Ezequías okualok pero opajtik
20
Ipan on tonaltin, Ezequías temojtij okualok, niman on tiotlajtojketl Isaías, ikoneu Amoz, oyaj okitato, niman okijlij:—ToTEKO kijtoua: Kuajli xtlatlajtlali ipan mochan para mofamilia, pampa tejua xok tipajtis, yej timikis.
2 Ezequías onokuep kampaka onkaj tepantli niman ijkin onoueyikatsajtsilij: 3 "NoTEKO, xnechelnamiki ika nejua nochipa onimitstekipanoj ika nochi noyojlo niman onikchiu tlen kuajli mixpan." Niman Ezequías oajmankachokak.
4 Pero ijkuak Isaías xe onkisaya ikiauak on palacio, toTEKO okijlij: 5 "Xmokuepa niman xkijli Ezequías, ueyitlayekanki itech notlapejpeniluan: ‘ToTEKO, iDios moachtojtajta David kijtoua: Nejua yonikak moueyikatsajtsilis niman yonikitak mixayo. Nimitspajtis, niman ipan yeyi tonajli uelis tias ipan iueyitiopan moTEKO. 6 Nimitsmakas nemilistli 15 xipan más, niman nimitsmanauis tejua niman in ueyikalpan itech on rey de Asiria. Nejua nikmanauis in ueyikalpan Jerusalén pampa onikprometerouilij notekitkau David niman para notlakaitalis.' "
7 Kemaj Isaías otlanauatij ma kichijchiuakan se tlanelojli de higos, niman okalauilijkej on rey ne kampa tlakokojli*, niman on rey opajtik. 8 Kemaj Ezequías okitlajtoltij Isaías:
—¿Tlen neskayotl nikselis ika toTEKO nechpajtis, niman ika ipan yeyi tonajli uelis nias iueyitiopan toTEKO?
9 Isaías okinankilij:
—Xnechijli katlejua neskayotl tikneki para tikmatis ika yejua kichiuas tlen kiprometeroua. ¿Tikneki para on tlaseuajlotl ma noyakatstlali majtlaktli tlacholojli ipan on escalera, noso ma tsinkisa majtlaktli tlacholojli ipan on escalera?
10 Niman Ezequías okinankilij:
—On tlaseuajlotl xouijtikaj* para noyakatstlalis majtlaktli tlacholojli ipan on escalera. Yej kemaj, ouijtikaj para uajtsinkisas majtlaktli tlacholojli ipan on escalera. Tla ijkon, nikneki ma tsinkisa.
11 Kemaj Isaías okiueyikatsajtsilij toTEKO, niman toTEKO okichiu para on tlajseuajlotl ma tsinkisa majtlaktli tlacholojli ipan iescalera Acaz.
Ezequías kinselia on tlakamej yejuan okinuajtitlankej de Babilonia
(2 Cr 32.27-31; Is 39.18)
12 Ipan on tonaltin, on rey Merodac-Baladán, ikoneu Baladán, katka rey ne Babilonia. Yejua okimat ika Ezequías okualok. Yejua ika, okuajtitlan amatlajkuiloltin niman se tetlayokolijli* para Ezequías. 13 Ezequías okinselij on yejuan oualejkej ne Babilonia niman okintitij nochi on tlajtlamach* tlen pajtio yejuan onkaj ipan ipalacio. Okintitij plata, oro, on ajuiyalistli, aceite yejuan más kuajli, niman kampa keuaj imintepos on soldados, niman nochi yejuan onkatka ipan ikaltlayejyeualoyan on palacio. Niman nochiuiyan kampa yejua tlamandarouaya, Ezequías nochi okiteititij. 14 Kemaj Isaías on tiotlajtojketl oyaj okitato on rey Ezequías niman okitlajtoltij:
—¿Kanon oualejkej on tlakamej, niman tlinon omitsijlijkej?
Ezequías okinankilij:
—Oualejkej Babilonia, sen país sanoyej uejka.
15 Isaías okitlajtoltij:
—¿Tlinon otikintitij ipan mopalacio?
Ezequías okinankilij:
—Onikintitij nochi on tlen ompa onkaj. Xitlaj onokau ne kampa nitlayejyeua yejuan nejua xonikintitij.
16 Kemaj Isaías okijlij Ezequías:
—Xkaki in itlajtol toTEKO. 17 Yejkos tonajli ika nochi on yejuan onkaj ipan mopalacio niman nochi on yejuan okisentlalijkaj nemoachtojtajuan hasta ipan in tonalij, kiktiskej ne Babilonia. Nion xitlaj* nokauas. 18 On babilonios no kinuikasej sekimej mouejkakoneuan niman kinkuepaskej eunucos* para tekitiskej ipan ipalacio on rey de Babilonia.
19 Ezequías okinemilij:
—Chika nejua ninemi onyas yolseuilistli niman temanauilistli.
Yejua ika Ezequías okinankilij Isaías:
—On itlajtol toTEKO yejuan tinechijlia melauak kuajli para nejua. Nikita ika onyas yolseuilistli chika ninemi."
20 On okseki tlajtlamach* yejuan okichiu on rey Ezequías niman ika okichijchiu sen ueyi pila para atl niman sen tlakoyonijli para apantli yejuan ika okiktik atl ipan on ueyikalpan, tlajkuilolnestikaj ipan amamoxtli* kampa tlajkuilolnestikaj iminnemilis on reyes de Judá. 21 Ijkuak Ezequías omik, okitôkakej iuan iachtojtajuan, niman Manasés on ikoneu yejua okalak rey.