Elías otlejkok iluikak
2
Ijkuak oajsik on tonajli para toTEKO kuikas Elías ipan iluikak ipan sen ajkomalakotl, Elías niman Eliseo okiskej ne Gilgal. 2 Niman ipan iminojui Elías okijlij Eliseo:—Nikan xmokaua, pampa toTEKO yonechtitlan Betel.
Pero Eliseo okinankilij:
—Ijkon ken melauak nemi toTEKO niman tejua tinemi, nimitstlajtolmaka ika xnimitskauas.
Kemaj oyajkej san sekan hasta Betel. 3 On tiotlajtojkej yejuan chantiyaj Betel okinamikikoj Eliseo niman okitlajtoltijkej:
—¿Tikmatstikaj ika aman toTEKO mitskuilis motemachtijkau?
Eliseo okinnankijlij:
— Kemaj, ye nikmatstikaj, pero nemejuamej maka itlaj xkijtokan.
4 Sakin Elías okijlij Eliseo:
—Nikan xmokaua, pampa toTEKO yonechtitlan Jericó.
Pero Eliseo okinankilij.
—Ijkon ken melauak nemi toTEKO niman tejua tinemi, nimitstlajtolmaka ika xnimitskauas.
Kemaj oyajkej san sekan hasta Jericó.
5 On tiotlajtojkej yejuan chantiyaj ne Jericó okinamikikoj Eliseo niman okitlajtoltijkej:
—¿Tikmatstikaj ika aman toTEKO mitskuilis motemachtijkau?
Eliseo okinnankilij:
—Kemaj, ye nikmatstikaj, pero nemejuamej maka itlaj xkijtokan.
6 Kemaj Elías okijlij Eliseo:
—Nikan xmokaua, pampa toTEKO yonechtitlan neka itech río Jordán.
Pero Eliseo okinankilij
—Ijkon ken melauak nemi toTEKO niman tejua tinemi, nimitstlajtolmaka ika xnimitskauas.
Kemaj oyajkej omemej. 7 Niman 50 tiotlajtojkej no oyajkej niman onoteltijkej uejkatsin kampa Elías niman Eliseo nemiyaj itech on río Jordán. 8 Kemaj Elías okixtij icapa, okimimiloj niman ika okimailij on atl. Kemaj on atl onoxeloj okantipan, niman on omemej okipanokej on río ipan tlajli uaki. 9 Ijkuak yokipanokej, Elías okijlij Eliseo:
—Xnechijli tlinon tikneki ma nikchiua mopampa chika sanken* nikan mouan ninemi.
Eliseo okinankilij:
—Nikneki xnechmaka okpa ichkich on poder yejuan tikpiya ipan moespíritu.
10 Elías okijtoj:
— Sanoyej miyek on tlen titlajtlani. Pero tla ueli tinechita ijkuak nejua nechxeloskej mouan, mitsmakaskej on tlen titlajtlani. Pero tla xtinechita, xtikselis.
11 Chika yejuamej yayaj nejnentiayaj niman tlajtlajtojtiayaj, amanaman ouajnes sen carreta yejuan nesiya ken tlikuitiu, iuan caballos yejuan no ken tlikuitiayaj. On carreta niman on caballos okinxeloj Elías iuan Eliseo, niman Elías otlejkok ipan iluikak ipan sen ajkomalakotl. 12 Ijkuak Eliseo okitak, ijkin okitsajtsilij Elías: “¡Notataj, notataj, tejua akin otimochiu ken sanoyej miyek soldado yejuan okinmanauij on israelitas!” Sakin ijkuak ijkin yonochiu, xokaman oksejpa okitak Elías. Kemaj Eliseo okitskij itlaken niman okitsayantiaj okantipan.
Eliseo okichiu itekiu Elías
13 Eliseo okontilan on capa yejuan okuajmaijneu Elías, niman onokuep ne itech on río Jordan niman onoteltij itenko. 14 Kemaj, okimailij on atl ikan icapa Elías, niman ijkin onotlajtoltij: “¿Kanon nemi toTEKO, iDios Elías?”
Ijkuak okimailij on atl, nimantsin ouajnotlajkoxeloj, niman Eliseo oksejpa okipanok on río. 15 On tiotlajtojkej yejuan chanejkej Jericó, yejuan okitakej on tlen okichiu, ijkin okijtojkej: "¡On poder yejuan Elías okipix, aman Eliseo kipiya!”
—Xkita, totsajlan tejuamej motekitkauan, nemij 50 tlakamej yejuan xmojkej. Xkinkauili ma kitejtemotij motemachtijkau. Kas iespíritu Dios okitlejkoltij niman okontlajkal ipan sen tepetl noso ipan sen ixtlauatl.
Pero yejua okijtoj:
—Ka, nemejuamej maka yakaj xtitlanikan.
17 Pero yejuamej sa kijlijtikatkaj, hasta kaman okinkauilij ma kintitlanikan on 50 tlakamej, yejuan okitejtemojkej Elías yeyi tonajli, pero xokinextijkej. 18 Kemaj onokuepkej Jericó kampa onokau Eliseo, niman yejua okinmijlij:
—Nejua onemechijlij para maka xuiyan pampa sannenkaj nenkontejtemoskej.
Eliseo okichipau on amejli yejuan onkaj Jericó
19 On chanejkej ipan on ueyikalpan Jericó oyajkej itech Eliseo niman okijlijkej:
—Xkita ika in ueyikalpan kuajli kampa onkaj, pero on atl xkuajli niman on tlajli xok ueli tlatlakitia.
20 Eliseo okinnankilij:
—Xnechajkuilikan sen uajkajli yenkuik, ikan istatl.
Ijkuak okiktilijkej on uajkajli, 21 Eliseo oyaj itech on amejli niman ompa okonxinij on istatl. Kemaj okijtoj:
—Ijkin kijtoua toTEKO: ‘Nejua yonikchipau in atl, niman xokaman kichiuas ma mikoua nion kichiuas para in tlajli maka ma tlatlakiti.
22 Desde ijkuakon on atl onokau chipauak, ijkon ken okijtoj Eliseo.
23 Sakin Eliseo okis ompa niman oyaj Betel. Ijkuak tlejkouaya ipan on ojtli, keskimej telpokamej chanejkej ipan on ueyikalpan okisakoj niman opeu kipijpinauiyaj. Kitsajtsiliayaj: “¡Xuiya, kuatetsotsol! ¡Xuiya, kuatetsotsol!”