Isaías yejua tiotlajtolketl katka itech Ezequías
(2 Cr 32.20-23; Is 37.1-38)
19
Ijkuak on rey Ezequías ijkon okak, okitetsayan itekiuajtlaken, pampa sanoyej onajman, okitlalij iajmankatlaken niman oyaj ipan iueyitiopan toTEKO. 2 Ezequías okititlan Eliaquim, on ueyitekitlayekanki ipan on palacio, Sebna on amamoxtlajkuilojketl, niman on más ueyi tlayekanki tiopixki para otlajtotoj iuan on tiotlajtojketl Isaías ikoneu Amoz. Yejuamej onotlakentijkej ika iminajmankatlaken. 3 Niman okijlijkej: "Ezequías kijtoua: 'In sen tonajli de ajmantli, sen tonajli de castigo niman pinaualistli, ken ijkuak sen siuatl xok kipiya fuerza para kitlakatilis ikonetsin. 4 Kas nemoTEKO Dios yokak on tlajtoltin de on tlapaleuijketl yejuan okuatitlan iteko, on rey de Asiria, ika okuijuikaltij Dios yejuan nochipa nemi. Yej, toTEKO ma castigaro on tlapaleuijketl. Aman xchiua oración impampa on chanejkej yejuan sanken* onokajkej ikan nemilistli.' "5 Ijkuak on itlapeliuikauan Ezequías otlajtotoj iuan Isaías, 6 Isaías okinmijlij: "Xkijli moteko Ezequías in tlajtoltin: ToTEKO kijtoua: 'Maka xmomojtikan ika on tlajtoltin yejuan kijtouaj on itlapeliuikauan on rey de Asiria yejuan ika onechpijpinauijkej. 7 Nejua nikchiuas para nomotis ijkuak kakis on tlen temojtij nochiua ipan ipaís. Kemaj nokuepas ipan ipaís niman ompa nikchiuas para ma kimiktikan.' "
8 Ijkuak on tlapaleuijketl asirio okimat ika on rey de Asiria yokiska ipan iueyikalpan Laquis, oyaj de Jerusalén niman okinextito on rey de Asiria kuijsoki on ueyikalpan Libna. 9 Ompa on rey de Asiria okak ika on rey Tirhaca de Etiopía, yokis para kuajuijsokis. Ijkuakon, on rey de Asiria oksejpa okintitlan on tlajtojkamej itech Ezequías on rey de Judá. 10 Okijtoj: “MoDios yejuan tejua tikneltoka, omitsmelajkaijlij ika Jerusalén xuetsis ipan noma, pero maka xmokauili yejua ma mitskajkayaua. 11 Tejua ye tikmatstikaj tlinon on reyes de Asiria yokinchijuilijkej nochimej on países yejuan yokinxoxotonikej. ¿Niman tiknemilia ika tejua timomanauis? 12 ¿On dioses okinmanauijkej on oksekimej uejueyikalpanmej yejuan noachtojtajuan okimpopolojkej: Gozán, Harán, Resef, niman on chanejkej de Bet-edén yejuan chantiyaj ne Talasar? 13 ¿Kanon nemij on reyes de Hamat, Arfad, Serfavaim, Hena niman de Iva?"
14 Ezequías okiselij on amatlajkuilojli yejuan okimakakej on tlajtojkamej, niman okinomachtij. Kemaj Ezequías oyaj ipan on ueyitiopan niman okitlapoj on amatlajkuilojli ixpan toTEKO. 15 Ijkin onoueyikatsajtsilij: "NoTEKO, Dios de Israel, yejuan tikpiya motrono impan on querubines*, tejua niman san tejua tiDios yejuan tikinmandaroj nochi países ipan in tlaltikpaktli. Tejua otikchijchiu cielos niman tlaltikpaktli. 16 NoTEKO nimitsiknotlajtlanilia para xnechkaki. Xkintlapo mixtololojuan, niman xkita in amatlajkuilojli. Xkaki on tlajtoltin yejuan Senaquerib okuajtitlan para mitsuijuikaltia tejua Dios yejuan nochipa nemi. 17 On melauak noTEKO ika on reyes de Asiria okimpopolojkej nochimej on naciones, niman intlaluan. 18 Niman imindioses yokominxinijkej ipan tlitl. Pero melauak yejuamej xnejli dioses, yej tlachijchijtin ikan kojtli* noso ika tetl, yejuan san kinmachijchiuaj on tlakamej. Yejua ika okimpopolojkej. 19 Aman tej, toTEKO niman toDios, xtechmanaui de ipoder, para nochimej on naciones ipan in tlaltikpaktli ma kimatikan ika tejua toTEKO, san tejua tiDios."
20 Kemaj Isaías okititlan sen temachistikektl para ma kijlitij Ezequías: "Ijkin kijtoua toTEKO, Dios de Israel: Nejua yonikak on ueyikatsajtsilistli yejuan otikchiu de Senaquerib rey de Asiria."
21 In yejua on tlajtoltin yejuan okijtoj toTEKO para okixkoijlij on rey de Asiria:
"On iueyikalpan Sión, ken se ichpochtli
yejuan san mitsuejuetskilia, Senaquerib.
Jerusalén kuiuijxoua itsontekon
ijkuak tejua ticholojteua.
22 ¿Akinon on yejuan yotikuijuikaltij
niman tlajmach xkuajli otikteneuilij?
¿Akinon otiktsajtsilij
niman otikitak ikan noueyimatilistli?
¡On nejua yejuan niiyekDios on Israel!
23 Otikintitlan motlajtojkauan para tlamach otinechteneuilij.
"Otimoueyiteneu:
'Oniuajlaj ika miyek carretas de guerra ipan on tepemej uejueyimej,
on yejuan más tlajtlaixko de Líbano.
Onikintsontek on cedros yejuan más uejueyimej,
on pinos yejuan más kualtsitsimej.
Onajsik on kampa sanoyej ouijtikaj
para yakaj kalaki ipan on kojyoj.
24 Ipan on tlalpamej kampa xnochan,
onikinmichkuak atlaltekontin,
niman ompa onikonik atl.
Niman onikinuats nochimej on ríos de Egipto
para nosoldados ouelkej opanokej.'
25 ¿Pero tlen xtikmatiya ika nejua niDios,
yejuan oniktlalij nochi in tlajtlamach*?
Desde yeuejkaui yoniknemilijka nikchiuas
niman aman yonikchiu.
Yejua ika, tejua tikinxoxotonia on uejueyikalpanmej,
niman tejua tikauaya sen olochojli de temej.
26 Ichanejkauan xkojtikej katkaj,
sanoyej nomojtiayaj niman pinauayaj,
ken xojtli selik de ipan on campo,
ken sakatl xoxojki,
ken xojtli yejuan noskaltia ipan kaltlanepantli
yejuan pilini ijkuak xe chikaui ika on totonki ajakatl
yejuan kisa ne ikisayan tonaltsintli.
27 Nejua kuajli nikmatstikaj kampa tinemi,
ijkuak tikisa, ijkuak tiuajkalaki,
niman ken sanoyej tikualani notechkopa.
28 Pampa nikixmati ken sanoyej tikualani niman timoueyimati
nimitstlalilis sen tepospipilojli ipan moyak,
sen freno ipan mokamak,
niman nikchiuas para timokuepas ipan on ojtli kampa tejua otiuajlaj.'
29 "Kemaj Isaías okijlij Ezequías:
"In yejua yes sen señal on yejuan tlinon nochiuas.
In xipan niman on okse xipan uajlau,
nemejuamej nenkikuaskej trigo yejuan san iselti kisa.
Pero ipan yeyi xipan nentlatôkaskej niman nenpixkaskej.
Nenkitôkaskej uvasyoj niman nenkikuaskej on itlakyo.
30 On yejuan xomikkej de itribu* Judá yeskej ken xojtli
yejuan kipiyaskej ineluayouan uejkatlan ipan on tlajli,
niman kitlakitiskej intlakyo.
31 Ijkon nochiuas pampa sekimej tlakamej xmikiskej.
Sekimej nemiskej ne Jerusalén
niman ipan on tepetl Sión.
In yejua kichiuas ika itetlajsojtlalis* toTEKO
yejuan nochi ueli kichiua.
32 “ToTEKO ijkin okijtoj de on rey de Asiria:
‘Yejua xkalakis ne Jerusalén.
Xuelis kimotlas nion se ika itlaminal,
nion xuelis kuijsokis ikan escudos,
nion xuelis kichijchiuas on tlinon uelis ika tlejkos
ipan on ueyi tepantli
yejuan kiyeualtsakutikaj on ueyikalpan.
33 Nokuepas ne Nínive sano ipan on ojtli
kampa ouajlaj.
Xuelis kalakis ipan in ueyikalpan.
Nejua nemoTEKO ijkin nikijtoua.
34 Nejua nikmanauis in ueyikalpan.
Nikmakixtis ipampa notekichiuilijkau David
niman ipampa notetlakaitalis.’”
35 Sano ipan on tlayoua on ángel yejuan toTEKO okuajtitlan oyaj niman okimiktij 185 mil soldados Asirios. Niman uajmostla ijkuak otlanes, ijkuak on soldados yejuan xomikkej otlachixkej, okinnextikej mikatsitsmej nochiuiyan. 36 Kemaj Senaquerib, rey de Asiria, okixoxotonij icampamento niman onokuep ne Nínive. 37 Se tonajli, ijkuak kimauistiliaya idios Nisroc ipan itiopan, ikoneuan Adramelec niman Sarezer okimiktikej ikan iminespadas. Kemaj ocholojtejkej niman oyajkej ipan on región de Ararat. Kemaj Esarhadón yejuan ikoneu Senaquerib onochiu rey.