Oseas otlamandaroj ne Israel
17
Ijkuak Acaz kipiyaya majtlaktli uan ome xipan ika tlamandarouaya ne Judá, Oseas, ikoneu Ela, opeu tlamandaroua ipan Israel, niman rey katka chiknaui xipan ne Samaria. 2 Pero okichiu tlen xkuajli ixpan toTEKO, maski xsanoyej ken okichijkej on reyes yejuan achtoj nemiyaj ijkuak yejua xe tlamandaroua ne Israel.3 Salmanasar, rey de Asiria, okuijsok niman okitlan Oseas, niman onochiu itekitkau niman kitlaxtlauaya impuestos cada xipan. 4 Pero ipan se tonajli, Oseas xok okitlaxtlauilij Salmanasar on impuestos yejuan kitlaxtlauaya cada xipan, niman okintitlanka tlajtojkamej itech So on rey de Egipto para yejua kipaleuis. Ijkuak Salmanasar okimat ika Oseas xok kinekiya kitlakamatis, otlanauatij ma kasikan niman ma kitsakuakan. 5 Kemaj, Salmanasar okalak ipan nochi on país niman okuijsok Samaria yeyi xipan. 6 Niman ijkuak Oseas kipiyaya chiknaui xipan ika otlamandaroj, on rey de Asiria okinoyaxkatij* Samaria. Okinmajsikej on israelitas niman okinuikakej ne Asiria. Ompa okinchantij ipan on ueyikalpan Halah, ipan on región de Habor, nisiu on río de Gozán, niman ipan iminuejueyikalpanuan on país de Media.
7 Yejua in onochiu pampa on israelitas otlajtlakojkej itech iminTEKO Dios, yejuan okinkixtij Egipto, niman okinmanauij imak on rey de Egipto. Yejuamej okinmauistilijkej oksekimej dioses, 8 ijkon ken kichiuayaj on naciones yejuan toTEKO okinkixtij imintech. Niman no nouikayaj ijki kenon yejuan kichiuayaj on reyes de Israel.
9 On israelitas no ichtaka okichijkej tlajtlamach* tlen xkuajli itech iminTEKO Dios. Yejuamej okichijchijkej on tiopanmej pipitikej kampa kimauistiliayaj idolos ipan nochimej uejueyikalpanmej, desde on kalpantsitsimej hasta on uejueyikalpanmej yejuan yeualtsakutokej ikan uejkapan tepantli. 10 No okintelketskej temej tlatiochijtin, niman ixneskayomej de on diosa Asera ipan ikuapan nochimej tepetsitsimej, niman tlatsintlan de nochi kojtli* yejuan mayeualtikej. 11 Niman ijkon ken kichiuayaj on naciones yejuan toTEKO okinkixtij imintech yejuamej, okitlatijkej kopajli ipan nochimej on tiopanmej pipitikej kampa kinmauistiliayaj ídolos ikuapan on tepetsitsimej. Yejuamej okichijkej miyek tlajtlamach* tlen xkuajli, niman ijkon okikualanijkej toTEKO. 12 Okinmauistilijkej ídolos, maski okinmelajkaijlijka toTEKO maka ma kichiuakan.
13 Intechkopa nochimej on tiotlajtojkej niman tetlatejtemouilijkej, toTEKO okinachtojijlijka. Yokinmijlijka ma nokuepakan ipan on kuajli ojtli. Ma nouikakan ipan itlanauatiluan niman ileyes ipan nochi on tlamachtijli yejuan yejua okinmakak iminachtojtajuan intechkopa on tiotlajtojkej itekitkauan. 14 Pero yejuamej xokinekkej okakkej. Yej sanoyej yoltechikajkej katkaj ken iminachtojtajuan, yejuan xokitlakamatkej iminTEKO Dios ika nochi iminyojlo. 15 Okichichijkej ileyes, niman on pacto* yejuan okichijka inuan iminachtojtajuan, maski yejua okinachtojijlijka ika kintlayouiltis tla xkitlakamatij ileyes. Niman okinmauistilijkej on ídolos yejuan xitlaj* ueyikijtosnekij. Yejua ika yejuamej no xitlaj* ueyikijtosnekij. Niman onouikakej kenon okseki naciones nouikayaj yejuan onkatkaj nijnisiu, maski toTeko okinmandaroj maka ma kichiuakan. 16 Okintlalkauijkej nochi itlanauatiluan iminTEKO Dios, niman okinochijchiuilijkej ome becerro de oro para kinmanistiliskej. Yejuamej no okinochijchiuilijkej sen ixneskayo de on diosa Asera niman okinmauistilijkej nochimej on sitlalimej yejuan onkaj ipan cielo niman on ídolo Baal. 17 No okintlatijkej iminkoneuan tlakamej niman siuamej ken uentli, niman otetonalitakej, okichijkej nauajlotl niman nochi tlen sanoyej xkuajli ixpan toTEKO. Ijki okichijkej sanoyej ma kualani toTEKO.
18 Yejua ika tej, toTEKO sanoyej okualan itechkopa Israel niman okinkixtij itech. Sa okau itribu* Judá. 19 Pero ichanekauan Judá no xonouikakej itech itlanauatiluan iminTEKO Dios. Yej, no ijki okichijkej on tlen okichijkej ichanekauan Israel. 20 Kemaj toTEKO okintlalkauij nochimej iminuejkakoneuan on israelitas niman okintlajyouiltij. Okintemaktilij intech on yejuan tetlachtekiliaj, niman toTEKO okintlalkaui on israelitas. 21 Ijkuak toTEKO okixeloj Israel de itech ifamilia David, yejuamej okitenejkej para iminrey Jeroboam, ikoneu Nabat. Niman Jeroboam I okichiu para on israelitas ma kitlalkauikan toTEKO niman sanoyej ma tlajtlakokan. 22 Ijkon tej, on israelitas okichijkej nochi on tlajtlakoltin yejuan okichiu Jeroboán, 23 hasta kaman toTEKO okintlalkauij, ken yejua okinachtojijlijka kichiuaskia intechkopa nochimej on tiotlajtojkej itekitkauan. Yejua ijka, on israelitas okinmajsikej niman okinuikakej Asiria, kampa nemij hasta aman.
On tlakamej de Asiria okinoyaxkatijkej Samaria
24 On rey de Asiria okinuikak on tlakamej de Babilonia, Cuta, Ava, Hamat niman Sefarvaim, niman okinchantij impan on uejueyikalpanmej de Samaria kampa on israelitas okinkixtij. Ijki okinoyaxkatijkej Samaria niman ochantikej ipan iuejueyikalpanuan. 25 Ijkuak in tlakamej opeu ompa nochantiaj, xkimauistiliayaj toTEKO. Yejua ika, toTEKO okinuajtitlanilij leones yejuan okinmiktijkej keskimej de yejuamej. 26 Kemaj yakaj okijlito on rey de Asiria: “On tlakamej yejuan yotikinuikak ipan on iuejueyikalpanuan Samaria para ompa ma nochantikan, xkimatij tlinon kineki on Dios de on país, niman pampa xkimatij, yejua yokinuajtitlanilij leones, yejuan ye kinmiktijtokej.”
27 Ijkin tej, otlanauatij on rey de Asiria: “Xtitlanikan se de on tiopixkej yejuan onenkajsijkej niman onenkuajuikakej, para ompa ma uiya, ma chantiti niman ma kintiti on tlen kineki on Dios de on país."
28 Kemaj se de on tiopixkej yejuan yejuamej okinkixtikaj Samaria, oyaj niman onochantij Betel. Niman okintitij kenijki kimauistiliskej toTEKO. 29 Pero on tlakamej de cada nación okinochijchiuilij iminídolos ipan on ueyikalpan kampa chantiyaj. Niman okintlalijkej ipan on tiopanmej pipitikej kampa on israelitas okichijchikej niman kimauistiliayaj ídolos ne ikuapan on tepetsitsimej. 30 On yejuan de Babilonia okichijchijkej sen ixneskayo Sucot-benot, on yejuan de Cuta okichijchijkej sen ixneskayo Nergal, niman on yejuan de Hamat okichijchijkej sen ixneskayo Asima, 31 niman on yejuan de Ava okichijchijkej sen ixneskayo Nibhaz niman se de Tartac, niman on yejuan de Sefarvaim kintlatiayaj iminkoneuan ken uentli para Adramelec niman Anamelec, imindioses. 32 Niman no kimauistiliayaj toTEKO. Pero okintenejkej tiopixkej sano intech yejuamej para ma tekitikan ipan on tiopanmej pipitikej kampa kinmauistiliayaj ídolos ne ikuapan tepetsitsimej. 33 Ijki tej, maski kimauistiliayaj toTEKO, sanken* kimauistiliayaj yejuamej imindioses, ijkon ken nouikayaj ipan on naciones kampa okinkixtijkej.
34 Aman sanken* ijki kichiuaj ken achtoj kichiuayaj, pampa xkimauistiliaj toTEKO ken kitocaroua, nion okitlakamatkej ileyes niman itlanauatiluan nion ipan on tlamachtiltin yejuan toTEKO otlanauatij ma kintlakamatikan on iuejkakoneuan Jacob, yejuan okitokayotij Israel. 35 Ijkuak toTEKO okichiu sen pacto* iminuan on israelitas, okinnauatij: “Maka xkinmauistilikan oksekimej dioses, nion maka intech xmotlakuantelketsakan, nion maka xkintekipanokan, nion maka xkinmakakan uentin. 36 San xnechmauistilikan nejua, nemoTEKO Dios, yejuan onemechkixtij Egipto ikan ueyi poder. San nejua noneki notech nemotlakuantelketsaskej, niman nenechmauistiliskej niman nennechmakaskej uentin. 37 Niman no xmouikakan ika nochi nemoyojlo ipan noleyes niman notlanauatiluan, niman tlamachtiltin yejuan yonemechtlajkuilolmakak, niman maka xkinmauistilikan oksekimej dioses. 38 Maka xkelkauakan on pacto* yejuan onikchiu nemouan, nion maka xkinmauistilikan oksekimej dioses. 39 Yej, san xnechmauistilikan nejua nemoTEKO Dios, niman nejua nemechmanauis inmak nemotlauelikniuan.”