Uzías otlamandaroj ne Judá
(2 R 14.21-22; 15.1-7)
26
Nochimej on chanejkej ne Judá okitenejkej Uzías rey yejuan kipiyaya majtlaktli uan chikuasen xipan. Ijki Uzias kej okipatlak Amasías, itataj. 2 Sakin Amasías omik niman okitôkakej iuan iachtojtajuan, Uzías okitekuilij on ueyikalpan Elat para Judá niman okuektlalij.3 Uzías kipiyaya majtlaktli uan chikuasen xipan ijkuak opeu tlamandaroua, niman otlamandaroj 52 xipan ne Jerusalén. Inanaj katka Jecolías niman ualeuaya Jerusalén. 4 Uzías okichiu on tlen kipaktiaya toTEKO, ijkon ken okichiu Amasías, itataj. 5 Niman chika nemiya Zacarías, yejua okimachtij kenijki kitlakaitas Dios, niman Uzias kuajli okitekichiuilij Dios. Niman chika kitokaya toTEKO, Dios okichiu para nochi kuajli ma kisa.
6 Uzías okinuijsok on filisteos niman okitlajkal on tepantli yejuan ika yeualtsakutikatka on ueyikalpan Gat, Jabnia niman Asdod. No okichijchiu on kalpanmej nisiu de on ueyikalpan Asdod niman ipan okseki partes de iueyitlalpan kampa on filisteos chantij. 7 Dios okipaleuij ipan on nouijsokilistli intech on filisteos, on árabes yejuan chantiyaj ne Gur-baal, niman intechkopa meunitas. 8 On amonitas kitlaxtlauayaj impuestos, niman Uzías okipix miyek poder, niman nochiuiyan kixmatiyaj hasta ipan itlalnamikiloyan Egipto.
9 Uzías no okinchijchiu torres ne Jerusalén ipan ikalakiyan kampa itoka Ueyitsakuijloxomolko, on ikalakiyan yejuan itoka Ueyitsakuijloixtlauatl niman kampa on tepantli kipiya iilakatsyo. 10 No ijki okinchijchiu torres ipan on xalpatlajkan, niman no okichijchiu miyek tlaltekontli pampa sanoyej miyek yolki ipan on ixtlauamej niman ipan on tlalmantli. No kimpiyayaj on tlakamej yejuan tekitiyaj ipan canpo niman ipan uvasyoj yejuan kipiyayaj ipan on región kampa tepeyoj niman ipan on ixtlauatl yejuan kuajli tlaltin, pampa yejua kuelitaya tlatoka.
11 Uzías kipiyaya miyekej soldados yejuan sanoyej ueliyaj tlauijsokij, ijkon ken okimpou on tlajkuilojketl Jehiel niman on tlapaleuijketl Maasías. On yejuan tlayekanaya katka Hananías itlayekankau on rey. 12 2 mil 600 tlayekankej de familias okinyekankej on soldados. 13 Yejuamej kiyekanayaj 307 mil 500 soldados yejuan sanoyej ueliyaj tlauijsokij niman kojtijkej katkaj para kipaleuiyayaj on rey kintlaniya on itlauelikniuan. 14 Uzías okiminmakak isoldados escudos, lanzas, cascos, teposchalecos, arcotlaminaltin niman tematlamej. 15 No okinmakak isoldados maquínas para ika tlajtlamotlayaj yejuan okichijchikej tlakamej yejuan tlamatkej. In maquínas okintlalij ipan torres niman ipan iesquinas on ueyikalpan para tlajtlamotlayaj ika tlaminajli niman temej yejuan sanoyej uejueyimej. Ikan iueyitlapaleuil Dios, Uzías okipix miyek poder niman sanoyej okixmatkej nochiuiyan hasta kampa más uejka.
16 Pero ijkuak okipix miyek poder, sanoyej onoueyimat niman okichiu tlajmach yejuan okiteititij ika xok kineltokaya toTEKO. Okalak ipan iueyitiopan toTEKO niman okitlatij kopajli ipan on tlaixpan kampa on tiopixkej kitlatiaj kopajli. 17 On tiopixki Azarías okalak ikuitlapan Uzías iuan on 80 itlajpixkauan toTEKO yejuan xmojkej. 18 Yejuamej okixnamikkej on rey Uzías niman okijlijkej: Xkuajli para yej tejua tiktlatis kopajli ixpan toTEKO. "Yejua in san kichiuaskej on tiopixkej, iuejkakoneuan Aarón, pampa yejuamej nemij tlakauiltin para kitlatiskej on kopajli. Amanaman xkisa ipan in yektiopan pampa yotitlajtlakoj, niman ika on toTEKO Dios xmitsselis."
19 Kemaj Uzías, yejuan kipiyaya ipan ima sen popochkontli para kitlatiskia on kopajli, sanoyej okualan intechkopa on tiopixkej. Nimantsin on tejmoti kualolistli, lepra ouajpanuets ixkuatipan, ompa inmixpan on tiopixkej, ipan iueyitiopan toTEKO, itech on tlaixpan kampa kitlatiaj kopajli. 20 Ijkuak on tleyekanki tiopixki Azarías niman on oksekimej tiopixkej okitakej ika ipan ixkuateu okis lepra, nimantsin okuajkixtijkej. Sano yejua kinekiya uajkisas amanaman pampa okitak ika toTEKO yocastigaroj.
21 On rey Uzías onokau leproso hasta on tonajli ijkuak omik. Yejua ochantik sa iselti ipan ichan niman xok okauilijkej ma kalaki ipan iueyitiopan toTEKO. Jotán, ikoneu, onokau ipan on palacio niman otlamandaroj ipan on país.
22 On okseki tlajtlamach yejuan onochiu ijkuak Uzías tlamandarouaya, desde ipeuyan hasta itlamiyan okijkuiloj on tlajkuilojketl Isaías, ikoneu Amoz. 23 Ijkuak Uzías omik, okitôkakej iuan iachtojtajuan ipan sen campo yejuan onkaj nisiu kampa kintôkaj on reyes, pero xokitôkakej iuan on reyes pampa yejua kipiyaya lepra. Kemaj Jotam, ikoneu, kej yejua okalak rey.