Josías otlamandaroj ne Judá
22
Josías kipiyaya chikueyi xipan ijkuak opeu tlamandaroua, niman otlamandaroj 31 xipan ne Jerusalén. Inanaj itoka katka Jedida, ikoneu Adaía, yejuan uajleuaya Boscat. 2 Josías okichiu tlen kuajli ixpan toTEKO niman okitokak iojui David iuejkatataj. Xkaman okitlalkauij on ojtli.Okinextikej on amamoxtli yejuan kipiya ileyes Dios
3 Ijkuak Josías kipiyaya 18 xipan ika tlamandarouaya, yejua okititlan Safán (on amamoxtlajkuilojketl, ikoneu Azalía, niman ixuiu Mesulam,) ma uiya ipan iueyitiopan toTEKO. Ijkin okijlij: 4
—Xkitati on ueyi tlayekanki tiopixki Hilcías, niman xkijli ma kisentlali on tomin yejuan okiktikej ipan iueyitiopan toTEKO, on tomin yejuan on tsakuijlotlapojkej okiselikej intech on tlakamej. 5 Xnauati ika on tomin ma kinmakakan on yejuan kiyekanaj on tekitl, para kintlaxtlauiliskej on tekitkej yejuan kuektlaliaj iueyitiopan toTEKO. 6 Ma kintlaxtlauilikan on kojxinkej, kalchijkej, on texinkej, niman ma kouakan on kojtli niman temej para kuektlaliskej iueyitiopan toTEKO. 7 Pampa on yejuan kiyekanaj on tekitl xtlaixpachouaj, xnoneki tikintlajtoltis kech kipiyaj on tomin.
8 On ueyi tlayekanki tiopixki Hilcías okijlij Safán ika okinextij sen amamoxtli* de on ley ipan iueyitiopan toTEKO". Kemaj okimakak Safán, niman yejua okinomachtij. 9 Niman kemaj Safán okitato on rey Josías para okitlajtlajtouilito. Niman okijlij:
—Motekichiuilijkauan okisentlalijkej nochi on tomin yejuan onkatka ipan iueyitiopan toTEKO, niman okinmakakej on tlayekankej yejuan kinyekanaj on tekitkej ipan iueyitiopan toTEKO.
10 Kemaj Safán okitlajtlajtouilij on rey ika on tiopixki Hilcías okinextij sen amamoxtli* ne ipan iueyitiopan toTEKO, niman Safán okinomachtij ixpan on rey. 11 Ijkuak on rey okak tlen kijtoua on amamoxtli* de tlanauatiltin, okitsayan itekiuajtlaken pampa onomojtij. 12 Kemaj okimakak sen tlanauatijli on tiopixki Hilcías, Ahicam ikoneu Safán, Acbar ikoneu Micaías, Safán on amamoxtlajkuilojketl, niman Asaías iueyitekitkau on rey, 13 niman ijkin okimijli:
—Xuiyan niman xtlajtoltikan toTEKO nopampa, ipampa on chanejkej niman ipampa nochi Judá ika on tlajtoltin yejuan otiknextijkej ipan in amamoxtli*. Nesi ika toTEKO sanoyej kualani touan tejuamej pampa touejkatajuan xokintlakamatkej on tlajtoltin de in amamoxtli*; xokichijkej nochi on tlanauatijli.
14 Ijki tej, on tiopixki Hilcías, Ahicam, Acbor, Safán niman Asaías oyajkej okitlajtoltitoj on siuatiotlajtojketl Hulda yejuan chantiya ipan on barrio yenkuik de Jerusalén. Hulda yejua isiuau katka on tlakatl itoka Salum. (Salum itajtaj katka Ticva, niman iauelo katka Harhas.) Niman Salum yejua kicuidarouaya on tlakentin uejueyakej ne ipan on ueyitiopan. 15 Hulda okinmijlij:
—Ijkin kijtoua toTEKO, Dios de Israel: Ijkin xkijlikan on tlakatl yejuan omechajtitlan: 16 Ijkin kijtoua toTEKO: "Nejua niktitlanis ne ipan Jerusalén niman ipan on chanejkej sen ueyi castigo ken tlajkuilolnestikaj ipan on amamoxtli* yejuan okinomachtij on rey de Judá. 17 Ijkon nikchiuas pampa yejuamej onechtlalkauijkej niman kitlatiaj kopajli para oksekimej dioses. Yejuamej onechkualanijkej ika on miyek ídolos yejuan okinmachijchijkej. Yejua ika, sanoyej yonikualan intechkopa niman xkaman nitlauelseuis. 18 Xkijlikan on rey de Judá yejuan omechajtitlan para onenkitlajtoltikoj toTEKO: 'MoTEKO yejuan iDios Israel ijkin kijtoua: Pampa otikak on tlajtojli yejuan tlajkuilolnestikaj ipan on amamoxtli, 19 niman pampa moyojlo onokuep niman onoknelij ixpan toTEKO, ijkuak otikak on tlen onikijtoj itechkopa Jerusalén niman ichanejkauan ika mechpopoloskej, niman pampa otiktsayan motekiuajtlaken niman otichokak nixpan, nejua yonimitskak, kijtoua moTEKO. 20 Yejua ika tej, xtikitas on temojtij castigo yejuan nikuajkis ipan Jerusalén. Yej timikis ikan yolseuilistli niman tomoseuis iuan mouejkatajuan.' "
Kemaj on tlakamej onokuepkej niman okitlajtlatouilijkej on rey tlen on siuatiotlajtojketl okijtoj.