Manasés otlamandaroj ne Judá
21
Manasés kipiyaya majtlaktli uan ome xipan ijkuak opeu tlamandaroua ne Judá, niman otlamandaroj 55 xipan ne Jerusalén. Inanaj itoka katka Hepsiba. 2 Pero okichiu tlen xkuajli ixpan toTEKO, pampa no okichiu on tlen sanoyej tetlajyeloj* no ijki ken kichiuayaj on chanejkej ipan on naciones yejuan toTEKO okinkixtij imixpan on israelitas. 3 Oksejpa okinchijchiu on tiopanmej pipitikej kampa kimauistiliayaj idolos ne ikuapan tepetsitsimej, yejuan Ezequías, itataj okinxoxotonijka. Okinchijchiu on tlaixpanmej* para Baal niman okichijchiu sen ixneskayotl de on diosa Asera ipan sen kojtli, ken okichijchijka Acab, rey de Israel. No onotlakuantelkets inmixpan nochimej on sitlalimej yejuan onkaj ipan cielo, niman okinmauistilij. 4 Okinchijchiu tlaixpanmej para okseki dioses ipan iueyitiopan toTEKO, kampa toTEKO okijtojka ika itokatsin kitocaroua kitlakaitaskej ne Jerusalén. 5 Okinchijchiu oksekimej tlaixpanmej* ipan on ome iueyitiopan kiauak toTEKO para on sitlalimej.6 Niman no okitemakak ikoneu ken uentli yejuan tlatla, niman okinnots on ajakamej niman okichiu on tetlatejtemouilistli, niman okintlakeu on yejuan kinnotsaj ajakamej para kimatis tlinon nochiuas niman yejuan tenaualuiyaj. On tlen okichiu sanoyej xkuajli ixpan toTEKO niman ijkon sanoyej okikualanij. 7 No okitlalij sen kojtli* yejuan kipiyaya ixneskayo on diosa Asera ipan iueyitiopan toTEKO, kampa toTEKO okijlijka David niman Salomón, ikoneu: “In ueyitiopan nikan Jerusalén, yejua yoniktlapejpenij intech nochimej inueyitlalpanuan on tribus* de Israel. Yejua yes para nochipa kampa notokatsin kitlakaitaskej. 8 Tla kichiuaj niman kitlakamatij nochi on tlen yonikinnauatij, niman nochi on tlamachtiltin yejuan okinmakak Moisés notekitkau, xok kaman nikinkixtis on israelitas ipan on tlajli yejuan onikinmakak iminachtojtajuan."
9 Pero yejuamej xokinekkej okakkej. Yej Manasés okichiu más ma kichiuakan tlen sanoyej xkuajli xken on tlen okichijkej on chanejkej ipan on naciones yejuan toTEKO okimpopoloj inmixpan on israelitas. 10 Yejua ika, toTEKO otlajtoj intechkopa on itekitkauan tiotlajtojkej, niman okijtoj: 11 “Pampa Manasés okichiu tlen sanoyej tetlajyeloj* , niman pampa ixompayejyeualis más sanoyej miyek xken on amorreos yejuan onenkej achtoj de yejua, niman pampa okichiu para Judá ma tlajtlako ika iídolos, 12 nejua, iminTEKO Dios on israelitas nikijtoua: "Nikuajtitlanis tlen sanoyej xkuajli niman temojtij ipan Jerusalén niman Judá. On yejuan kikakiskej, nomojtiskej, niman kimojkakakiskej hasta kinnakaskokos. 13 Nicastigaros Jerusalén sano ika on castigo yejuan onikchiuilij Samaria niman iuejkakoneuan Acab. Nikauas chipauak nochi tlakatl de Jerusalén ken kichipauaj sen plato ijkuak kipajpakaj niman kemaj kixakamanaj. 14 Niman notlapejpeniluan yejuan nokauaj ipan on tlajli, nikintlalkauis niman nikintemaktilis intech intlauelikniuan, para yejuamej ma kinmajsikan niman ma kinkuilikan tlen iminyaxka. 15 Ijkin nikchiuas pampa okichijkej tlen xkuajli nixpan, niman nechkualanijtokej desde on tonajli ijkuak iminachtojtajuan okiskej Egipto hasta aman.”
16 *Aparte de on tlajtlakojli yejuan Manasés okichiualtij ma kichiuakan on chanejkej Judá ixpan toTEKO, no ijki sanoyej miyek tlakatl okimiktij ne Jerusalén yejuan xkipiya tlajtlakojli. Iminyesyo sanoyej miyek tentoya ipan on ueyikalpan Jerusalén de se lado hasta on okse lado. 17 Nochi on tlajtlamach* yejuan okichiu Manasés niman on tlajtlakoltin yejuan okichiu, tlajkuilolnestikaj ipan on amamoxtli* kampa tlajkuilolnestikaj iminnemilis on reyes de Judá. 18 Ijkuak omik, okitôkakej ipan ixochitlan on palacio, ipan on xochitlan de Uza. Sakin Amón, ikoneu, onochiu rey.
Amón otlamandaroj ne Judá
19 Amón kipiyaya 22 xipan ijkuak opeu tlamandaroua, niman otlamandaroj ome xipan ne Jerusalén. Inanaj itoka katka Mesulemet, ichpoch Hazur de Jotba. 20 Pero on tlen okichiu, sanoyej xkuajli ixpan toTEKO, ken okichiu Manasés itataj. 21 Okitokak on xkuajli ojtli yejuan okitokak itataj. Onotlakuantelkets niman okinmauistilij sano yejuamej on ídolos yejuan itataj okinmauistilij. 22 Okitlalkauij iminTEKO Dios iachtojtajuan, niman xokintlakamat itlanauatiluan.
23 Itlapeliuikauan Amón okitlajtouilijkej kimiktiskej, niman okimiktijkej ipan ipalacio. 24 Pero on tlakamej ompa chanejkej ne Judá okinmiktijkej on yejuan okitlajtouilijkaj on rey Amón. Niman Josías, on ikoneu yejua okitenejkej para otlamandaroj.