Ezequías otlamandaroj ne Judá
18
Ijkuak Oseas, ikoneu Ela, kipiyaya yeyi xipan ika tlamandarouaya ne Israel, Ezequías, ikoneu Acaz, opeu tlamandaroua ne Judá. 2 Ezequías kipiyaya 25 xipan, ijkuak opeu tlamandaroua, niman otlamandaroj ne Jerusalén 29 xipan. Inanaj itoka katka Abi, niman tekoneu katka itech Zacarías. 3 On yejuan okichiu Ezequías okipaktij toTEKO, ijkon ken okichiu David iuejkatataj. 4 Yejua tej, okinmejkuanij on tiopanmej pipitikej kampa kimauistiliayaj ídolos ne ikuapan tepetsitsimej. Okintetlajtlapan pipitik on temej yejuan on chanejkej kinmauistiliyaj , niman okintsontsontek on kojtin* kampa nestikatka ixnexkayo on diosa Asera. Niman okitlajtlapan on kouatl de bronce, yejuan Moisés okichijchijka, pampa on israelitas sanken* kitlatiayaj kopajli para kitlakaitayaj niman kitokayotiayaj Nehustán.5 Ezequías okitlalij iyojlo itech toTEKO, on Dios de Israel. Xakaj nemiya ken yejua de nochimej on reyes de Judá achtoj niman sakin* de yejua. 6 Ezequías nochipa okineltokak toTEKO niman xkaman okitlalkauij. Yej nochi okitlakamat on itlanauatiuan toTEKO yejuan okimakaka Moisés. 7 Yejua ika, toTEKO nemiya iuan niman kipaleuiyaya. Nochi tlen kichiuaya kuajli kisaya.
Ezequías xipan okitak on rey de Asiria niman xok okitlakamat yejua. 8 Niman okintlan on filisteos, desde on kalpantsitsimej hasta on uejueyikalpanmej yejuan yeualtsakutokej ikan uejkapan tepantli, niman hasta on ueyikalpan Gaza iuan nochi iueyitlalpanuan.
s Okitlankej Samaria
9 Ijkuak Ezequías kipiyaya naui xipan ika tlamandarouaya, Oseas, ikoneu Ela, kipiyaya chikome xipan ika tlamandarouaya ne Israel. Ipan on xipan, Salmanasar, rey de Asiria, okiyejyeualoj on ueyikalpan Samaria niman okuijsok, 10 niman ipan yeyi xipan okinoyaxkatij*. Ijkuakon, kipiyaya chikuasen xipan ika tlamandarouaya Ezequías, niman kipiyaya chiknaui xipan ika tlamandarouaya Oseas ne Israel. 11 On rey de Asiria okinmajsik on israelitas niman okinuikak ne Asiria. Sekimej okinchantij ne Halah, oksekimej ne ipan on tlalpan Habor, oksekimej ne itech on río Gozan, niman oksekimej ipan inkalpanuan on Medos. 12 ijkin onochiu pampa on israelitas xokitlakamatkej toTEKO Dios. Nion xokitlakaikakej ipacto* toTEKO, niman xokichijkej de nochi on yejuan Moisés, itekitkau toTEKO okinnauatijka. Xokinekkej okakkej, nion okitlakamatkej.
Senaquerib okalak ne Judá
(2 Cr 32.1-19; Is 36.1-22)
13 Ijkuak on rey Ezequías kuikaya majtlaktli uan naui xipan ika tlamandarouaya ne Judá, Senaquerib, on rey de Asiria, oyaj ne Judá para okinuijsokito nochimej on uejueyikalpanmej yejuan yeualtsakutikatkaj ikan tepanchinantli, niman okintlan. 14 Kemaj Ezequías, rey de Judá, okititlanilij sen tlajkuilojli on rey de Asiria yejuan nemiya ne ipan on ueyikalpan Laquis. Ijkin okijlij: "Onikchiu on tlen xkuajli. Makasa xnechuijsoki niman nimitstlaxtlauilis on kech tejua tikijtos".
Kemaj on rey de Asiria okitlajtlanilij Ezequías, rey de Judá ma kitlaxtlauili 9 mil 900 kilos de plata niman 990 kilos de oro. 15 Ezequías okimakak nochi on plata yejuan onkatka ipan iueyitiopan toTEKO, niman on tlen onkatkaj ipan on palacio. 16 No ijki Ezequías okixtilij on oro yejuan okalauilijkaj on tsakuijlomej de on iueyitiopan toTEKO. No okixtilij on oro yejuan okalauilijkaj on kojtin* yejuan ipan salijtokej on tsakuijlomej. Niman kemaj okimakak on rey de Asiria.
17 Kemaj on rey de Asiria, okititlan yeyi uejueyitlayekankej yejuan más uejueyixtokej iminuan on miyekej soldados de Laquis para okixkomakato ika xuelis kixnamikis on rey Ezequías ne Jerusalén. Ijkuak oajsikej ne Jerusalén, onochachantijkej nisiu kampa nojuitia on atl yejuan nomana tlakpakopa de on ojtli yejuan yau neka kampa itoka "Tlapakaloyan ikan Tlakentin". 18 Kemaj okinotskej on rey Ezequías, pero yejua okintitlan yeyimej itlapeliuikauan para okinnamikitoj. Yejua okintitlan Eliaquim, ikoneu Hilcías, yejuan ueyitekitlayekanki katka ipan on palacio, niman Sebna on tlajkuilojketl niman Joa, ikoneu Asaf, on amamoxtlajtojketl. 19 Semej iueyitlayekankau on rey de Asiria okinmijlij:
—Xmachistikan Ezequías ika ijkin kijtoua on ueyixtikaj rey, on rey de Asiria: ¿"Tline tikonmatstikaj tla timomanauis? 20 Motlajtol yejuan tikijtoua xitlaj* kijtosneki ijkuak tikijtoua ika tiuelis tikchiuas guerra nouan. ¿Tikpiya soldados ajsitikaj* para tinechuijsokis? ¿Tlinon itech timoyolchikaua ika tikneki tinechixnamikis? 21 Nikita ika nenyolchikauij itech Egipto. Pero Egipto ken sen bastón tepostekki. Niman on yejuan ompa nokitskia, yej sano yejua ipan ima tlalakis. Ijkon nemi on rey de Egipto, para on yejuan itech noyolchikauaj on rey. 22 Niman tla nemejuamej nenkijtouaj: 'Tejuamej tiktlaliaj toyojlo itech toTEKO Dios, ¿tlen xejua Ezequías otlanauatij para ma tikejkuanikan on tiopanmej pipitikej kampa kimauistiliayaj ídolos ne ikuapan on tepetsitsimej, niman on tlaixpanmej*? ¿Tlen xejua okinnauatij on chanejkej ne Judá niman de Jerusalén san yejua xkueyiteneuakan on Dios ipan tlaixpan* yejuan onkaj nikan Jerusalén? 23 Aman xchiuakan sen pacto* iuan noteko rey de Asiria. Nejua nikprometeroua ika nemechmakas 2 mil caballos tla nenkipiyaskej tlakamej yejuan caballojyetiuij. 24 Nemejuamej xuelis nenkitlaniskej nion siquiera sen tlayekanki de noteko yejuan xkojtik, maski ikan itlapaleuil on Egipto para nenkipiyaskej carretas de guerra niman caballos. 25 ¿Nenkinemilia ika tiuajlaskej para tikxoxotoniskej in país tla nemoTEKO xtechpaleuis? ¡Ka! Tejuamej otiuajlajkej para tikxoxotoniskej in país pampa Dios otechnauatij ma tikchiuakan!"
26 Kemaj Eliaquim ikoneu Hilcías, Sabna niman Joa okijlijkej on tlapaleuijketl:
—Nimitstlajtlanilia, tejua maka xtechnotsa ika on tlajtojli hebreo. Xtechnotsa ika on tlajtojli arameo, pampa tikajsikamatij niman pampa nochimej on yejuan nemij ipan on itepanchinanyo on ueyikalpan yejuamej techkaktokej.
27 Pero on ueyitlayekanki Asirio okijtoj:
—Noteko xsan onechajtitlan para ma nitlajtoki nemouan niman nemoteko. Nejua no nikiminnotsa nochimej yejuan nikan nemij ipan on tepanchinantli, pampa yejuamej ijkon ken tejua ika onkaj kikuaskej niman koniskej imintlapias.
28 Kemaj yejua onotelkets niman otlajtoj chikauak ika on tlajtojli hebreo:
—Xkakikan in tlen kijtoua on rey de Asiria. 29 Maka ma mechkajkayaua Ezequías. Yejua xuelis mechmakixtis. 30 Maka xkauili Ezequías ma mechtlaneltokti ika nemoTEKO mechmakixtis ijkuak mechijlia: “ToTEKO techmakixtis. On rey de Asiria xkitlanis toueyikalpan.” 31 Maka xkakikan Ezequías. On rey de Asiria ijkin kijtoua: "Xmotemakakan notech niman ma tikchiuakan sen yolseuilistli. Tla ijkon, cada se de nemejuamej uelis kikuas de ihiguera* niman de iuvas, niman konis atl yejuan onkaj ipan iatlaltekon. 32 Más sakin nemechuikas hasta okse país yejuan sa no ijki ken in país. Ipan on país onkaj trigo para nenkichichiuskej pan, niman onkaj uvas para nenkichichiuaskej vino. Ipan on tlalpan onkaj aceite de olivos niman nekutli. Kemaj nenueliskej nenchantiskej kuajli niman no xnenmikiskej. Pero maka xkakikan Ezequías. Yejua kineki mechkajkayauas, ijkuak kijtoua: "ToTEKO techmakixtis". 33 ¿Tlen manin yakaj de on dioses de oksekimej naciones ouel okimanauij ipaís de imak on rey de Asiria? ¡Ka! 34 ¿Kanon nemij on dioses de Hamat niman de Arfa? ¿Kanon nemij on dioses de Sefarvaim, Hena niman Iva? ¿Tlen ouelkej okimanauijkej Samaria itech ipoder Asiria? 35 ¿Katlejua de nochimej on dioses de on países ouel onomanauijkej itech ipoder on rey de Asiria? ¿Nemejuamej nenkinemiliaj ika nemoTEKO kixtis nomak Jerusalén?
36 Pero on chanejkej xonauatkej niman xotenankilijkej nion se tlajtojli, pampa on rey yotlanauatijka: "Maka nenkinankiliskej". 37 Kemaj Eliaquim, ikoneu Hilcías, yejuan ueyitekitlayekanki ipan on palacio, niman Sebna on amamoxtlajkuilojketl, niman Joa, ikoneu Asaf, yejuan amatlajkuilojketl oyajkej okitatoj Ezequías. Oajsikej hasta ixpan ika intlakeuan tsajtsayankej ipampa iminajmanalis niman okitlajtlajtouilijkej on rey on tlen yokijtojka on ueyitlayekanketl asirio.