Jotam otlamandaroj ne Judá
(2 R 15.32-38)
27
Jotam kipiyaya 25 xipan ijkuak opeu tlamandaroua ken rey, niman rey katka ne Jerusalén majtlaktli uan chikuasen xipan. Inanaj itoka katka Jerusa, ichpoch Sadoc. 2 Jotam okichiu tlen kuajli ixpan toTEKO, ijkon ken okichiu Uzías, itataj, pero xokalak ipan iueyitiopan toTEKO. Pero ichanejkauan Judá sanken okichijkej tlen sanoyej xkuajli. 3 Jotam yejua okichijchiu oksejpa on tsakuijlotl yejuan tlakpak ipan iueyitiopan toTEKO, niman no okichijchiu okseki tlajtlamach ipan on tepanchinantli itech on tepetsintli itoka Ofel. 4 No okinchijchiu uejueyikalpanmej ipan on tepemej de Judá, niman intepanuan on uejueyikalpanmej niman torres ipan kojyoj. 5 Onouijsok iuan iminrey on amonitas, niman okintlan. Ipan on xipan on amonitas okinchiualtijkej ma kitlaxtlauakan ken impuestos 3 mil 300 kilos de plata, 22 mil litros de trigo niman okse ichkich de cebada. No, ijki okitlaxtlau ome xipan más. 6 Jotam okipix ueyi poder pampa okichiu tlen melajki ixpan toTEKO. 7 On okseki tlajtlamach tlen okichiu Jotam iuan nochi on nouijsokilistli niman ken yejua onouikak, tlajkuilolnestikaj ipan on amamoxtli kampa tlajkuilolnestikaj iminnemilis on reyes de Judá niman de Israel.