وِشواسيون رَي ݾارُو ھدايت
10
اي وِشواسيون، مھارِي مرضِي ڪونھي ڪہ ٿي آپڻَي ٻاپ ڏاڏون رَي بارَي ۾ اَي بات پونترو ڪہ او ݾجائِي باڏݪ ھيٺا پناھ ۾ ھتا ھانَ ݾجائِي ݾمُوندر پار ڪري بچي گيا۔ 2 اُوئون ݾجون مُوسيٰ نَي آپرو اَگووڻ ݾمجھي باڏݪ ھانَ ݾمُوندر ۾ پويتر سِنون ليئو۔ 3 ݾجون ايشوَر رِي ميليوڙِي ٻاٽِي کاڌِي 4 ھانَ ݾجون ايشوَر رو ڏينوڙو پوڻي پيئو۔ او اُوئي جبل ݾون پوڻي پيتا، جڪو اُوئون ڀيڙو ڀيڙو بيتو، او جبل مَسيح ھتو۔ 5 پڻ تو ڀِي اُوئون ۾ تموم گھڻَي مِنکون ايشوَر نَي ناراض ڪيئو، اِيئي رَي ڪري او رڻ پَٽ ۾ مري گيا۔ 6 اُوئون رو نتيجو آپڻَي ݾارُو ھيڪ سبق ھَي ڪہ آپي اُوئون مِنکون آݪِي ڪار بُڇڙَي ڪومون رِي خواھش نِي راکون۔7 اِيئي رَي ڪري مُورتيون رِي پُوجا نِي ڪرو، جھڙَي نمُونَي اُوئون ۾ ڪَي ڪِي ھتِي۔ جون توريت شاستر ۾ لِکيوڙو ھَي ڪہ،
”مِنک کاوڻ پيئڻ رَي ݾارُو ٻيٺا
ھانَ پَڇي اُٺي عياشِي ڪرڻ لاگا۔“
8 آپي زنا نِي ڪرون، جون اُوئون ۾ ڪئينڪہ مِنکون ڪيئو ھتو ھانَ اِيئي رَي ڪري ھيڪَي ڏِن ٽيوِي ھزار مِنک ماريجا۔ 9 آپي پرڀُو رو آزمُوتو نِي ڪرون، جھڙَي نمُونَي اُوئون ۾ ڪئينڪہ مِنکون آزمايو ھتو ھانَ اِيئي رَي ڪري او ناگون رَي ڏنگڻ ݾون ماريجا۔ 10 آپي نِي ايشوَر تي ڪُرڪون، جھڙَي نمُونَي اُوئون ۾ ڪئينڪہ مِنک ڪُرڪيا ھانَ او موت رَي فريشتَي رَي ھاٿون ماريجا۔
11 اَي ݾجَي باتون اِيئي رَي ڪري ھوئَي ڪہ اُوئون رَي ݾارُو سبق ھووَي ھانَ اِيئي رَي ڪري لِکيوڙَي ھَي ڪہ آپڻَي ݾارُو جڪو آخري زمونَي را ھون ھيڪ ھدايت ھووَي۔ 12 اِيئي رَي ڪري جڪو اَي ݾمجَھي ھَي ڪہ ھُون آپرَي وِشواس تي پڪو ھون، تو خبردار رَي ڪہ او آزمُوتَي ۾ نِي پڙَي۔
13 ٿونرو ڪو ڀِي اھڙو آزمُوتو ڪونھي ھويو جڪو ٿونرِي برداش ݾون وڌيڪ ھووَي۔ ايشوَر وفادار ھَي، او ٿون تي ڪو ڀِي اھڙو آزمُوتو ڪونھي ميلَي، جڪو ٿي برداش ڪري نِي ݾگھو، پڻ جڏي ٿونرو آزمُوتو ھوشَي، تو ايشوَر ٿونَي اُوئي ۾ نڪرڻ رو مارگ ڀِي بتاشَي۔
ڏيوون رِي پُوجا ݾون خبردار ڪرڻ
14 اِيئي رَي ڪري اي پيارَي ڀايون، مُورتيون رِي پُوجا نِي ڪرو۔ 15 ٿي ݾمجھدار ھو اِيئي رَي ڪري ٿي آپ فيصلو ڪرو ڪہ ھُون صحيح ڪونھ پڙيو، جون نا؟ 16 آپي جڏي مَسيح رِي يادگيرِي رَي ݾارُو، پيالَي تي ايشوَر ݾون برڪت مونگي اُوئي ۾ پيئون ھون، تو ڪِي آپي مَسيح رَي لوئِي ۾ شامل ڪونھي ھوتا؟ ھانَ جڏي آپي ٻاٽِي ڀونگي کائُون ھون، تو ڪِي مَسيح رَي ݾَرير ۾ شامل ڪونھي ھوتا؟ 17 ٻاٽِي تو ھيڪج ھَي، اِيئي رَي ڪري آپي جڪو تموم گھڻا ھون، ھيڪ ݾَرير ھون ڪيونڪہ آپي ݾجائِي ھيڪِي ٻاٽِي ۾ شامل ھوئون ھون۔
18 اِسرائيلي قوم تي نظر ڪرو۔ ڪِي ٻَليدون رو موݾ کاوڻ آݪا ٻَليدون رِي جگھا ۾ شامل ڪونھي ھوتا؟ 19 مھارَي ڪيوَڻ رو مطلب ڪِي ھَي؟ ڪِي اَي ڪہ مُورتيون جون اُوئون تي چاڙھيوڙَي شيون رِي ڪو حيثيت ھَي؟ ڪڏي ڀِي نا۔ 20 مھارَي ڪيوَڻ رو مطلب ھَي ڪہ جڪو چڙھائو او ڪرَي ھَي، او ايشوَر رَي ݾارُو نا، پڻ شيطون رَي ݾارُو ھووَي ھَي۔ اِيئي رَي ڪري مھارِي مرضِي ڪونھي ڪہ ٿي او چڙھاوا کائو ھانَ شيطون ڀيڙا شامل ھوئو۔ 21 ٿي ھيڪَي ٽيم ۾ ٻيئون ٻيڙيون ۾ ݾَوار ھوئي ڪونھي ݾگھتا، اِيئي نمُونَي ٿي پرڀُو يسُوع رو پيالو ھانَ شيطون رو پيالو ٻيئي ڀيڙا پيئي ڪونھي ݾگھتا۔ ٿي پرڀُو يسُوع رِي يادگيرِي آݪِي ٻاٽِي ھانَ شيطون رِي ٻاٽِي، اِيئون ٻيئون ۾ ھيڪَي ٽيم تي ڀيڙا ھوئي ڪونھي ݾگھتا۔ 22 ڪِي اِيئون ڪري آپي ايشوَر نَي ريݾ ڏيرائُون ھون؟ ڪِي آپي ايشوَر ݾون وڌيڪ طاقت آݪا ھون؟
23 ٿون ۾ ڪئين اَي ڪَي ھَي ڪہ، ”ݾجَي شيون جائز تو ھَي۔“ پڻ ݾجَي فائدَي رَي ݾارُو ڪونھي ھانَ اَي ڀِي ڪَي ھَي ڪہ، ”ݾجَي شيون جائز تو ھَي۔“ پڻ ݾجون ݾون ترقي ڪونھي۔ 24 ٿي آپرَي فائدَي رِي گڻتِي نِي ڪرو، پڻ ٻيجون رو فائدو ݾوچو۔
25 جڪو موݾ دُڪون تي بِڪَي ھَي، او کائو، پڻ آپرَي من رِي تسلِي رَي ݾارُو پُوڇا نِي ڪرو۔ 26 ڪيونڪہ، ”ڌرتي ھانَ جڪو ڪئين اُوئي تي ھَي، او ݾجائِي پرميشوَر را ھَي۔“
27 جي ڪو غير وِشواسي ٿونرِي دعوت ڪرَي ھانَ ٿي اُوئي دعوت ۾ جائو، تو او ٿونرَي آگھي جڪو ڪئين راکَي، او کائو، پڻ من رَي ڀروسَي رَي ݾارُو ڪئين نِي پُوڇو۔ 28 پڻ جي ڪُڻ ٿونَي ݾُڻاوَي ڪہ، ”اَي مُورتيون تي چاڙھيوڙَي چڙھاوَي رو موݾ ھَي۔“ تو پَڇي اُوئي مِنک رَي ڪري جڪَي ٿونَي ݾُڻايو ھَي ھانَ آپرَي من رَي ڀروسَي رَي ݾارُو او نِي کائو۔ 29 مھارو مطلب ھَي ڪہ ٿي آپرَي من رَي ݾارُو نا، پڻ ٻيجون رَي ݾارُو نِي کائو۔ مھارِي آزادي ٻيجون رَي من رَي ڪري ڪيئون ڏوھ ڪرَي؟ 30 جي ھُون شُڪر ڪري کائُون ھون، تو پَڇي ڪيئون مھنَي بدنوم ڪرو ھو؟ ڪيونڪہ ھُون تو، او کاڌو ايشوَر رو شُڪر ڪري کائُون ھون۔
31 اِيئي رَي ڪري ٿي جڪو ڀِي کائو، جون پيئو، او ݾجو ايشوَر رِي مھما رَي ݾارُو ڪرو۔ 32 ٿونرَي ڪري ڪيرو ڀِي وِشواس خراب نِي ھووَي، نِي يھُودي، نِي ٻيجِي قوم آݪا ھانَ نِي ايشوَر رِي مَنڊلِي۔ 33 ھُون ڀِي ھر ھيڪ نَي خُوش راکڻ رِي ڪوشش ڪرتو رون ھون۔ ھُون آپرَي فائدَي رَي ݾارُو نا، پڻ ٻيجون رَي فائدَي رَي ݾارُو ݾوچون ھون ڪہ ھر ھيڪ نَي مُگتي ملَي۔