Ezequías otlamandaroj ne Judá
29
Ezequías kipiyaya 25 xipan ijkuak opeu tlamandaroua ken rey, niman otlamandaroj 29 xipan ne Jerusalén. Inanaj itoka katka Abi, ichpoch Zacarías. 2 Ezequías okichiu tlen kuajli ixpan toTEKO, ijkon ken okichiu David, iuejkatataj. 3 Ipan on achtoj metstli de on achtoj xipan ijkuak opeu tlamandaroua, Ezequías otlanauatij ma kitlapokan itsakuijlou on ueyitiopan de toTEKO, niman okikuektlalij. 4 Okintekuitlan ma uajlakan on tiopixkej niman on levitas niman okinsentlalij ne tiopankiauak kampaka ikalakiyan tonaltsintli. 5 Niman ijkin okinmijlij: “¡Xnechkakikan levitas! Aman xmochipauakan ixpan Dios niman no xchipauakan iueyitiopan iminTEKO Dios nemoachtojtajuan. Ipan on yektiopan xkixtikan nochi on tlen xchipauak, 6 pampa toachtojtajuan ixko oyejyekej toTEKO Dios niman okichijkej tlen xkuajli ixpan. Okitlalkauijkej toTEKO niman xokinekkej yaskej ipan iueyitiopan toTEKO kampa chanti. 7 Onenkintsakukej itsakuijlouan on kalixpan de on ueyitiopan, onenkinseuijkej on tlauiltsitsimej, xok onenkitlatijkej kopajli niman no xok onenkitemakakej on uentli yejuan nochi tlatla ixpan on iyektiopan toTEKO, Dios de Israel. 8 San yejua ika in, itlauel toTEKO ouets ipan Judá niman Jerusalén, niman yejuamej okinkau sanoyej tepinajtij niman temojtij ixpan nochi tlakatl, ken aman nemejuamej nenkitstokej ika nemixtololojuan. 9 Yejua ika, toachtojtajuan omikkej ika espada niman tokoneuan tlakamej, siuamej niman tosiuauan okinuikakej para okintsakuatoj. 10 Pero aman yonikijtoj ika nikchiuas sen pacto iuan toTEKO, Dios de Israel, para makasa ma kualani touan tejuamej. 11 Nokoneuan, maka xkajauilmatikan pampa toTEKO yomechtlapejpenij nemejuamej para nennemiskej ixpan niman nenkitekipanoskej niman nemejuamej nentlayekanaskej niman nenkitlatiskej kopajli."12 On levitas yejuan nimantsin opeu tekitij yejuamej in katkaj:
De iuejkakoneuan Coat, Mahat ikoneu Amasai niman Joel ikoneu Azarías.
De iuejkakoneuan Merari, Cis ikoneu Abdi niman Azarías ikoneu Jehaleel.
De iuejkakoneua Gersón, Joa ikoneu Zima, niman Edén ikoneu Joa.
13 De iuejkakoneuan Elizafán: Simri niman Jehiel.
De iuejkakoneuan Asaf: Zacarías niman Matanías.
14 De iuejkakoneuan Heman: Jehiel niman Simei.
De iuejkakoneuan Jedutún: Semanías niman Uziel.
15 Yejuamej okinsentlalijkej on yejuan ken kintaj, onochipajkej ixpan Dios, niman okalakkej ipan iueyitiopan toTEKO para okichipajkej, ijkon kenon rey yotlanauatijka, ken nestikaj ipan itlajtoltsin toTEKO. 16 On tiopixkej okalakkej ipan iueyitiopan toTEKO para okichipajkej. Ipan on yektiopan okixtijkej nochi on tlajtlamach yejuan xchipauak, yejuan ompa okinextijkej, niman on levitas okuitoj para okixinitoj ipan on ayajtok Cedrón. 17 Opejkej kichipauaj on ueyitiopan ipan on achtoj tonajli de on achtoj metstli, niman ipan chikueyi tonajli, yoajsikaj hasta ipan on kalixkajli kampa ikalakiyan iueyitiopan toTEKO. Ouejkajkej okse chikueyi tonajli para okichipajkej on yejuan poliuiya de iueyitiopan toTEKO niman ipan majtlaktli uan chikuasen tonajli de on achtoj metstli otlankkej. 18 Sakin oyajkej ixpan on rey niman okijlijkej: "Yotitlankej tikchipauaj iueyitiopan toTEKO, on tlaixpan kampa kitlatiaj on uentli iuan on tlajtlamach yejuan ompa kitekitiltiaj, niman on mesa kampa kitlaliaj on pan tlatiochijtli, iuan nochi on tlajtlamach yejuan ompa kitekitiltiaj. 19 No otitlanauatijkej ma kuektlalikan niman ma kichipauakan nochi on tlajtlamach yejuan ompa notekitiltia yejuan on rey Acaz ijkuak tlamandarouaya okinmejkuanijka pampa ixko oyejyeu toTEKO. Pero aman nochi yotiktlalijkej ixpan on itlaixpan toTEKO."
20 On rey Ezequías onokuiteu sanoyej saniman niman okinsentlalij nochimej on uejueyitlayakankej ipan on ueyi kalpan niman oyaj iminuan ipan iueyitiopan toTEKO. 21 Okuikakej chikome uakax, chikome borrego, chikome borreguito, niman no okuikakej chikome chivitos yejuan okinuentlalijkej ipampa itlajtlakol on rey niman itekitkauan, para on yektiopan niman para nochimej on chanejkej de Judá. On rey okinnauatij on tiopixkej yejuan iuejkakoneuan Aarón para ma kitemakakan on yolkej ken uentli yejuan nochi tlatla ipan on itlaixpan toTEKO. 22 On tiopixkej achtoj okinmiktijkej on uakaxtin, okajsikej inyesyo niman ika otlajuichijkej ipan on tlaixpan, sakin okinmiktijkej on borregos niman ika inyesyo okajuichijkej on tlaixpan, kemaj okinmiktijkej on borreguitos niman ikan inyesyo okajuichijkej on tlaixpan. 23 Kemaj okinuikakej on chivitos yejuan para uentli de on tlajtlakojli. Okinuikakej ixpan on rey niman inmixpan nochimej yejuan ompa yonosentlalikaj niman okintlalikej inmauan impan on yolkej. 24 Sakin on tiopixkej okinmiktijkej niman ika inyesyo okajuichijkej on tlaixpan ken sen uentli ipampa itlajtlakoluan nochi Israel. Ijkin okichijkej pampa on rey yotlanauatijka ika on uentli yejuan nochi tlatla kitemakaskej para kitlapojpoluiskej itlajtlakojli nochi Israel.
25 Ezequías no okintlalij on levitas ipan iueyitiopan toTEKO, ikan tlatsotsonaltin de címbalos, arpas niman liras. Yejua okitlakamat nochi on tlanauatiltin yejuan toTEKO okimakak on rey David itechkopa on tiotlajtojkej Natán niman Gad. 26 On levitas majmaniyaj ika on tlatsotsonaltin yejuan iyaxkauan katkaj David, niman on tiopixkej ika on tlapitsaltin. 27 Kemaj Ezequías otlanauatij para ma kitemakakan on uentli yejuan tlatla ipan tlaixpan. Niman amanaman opejkej ika on kuikatl para toTEKO niman okimpitskej on tlapitsaltin, iuan itlatsotsonaluan David, rey de Israel. 28 Nochimej yejuan ompa nemiyaj okimauistilijkej toTEKO chika on nokuikatijkej nokuikatiayaj niman on tiopixkej kimpitsayaj on tlapitsaltin. Ijkon onochiu hasta ijkuak otlan tlatla on uentli yejuan nochi tlatla. 29 Ijkuak otlan kitemakaj on uentli yejuan nochi tlatla, on rey niman nochimej on yejuan iuan ompa nemiyaj onotlakuantelketskej para okiueyitenejkej toTEKO. 30 On rey Ezequías niman on uejueyitlayekankej okinnauatijkej on levitas ma nokuikatikan on salmos para toTEKO, yejuan David niman Azaf on tiotlajtojketl okinmijkuilojkej. On levitas okichijkej ikan paktli, niman onotlakuantelketskej para okimauistilijkej toTEKO.
31 Sakin Ezequías okijtoj: "Aman ika yonenmochipajkej ixpan toTEKO, xmonisiuikan itech iueyitiopan ToTEKO niman xkuajkikan uentin para on tlaixpan niman uentli yejuan para tlaxtlauijli." Yejua ika, on chanejkej okitlakamatkej, niman on yejuan san okixtijkej ipan inyojlo, no okinuajuikakej yolkej, niman on tiopixkej kinmiktiayaj para on uentli yejuan nochi tlatla ixpan toTEKO. 32 Ijkon tej, on ikoneuan Dios okuikakej 70 uakax, 100 borregos niman 200 borreguitos para okimakakej on uentli yejuan nochi tlatla para toTEKO. 33 Nochi kech yolkej okinteyaxkatijkej itech toTEKO katka: 600 uakaxtin niman 3 mil borregos.
34 Pero on tiopixkej xmiyekej katkaj niman xnajxiliayaj kinmiktiaj on yolkej. Yejua ika, on levitas yejuan ken kintaj okimpaleuijkej para otlankej on tekitl, san chika on sekimej tiopixkej onochipajkej. Ijkin onochiu pampa on levitas uej nimantsin okinekkej onochipajkej xken on tiopixkej. 35 Okitemakakej miyek uentli yejuan nochi tlatla. Niman no onkatka miyek inchajka on yolkej yejuan kinmiktiayaj para on uentli de yolseuilistli, niman miyek uentli de vino yejuan iuan kitemakayaj on uentli yejuan nochi tlatla. Ijkon oksejpa opeu kimauistiliaj toTEKO ipan iueyitiopan. 36 Ezequías niman nochi tlakatl opakkej pampa Dios okimpaleuij on chanejkej para nochi okichijkej amanaman.