Acaz otlamandaroj ne Judá
16
Ijkuak Pecah, ikoneu Remalías, kipiyaya 17 xipan ika tlamandarouaya ken rey, Acaz, ikoneu Jotam, opeu tlamandaroua ken rey ne Judá. 2 Kipiyaya 20 xipan ijkuak opeu tlamandaroua, niman otlamandaroj ne Jerusalén 16 xipan. Pero okichiu tlen xkuajli ixpan iTEKO Dios, xijki ken kuajli okichiu David iachtojtata. 3 Yej okichiu no ijki ken okichijkej on reyes de Israel. Yejua hasta okitlatij ikoneu ken sen uentli yejuan nochi tlatla. Ijkon okichiu on tlen sanoyej tetlajyeloj no ijki ken okichijkej on naciones yejuan toTEKO okinkixtij intech on israelitas. 4 Niman no otlauentlalij niman kitlatiaya kopajli ipan on tiopamej pipitikej kampa kinmauistiliayaj idolos, niman ipan tepetsitsimej, niman tlatsintlan de nochi on kojtin yejuan mayeualtikej.5 Ipan on tonaltin, Rezín, rey de Siria, niman Pecah, ikoneu Remalías, yejuan rey de Israel, oyajkej Jerusalén para okuijsokitoj on rey Acaz. Okiyejyeualojkej Jerusalén, pero xouel okalakkej ipan on ueyikalpan. 6 (Ipan on tonaltin on rey de Edom okinoyaxkatij on ueyikalpan Elat, niman okinkixtij on yejuan ualeuaj Juda. Kemaj on edomitas oajsikej niman ompa ochantikej hasta aman.)
7 Kemaj Acaz okintitlan sekimej tlajtojkamej itech Tiglat-pileser, rey de Asiria, para ma kijlikan: "Nejua nimotekitkau ken sen mokoneu yeskia. Yejua ika tej, xuajla xnechmanauiki de on rey de Siria niman de on rey de Israel, yejuan nechuijsoktokej.”
8 Acaz no okikuik, on plata niman oro yejuan onkatka ipan iueyitiopan toTEKO niman ipan itesoros on palacio, niman okititlan ken tetlayokolijli* para on rey de Asiria, 9 Tiglat-pileser okichiu tlen okitlajtlanilij. Okuijsok niman okitlan on ueyikalpan Damasco. Kemaj okimiktij Rezín, niman on chanejkej okinmajsik niman okinuikak ne Quir.
10 Ijkuak on rey Acaz oyaj Damasco para iuan nosentlalis Tiglat-pileser rey de Asiria, okitak on tlaixpan* yejuan ompa onkatka. Kemaj okititlanilij on tiopixki Urías sen amatl kampa nestiaya nochi ken tlachijchijtli on tlaixpan*. 11 Urías okichijchiu on tlaixpan* ijkon ken onkatka ipan on amatl yejuan on rey Acaz okititlanilij desde Damasco. Niman ijkuak on rey Acaz onokuep de Damasco, Urías yotlanka kichijchiua on tlaixpan*.
12 Ijkuak oajsik on rey de Damasco niman okitak on tlaixpan*, okinisiuij niman ipan otlauentlalij. 13 Okiuentlalij iuen yejuan nochi tlatla niman iuen de harina yejuan más kuajli, niman okitotoyau ipan on tlaixpan* iuen de vino, niman okitotoyau ipan on tlaixpan* on yestli de on uentli de yoltlalilistli.
14 Sakin on tlaixpan* de bronce yejuan onkatka ixpan on iueyitiopan toTEKO, Acaz okixtij de ompa niman okitlalij kampaka norte ika de on yenkuik tlaixpan*, pampa nokauaya itlajkotian de on tlaixpan* yenkuik niman iueyitiopan toTEKO. 15 Sakin okinauatij on tiopixki Urías ika ipan on tlaixpan* yejuan yenkuik, niman ueyi ma kiuentlali on uentli yejuan nochi tlatla yejuan kitemakaj kualkan, niman on uentin de harina yejuan más kuajli yejuan kitemakaj tiotlak. No ijki ma kitemaka on uentli yejuan nochi tlatla niman de harina yejuan más kuajli yejuan kitemaka on rey, niman on uentli yejuan tlatla niman de harina yejuan más kuajli yejuan kitemakaj nochimej on chanejkej. No okijlij ma kitotoyaua ipan on tlaixpan* nochi on yestli de on uentli yejuan nochi tlatla niman de on oksekimej yolkej yejuan okinmiktijkej. Pero ika on tlaixpan* de bronce yes san para ijkuak yejua kinotsas toTEKO para kimatis tlinon kineki kichiuas.
16 On tiopixki Urías okichiu nochi on tlen okinauatij on rey Acaz. 17 Kemaj on rey Acaz okinxoxotonij on carretas de bronce yejuan kintekitiltiayaj ipan on ueyitiopan, niman okinkixtij on iminajpastsitsiuan. No ijki, okejkuanij on ueyi ajpastli ne impan on uakaxtin de bronce kampa on tiopixkej kixtiaj atl para nomapajpakaj, niman okitlalij ipan sen patlauak tetl. 18 Niman para okipaktij on rey de Asiria, okixtij ipan iueyitiopan toTEKO on ixpankajkal yejuan okichijchijka para kitekitiltiaj ipan on tonajli sábado, niman on tsakuijlotl yejuan okitlalijkej kiauak kampa san kalakiya on rey.