiopixkej niman levitas yejuan xonochipajkej ixpan Dios onoyolkokokej niman opinajkej. Yejua ika, onochipajkej niman kemaj okinuikakej yolkej ipan iueyitiopan toTEKO para on uentli yejuan nochi tlatla. 16 Kemaj oyajkej kampa kintocarouaya kichiuaskej intekiu, ijkon ken tlajkuilolnestikatka ipan iley Moisés, itekitkau Dios. On tiopixkej ika tlajuichiayaj on yestli yejuan on levitas kinmakayaj. 17 Pero pampa miyekej tiopixkej xonochipajkej ixpan Dios ken kitocaroua, xouel okinmiktijkej on borreguitos para on Pascua niman xouel okinuentlalijkej itech Dios. Yejua ika, on levitas okinmiktijkej on borregos para on Pascua, niman okinkuentlalijkej itech Dios impampa nochimej on yejuan xonochipajkaj. 18 Pero pampa miyekej on tlakamej de Efraín, Manasés, Isacar niman Zabulón no teuan okikuajkej on tlakuajli de on Pascua, xonochipajkej ijkon ken tlajkuilolnestikaj ipan on ley, Ezequías okichiu oración impampa yejuamej. Ezequías ijkin okijtoj: “ToTEKO, tejua kuajli moyojlo. Yejua ika, xkintlapojpolui nochimej on yejuan mitstejtemouaj ikan nochi iminyojlo. 19 Ay toTEKO, iminDios on inachtojtajuan, maski xonochipajkej ken noneki, tejua xkintlapojpolui.”
20 Niman toTEKO okak on tlen okitlajtlanilij Ezequías niman okintlapojpoluij on ikoneuan. 21 Ijkon tej, ipan nochi on chikome tonajli, on israelitas yejuan nemiyaj ne Jerusalén okichijkej ikan miyek paktli on iuitl de on pan yejuan xkipiya tlaxokolilistli. Niman on tiopixkej niman levitas mojmostla kuikatlalijtikatkaj toTEKO ikan tlatsotsonaltin. 22 Ezequías okinkuajliteneu nochimej on levitas yejuan okiteititijkej ika otekitkej ikan paktli ipan itekiu toTEKO.
Niman sakin ijkuak yokikuajkej on tlakuajli ipan nochi on chikome tonajli de on iluitl, ika okitemakakej uentli de yoltlalilistli niman ika okuikatlalijkej toTEKO, iminDios inachtojtajuan, 23 nochimej on yejuan onosentlalijkej okijtojkej ika kichiuaskej okse chikome tonajli on iluitl. Yejua ika okichikej on iluitl okse chikome tonajli niman sanoyej okipakachijkej. 24 Ezequías, rey de Judá okintlayokolij on yejuan onosentlalijkej 1 mil becerros, niman 7 mil borregos niman on tlayekankej no okitetlayokolijkej 1 mil becerros niman 10 mil borregos. San chika Miyekej tiopixkej onoyolejkej para onochipajkej ixpan Dios. 25 Nochimej on yejuan onosentlalijkej de Judá opakkej, no ijki kenon tiopixkej, on levitas niman nochimej on tlakamej yejuan oualejkej ne Israel, niman on xchanejkej yejuan oualejkej ipan iueyitlalpan Israel noso yejuan chantiyaj ne Judá. 26 Oonyak tej, miyek paktli ne Jerusalén, pampa desde ijkuak on rey Salomón, ikoneu David, xkaman onochijka itlaj kenon ne Jerusalén. 27 Sakin on tiopixkej niman levitas, onotelketskej niman okintiochijkej on chanejkej, niman toTEKO okak, on iminoración yejuan oajsik hasta iluikak, ne kampa on yektli Dios chantitikaj.