Acaz otlamandaroj ne Judá
(2 R 16.1-20)
28
Acaz kipiyaya 20 xipan ijkuak opeu tlamandaroua ken rey, niman otlamandaroj ne Jerusalén majtlaktli uan chikuasen xipan, pero xokichiu tlen melajki ixpan toTEKO, ken okichiu tlen melajki David, iuejkatataj. 2 Yej no okichiu ken okichijkej on reyes de Israel, niman no okinchijchiu ixneskayouan on ídolo Baal ikan tepostli. 3 Okitlatij kopajli ipan on ixtlauatl de Ben-honom niman okintlatij ikoneuan ken uentli yejuan tlatla. Ijkon okichiu ken kichiuayaj tlen sanoyej xkuajli on naciones yejuan toTEKO okinuajkixtij ipan on país ijkuak okalakkej on israelitas. 4 Niman no okinuentlalij niman okitlatij kopajli ipan on pipitikej tiopamej yejuan okinchijchiu para kinmauistiliayaj ídolos, ikuapan tepemej niman intlatsintlan de nochi kojtli yejuan mayeualtikej.5 Yejua ika, iTEKO Dios okitemaktilij itech on rey de Siria, niman on sirios okitlankej, niman okinmajsikej miyekej tlakamej yejuan okinuikakej Damasco. ToTEKO no okitemaktilij itech on rey de Israel, yejuan no sanoyej miyekej tlakamej okinmiktijkej. 6 San ipan se tonajli, Peka, ikoneu Remalías, okinmiktij ne Judá, 120 mil tlakamej yejuan más xmojkej, ijkon impan onochiu pampa okitlalkauijkej iminTEKO, on Dios de inachtojtajuan. 7 Niman Zicri, se yejuan sanoyej ueli tlauijsoki de itribu Efraín, okimiktij Maasías, ikoneu on rey, niman Azricam, tlayekanki ipan on palacio, niman Elcana, yejuan imasueyitlayekankau on rey. 8 Niman no, on soldados de israel okinmajsikej 200 mil siuamej, tlakakokonej niman siuakokonej de Judá niman okinuikakej Samaria. Niman no okinoyaxkatijkej miyek tlajtlamach tlen pajtio.
9 Ompa nemiya se itiotlajtojkau toTEKO, itoka Obed. Yejua okinnamikiko on soldados ijkuak ye kalaktikatkaj ne Samaria, niman okinmijlij:
—IminTEKO Dios nemoachtojtajuan, okualan iuan ichanekauan Judá, niman yejua ika yokintemaktilij nemotech nemejuamej. Pero nemejuamej onenkinmiktijkej ikan sen temojtij tlauejli niman ne ipan iluikak Dios okitak ken onenkintlauelmiktijkej. 10 Niman aman nenkinekij nenkimpiyaskej on chanejkej Judá niman de Jerusalén ken nenmoesclavos niman esclavas. Pero, ¿tlen nemejuamej xno yonentlajtlakojkej itechkopa nemoTEKO Dios? 11 Yejua ika tej, xnechkakikan niman xkinmakauakan nemoikniuan yejuan onenkimajsikej, pampa toTEKO sanoyej kualani nemouan nemejuamej.
12 Kemaj Azarías, ikoneu Johanán; Berequías, ikoneu Mesilemot; Ezequías, ikoneu Salum; niman Amasa, ikoneu Adlai, yejuan katkaj uejueyitlayekankej de Efraín, onotelketskej inmixpan on tlakamej yejuan oyajkaj ipan on nouijsokilistli, 13 niman okinmijlijkej:
—Maka xkinuajuikakan nikan on yejuan onenkinmajsikej, pampa on yejua ika techtlajtlakolmakas toTEKO. Nemejuamej san nenkinekij, más nenkimiyekiliskej totlajtlakoluan niman toculpa, yejuan ye miyek tikpiyaj, niman toTEKO sanoyej kualanis iuan Israel.
14 Kemaj on soldados okinmakajkej on yejuan okinmajsikaj niman okajkej on tlajtlamach yejuan okinkuilijkaj inmixpan on tlayekankej niman inmixpan nochi on chanejkej. 15 Kemaj, Azarías, Berequías, Ezequías niman Amasa, okincuidarojkej on yejuan on soldados okinmajsikaj. De on tlajtlamach yejuan okinkuilijkaj, okixtijkej tlakentin para okintlakentijkej on yejuan tsotsoltikej katkaj, niman okinkaktijkej, niman okintlakualtijkej, niman okintlaonitijkej, niman okimpajtijkej kampa tlakokoltin katkaj. Kemaj okinuikakej hasta Jericó, on ueyikalpan de on soyakojtin, niman okinkajkej iminuan yejuan ken kintaj. Nochimej on yejuan xouel nejnemij, oyetiajkej ipan polokomej. Sakin on soldados onokuepkej Samaria.
16 Ipan on tonaltin, on rey Acaz okititlanilij sen amatlajkuilojli on rey de Asiria para okitlajtlanilij ma kipaleui, 17 pampa on chanejkej Edom oksejpa okinuijsokitoj, niman okintlankej sekimej uejueyikalpanmej de Judá, niman okinuikakej sekimej yejuan okinmajsikej. 18 Niman no, on filisteos yokinoyaxkatijkaj on uejueyikalpanmej Bet-semes, Ajalón, Gederot, Sucot, Timna niman Gimzo iuan ikalpanuan pipitikej ipan on ixtlauatl de Néguev yejuan iyaxka Judá, niman impan yonochantijkaj. 19 ToTEKO okichiualtij Judá ma nokneli itech, ipampa Acaz rey de Judá, pampa yejua okipeualtij on tlen sanoyej xkuajli onochiu ne Judá niman yejua sanoyej ixko oyejyeu toTEKO. 20 Tiglat-pileser, rey de Asiria, oyaj itech Acaz, pero xokipaleuij, yej más okitlajyouiltij. 21 Maski Acaz okixtij on tlajtlamach yejuan patioj ipan iueyitiopan toTEKO, ipan on palacio niman ipan iminchan on tlayekankej niman okimakak on rey de Asiria ken impuesto, yejua xitlaj ika okipaleuij. 22 Niman maski ipan nochiuaya tlen xkuajli, Acaz más xokitlakamat toTEKO. ¡Ijkon katka on rey! 23 Okinmakak uentli on dioses de Damasco, yejuan impampa okitlankej. Okinemilij ika, tla on dioses de Siria okimpaleuijkaj on reyes de in país, no kipaleuiskiaj yejua, tla kinuentlalia yolkej para yejuamej. Pero impampa yejuamej okitlankej niman nochi Israel. 24 Acaz okisentlalij on tlajtlamach yejuan kitekitiltiayaj ipan iueyitiopan Dios niman okintlajtlapan. Yejua okintsaku itsakuijlouan on ueyitiopan niman otlanauatij ma kinchijchiuakan xkuajkualtin tlaixpanmej ipan nochi esquinas de Jerusalén. 25 Okinchijchiu xkuajkualtin tiopanmej kampa kinmauistiliaj ídolos ipan nochimej uejueyikalpanmej niman kalpamej de Judá para kitlatis kopajli intech oksekimej dioses niman ijkon más okualanij iminTEKO Dios de on inachtojtajuan.
26 On okseki tlajtlamach tlen okichiu, niman ken onouikak desde ipeuyan hasta itlamiyan, tlajkuilolnestika ipan on amamoxtli kampa tlajkuilolnestikaj iminnemilis on reyes de Judá niman de Israel. 27 Ijkuak omik, okitôkakej inuan iachtojtajuan ipan on ueyikalpan de Jerusalén, pero xokuikakej ne kampa kintôkaj on reyes de Israel. Sakin kej Ezequías, ikoneu, otlamandaroj ken rey.