11
ٿي مھارَي نمُونَي تي بو، جھڙَي نمُونَي ھُون مَسيح رَي نمُونَي تي بون ھون۔ڀگتي ۾ ماٿو ڍڪڻ
2 ھُون ٿونرِي بکوڻ ڪرون ھون ڪہ ٿي ھر نمُونَي ݾون مھنَي ياد راکو ھو ھانَ مھارَي ݾيکايوڙَي باتون تي بو ھو۔ 3 ھُون ٿونَي ݾُڻائُون ھون ڪہ ھر ھيڪ مِنک رو مالڪ مَسيح ھَي، لُگائِي رو مالڪ اُوئي رو ڌڻِي ھَي ھانَ مَسيح رو مالڪ ايشوَر ھَي۔ 4 جي ڪو مِنک بِنا ماٿو ڍڪي پراٿنا ڪرَي، جون ايشوَر رو پرچار ڪرَي ھَي، تو او مَسيح رِي بي عِزتي ڪرَي ھَي۔ 5 جي ڪو لُگائِي اُگھاڙَي ماٿَي پراٿنا ڪرَي، جون ايشوَر رو پرچار ڪرَي ھَي، تو او آپرَي ڌڻِي رِي بي عِزتي ڪرَي ھَي۔ اِيئي نمُونَي او باݪ ڪترايوڙِي لُگائِي جھڙِي ھَي۔ 6 جي ڪو لُگائِي آپرَي ماٿَي تي چُنڙِي نِي اوڍَي، تو اُوئي نَي کپَي ڪہ او آپرا باݪ ڪتراوَي۔ پڻ جي لُگائِي را باݪ ڪتراوڻ جون روڏ ڪراوڻ بي عِزتي رِي بات ھَي، تو پَڇي اُوئي رَي ݾارُو ضرُوري ھَي ڪہ او آپرَي ماٿَي تي چُنڙِي اوڍَي۔
7 آڏمي رَي ݾارُو ضرُوري ڪونھي ڪہ او پراٿنا ڪرتي بِݪا آپرو ماٿو ڍڪَي، ڪيونڪہ ايشوَر اُوئي نَي آپرَي رُوپ تي ٺاھيو ھانَ او ايشوَر رِي مھما ظاھر ڪرَي ھَي ھانَ لُگائِي ݾون آڏمي رِي مھما ظاھر ھووَي ھَي۔ 8 ڪيونڪہ پيلڪو آڏمي يعني آدم، لُگائِي ݾون ڪونھي ٺاھيوڙو، پڻ لُگائِي آڏمي ݾون ٺاھيوڙِي ھَي۔ 9 آڏمي، لُگائِي رَي ݾارُو ڪونھي ٺاھيوڙو، پڻ لُگائِي آڏمي رَي ݾارُو ٺاھيوڙِي ھَي۔ 10 ڪيونڪہ فريشتا ڏيکَي پڙيا، اِيئي رَي ڪري لُگائِي نَي کپَي ڪہ او آپرَي ماٿَي تي چُنڙِي اوڍَي، جڪَي ݾون خبر پڙَي ڪہ او آڏمي رَي اِختيار ۾ ھَي۔ 11 پڻ ياد راکو، جڪون رو وِشواس پرڀُو يسُوع تي ھَي اُوئون ۾ نَڪو لُگائِي آڏمي بِنا ڪئين ھَي ھانَ نَڪو آڏمي لُگائِي بِنا ڪئين ھَي۔ 12 ڪيونڪہ جي پيلڪِي لُگائِي يعني حوا، آڏمي ݾون ٺاھيوڙِي ھَي، تو پَڇي آڏمي ڀِي لُگائِي ݾون جنم لَي ھَي ھانَ ھر ھيڪ شئي رو ٺاوڻ آݪو ايشوَر ھَي۔
13 ٿي آپ فيصلو ڪرو، ڪِي اَي جائز ھَي ڪہ لُگائِي بِنا چُنڙِي اوڍي ايشوَر ݾون پراٿنا ڪرَي؟ 14 اَي تو عام بات ھَي ڪہ آڏمي را موٽا باݪ اُوئي رَي ݾارُو بي عِزتي ھَي۔ 15 لُگائِي را موٽا باݪ اُوئي رَي ݾارُو عِزت رِي بات ھَي، ڪيونڪہ اُوئي را باݪ پڙدَي رَي ݾارُو ڏينوڙا ھَي۔ 16 جي ڪُڻ اِيئي رَي بارَي ۾ بَحث ڪرڻ رو ݾوچَي ھَي، تو ھُون رُگو اَي ڪئين ڪہ نَڪو اَي آپڻِي ريت ھَي ھانَ نَڪو ايشوَر رِي مَنڊلِي رِي۔
وِشواسي مَنڊلِي رَي ݾارُو ھدايت
17 ھمَي مھارِي مرضِي ڪونھي ڪہ ھُون ٿونرِي بکوڻ ڪرون، پڻ ھُون ٿونَي ھيڪ ٻيجِي ھدايت ڪرون ھون۔ اِيئون لاگَي ھَي ڪہ جڏي ٿي ڀيڙا ھوئو ھو، تو ٿونرو ڪو ڀِي فائدو ڪونھي ھوتو، پڻ اُلٽو اُوئي رو نُقصون ھووَي ھَي۔ 18 پيلڪِي بات اَي ھَي ڪہ مھَي ݾُڻيو ھَي ڪہ جڏي ٿي مَنڊلِي ۾ ڀيڙا ھوئو ھو، تو ٿونرَي بِچ ۾ پارٽِي بازِي ھووَي ھَي۔ اِيئي بات رو مھنَي ڪئين ڀروسو ڀِي ھَي۔ 19 اَي ضرُور ھَي ڪہ ٿون ۾ پارٽِي بازِي ھووَي، جڪَي ݾون خبر پڙَي ڪہ ڪُڻ ايشوَر رِي نظر ۾ ݾاچو ھَي۔
20 جڏي ٿي پرڀُو يسُوع رِي يادگيرِي آݪِي ٻاٽِي رَي ݾارُو ڀيڙا ھوئو ھو، تو اَي ٻاٽِي يادگيرِي آݪِي ٻاٽِي ھوئي ڪونھي ݾگھتِي، 21 ڪيونڪہ ھر ھيڪ مِنک ٻيجَي رو اِنتظار ڪرڻ بِنا، آپرِي ٻاٽِي کائي جاوَي ھَي، جڪَي رَي ڪري ڪو وِشواسي بُوکو رَي ھَي ھانَ ڪينَي گھڻو پيئڻ رَي ڪري نشو ھووَي ھَي۔ 22 ٿونَي اِيئون نِي ڪرڻ کپَي۔ ڪِي کاوڻ پيئڻ رَي ݾارُو ٿونرا گھر ڪونھي، جون ٿي ايشوَر رِي مَنڊلِي نَي گھٽ ݾمجھو ھو ھانَ جڪَي ڪڍي ڪئين ڪونھي اُوئي نَي شرمائو ھو؟ ھُون ٿونَي ڪِي ڪونھ؟ ڪِي اِيئي بات ۾ ٿونرِي بکوڻ ڪرون؟ ھُون ٿونرِي بکوڻ ڪري ڪونھي ݾگھتو۔
پرڀُو يسُوع رِي يادگيرِي آݪِي ٻاٽِي
23 ڪيونڪہ مھنَي اَي بات پرڀُو يسُوع ݾون ملِي ھانَ مھَي ٿونَي ݾُڻائِي ڪہ جڪِي رات پرڀُو يسُوع جھليجو، تو اُوئي ٻاٽِي لِي 24 ھانَ ايشوَر رو شُڪر ڪري ڀونگِي ھانَ ڪھيو ڪہ، ”اَي مھارو ݾَرير ھَي، جڪو ھُون ٿونرَي ݾارُو ٻَليدون ڪرون ھون۔ مھارِي يادگيرِي ۾ اِيئوج ڪرتا رھيا۔“ 25 اِيئي نمُونَي اُوئي ٻاٽِي کاوڻ ݾون پَڇي پيالو ڀِي ليئو ھانَ ڪھيو ڪہ، ”اَي پيالو، مھارَي لوئِي رو نُوئو وچن ھَي۔ ٿي جڏي ڀِي پيئو، تو مھارِي يادگيرِي ۾ اِيئوج ڪرتا رھيا۔“ 26 ڪيونڪہ ٿي جڏي ڀِي اَي ٻاٽِي کائو ھو ھانَ اَي پيالو پيئو ھو، تو ٿي پرڀُو يسُوع رِي موت رو اِقرار ڪرو ھو، جترِي توڻي او پاڇو نِي آوَي۔
27 اِيئي رَي ڪري جي ڪُڻ لاپرواھي ݾون پرڀُو يسُوع رِي ٻاٽِي کاوَي ھانَ پيالو پيئَي ھَي، تو او پرڀُو يسُوع رَي ݾَرير ھانَ لوئِي رو ڏوھي ھوشَي۔ 28 اِيئي رَي ڪري ھر ھيڪ مِنک اَي ٻاٽِي کاوڻ ھانَ اَي پيالو پيئڻ ݾون پيل آپرو آپنَي پَرکَي۔ 29 ياد راکو، جڪو اَي ٻاٽِي کاوتي بِݪا ھانَ اَي پيالو پيتَي بِݪا، پرڀُو يسُوع رِي مَنڊلِي رِي عِزت ڪونھي ڪرتو، تو اُوئي نَي سزا ملشَي۔ 30 اِيئي رَي ڪري ٿون ۾ تموم گھڻا بيمار ھانَ ڪمزور ھَي، پڻ تموم گھڻا مري ڀِي گيا ھَي۔ 31 جي آپون آپرو آپنَي اوݪکيا ھووَنت، تو سزا ݾون بچي جائُون تو۔ 32 پڻ پرڀُو آپون نَي سزا ڏي ݾيکاوَي ھَي ڪہ آپي دُنيا ڀيڙا ڏوھي نِي ھوئون۔