پرڀُو يسُوع رو جِي اُٺڻ
20
آچر رَي ڏِن ݾاڪݪي تارھي جڏي اَڃون انڌارو ھتو، مريم مگدليني پرڀُو يسُوع رَي مُڪوم تي گئِي، پڻ جڏي او اوٿ پُگِي، تو ڏيٺو ڪہ پٿر تو ھٽيو پڙيو ھَي۔ 2 اِيئي تي او ناݾتِي، شمعُون پطرس ھانَ اُوئي چيلَي ڪڍي گئِي جڪو پرڀُو يسُوع رو پيارو چيلو ھتو، اُوئون نَي ڪھيو ڪہ، ”پرڀُو نَي مُڪوم ݾون ڪاڍي لي گيا را، مھونَي خبر ڪونھي ڪہ اُوئي نَي ڪيٿ راکيو ھَي؟“ 3 پَڇي پطرس ھانَ او ٻيجو چيلو يڪدم مُڪوم ڏيݾا گيا۔ 4 او ٻيئي ڀيڙا ناٺا، پڻ ٻيجو چيلو، پطرس ݾون آگھي ناݾي مُڪوم تي پيل پُگو۔ 5 او چُر ۾ ڪونھي گيو، پڻ اُوئي نِمي مئين جويو، تو اوٿ رُگو پرڀُو يسُوع رو کوڦڻ پڙيو ھتو۔ 6 شمعُون پطرس ڀِي اُوئي لاري پُگو ھانَ او ݾِڌو مُڪوم ۾ گيو۔ اُوئي ڀِي ڏيٺو ڪہ رُگو کوڦڻ پڙيو ھَي۔ 7 اُوئي او گاڀو ڀِي ڏيٺو جڪو پرڀُو يسُوع رَي ماٿَي تي بيڙھيوڙو ھتو۔ او گاڀو ݾُوتِي گاڀون ڀيڙو نا، پڻ ڌار پڙيو ھتو۔ 8 پَڇي او ٻيجو چيلو جڪو پيل مُڪوم تي پُگو ھتو، او ڀِي مُڪوم ۾ گيو۔ اُوئي ڏيٺو ھانَ وِشواس ڪيئو۔ 9 اَڃون توڻي اُوئون شاستر رِي او بات ڪونھي ݾمجِھي ھتِي ڪہ اَي ضرُور ھَي ڪہ او مُوئوڙون ݾون جيتو ھوشَي۔ 10 پَڇي او ٻيئي چيلا آپرَي گھرون ڏيݾا پاڇا گيا۔پرڀُو يسُوع رو مريم مگدليني نَي درشن
11 مريم مگدليني مُڪوم تي ٻاھر روتِي پڙِي، پڻ جڏي روتِي روتِي نِمي مُڪوم ۾ جويو، 12 تو اُوئي آڇا گاڀا پيريوڙا ٻي فريشتا ٻيٺوڙا ڏيٺا ھيڪ ݾِروٿيئَي ھانَ ٻيجو پگوٿيئَي، جيٿ پرڀُو يسُوع رو لاش ھتو۔ 13 اُوئون فريشتون مريم نَي ڪھيو ڪہ،”ٻائِي، تُو ڪيئون روئَي ھَي؟“ اُوئي بݪتِي ڏينِي ڪہ،”مھارَي پرڀُو نَي لي گيا را، خبر ڪونھي ڪہ اُوئون ڪيٿ راکيو ھَي؟“ 14 اَي ڪيوَڻ ݾون پَڇي اُوئي لاري پاڇل ڦورِي، تو اُوئي پرڀُو يسُوع نَي اوٿ اُڀوڙو ڏيٺو، پڻ اُوئي نَي اوݪکيو ڪونھي۔ 15 پرڀُو يسُوع اُوئي نَي ڪھيو ڪہ،”ٻائِي، تُو ڪيئون روئَي ھَي ھانَ تُو ڪينَي جووَي ھَي؟“ مريم ݾمجِھي ڪہ اَي ڪو مالھي ھَي، اِيئي رَي ڪري اُوئي بݪتِي ڏينِي ڪہ،”سائين، جي ٿي اُوئي نَي لي گيا ھو، تو ݾُڻائو ڪہ اُوئي نَي ڪيٿ راکيو ھَي، تو ھُون اُوئي نَي لي جائُون۔“ 16 پرڀُو يسُوع اُوئي نَي ڪھيو ڪہ،”مريم۔“ اِيئي تي مريم اُوئي ڏيݾا پاڇل ڦوري ھانَ ارامي ٻولِي ۾ ڪھيو ڪہ،”ربُوني۔“ (ربُوني رو مطلب ھَي ”اي گُرو جِي۔“) 17 پرڀُو يسُوع اُوئي نَي ڪھيو ڪہ،”مھنَي ھاٿ نِي لگائي، ڪيونڪہ ھُون اَڃون توڻي پِتا ڪڍي اُونچا ڪونھي گيو۔ تُو مھارَي ڀايون ڪڍي پاڇِي جا، اُوئون نَي ݾُڻا ڪہ ھُون آپرَي پِتا، ايشوَر ڪڍي ماٿَي جاوڻ آݪو ھون جڪو ٿونرو ڀِي پِتا ھانَ ايشوَر ھَي۔“ 18 پَڇي مريم مگدليني، چيلون ڪڍي پاڇِي گئِي ھانَ اُوئون نَي ݾُڻايو ڪہ،”مھَي پرڀُو نَي ڏيٺو ھَي۔“ او مھَي ݾون ٻوليو ھَي۔
پرڀُو يسُوع رو آپرَي چيلون نَي درشن
19 پَڇي اُوئيج آچر رِي شام رو جڏي چيلا ھيڪِي جگھا تي ڀيڙا ھتا، او يھُوديون رَي ٻِي رَي ڪري در بند ڪري ٻيٺا ھتا، تو ڀِي پرڀُو يسُوع اُوئون رَي بِچ ۾ آئي اُڀو ھانَ ڪھيو ڪہ، ”ايشوَر ٿونَي ݾُکيا راکَي۔“ 20 پَڇي اَي ڪئي پرڀُو يسُوع اُوئون نَي آپرا ھاٿ ھانَ پاݾڙِي بتائِي۔ چيلا پرڀُو يسُوع نَي جوئي تموم گھڻا خُوش ھويا۔ 21 پرڀُو يسُوع ڀڙي اُوئون نَي ڪھيو ڪہ، ”ايشوَر ٿونَي ݾُکيا راکَي۔ جھڙَي نمُونَي پِتا مھنَي جگت ۾ ميليو ھَي، اُوئيج نمُونَي ھُون ڀِي ٿونَي ميلون ھون۔“ 22 اِيئي ݾون پَڇي پرڀُو يسُوع اُوئون ماٿَي ڦُوڪ ھڻي ڪھيو ڪہ، ”پويتر آتما لِئو۔ 23 جي ٿي مِنکون را پاپ معاف ڪرشو، تو ايشوَر اُوئون نَي معاف ڪرشَي، پڻ جي ٿي ڪيرا پاپ معاف ڪونھي ڪرو، تو ايشوَر ڀِي اُوئون نَي معاف ڪونھي ڪرَي۔“
تُوما رو پرڀُو يسُوع تي شَڪ ڪرڻ
24 پرڀُو يسُوع رَي ٻارھَي چيلون ۾ تُوما نون رو ھيڪ چيلو ھتو، جڪَي نَي جاڙو ڀِي ڪيتا۔ جڏي پرڀُو يسُوع چيلون نَي درشن ڏينو ھتو، تو او اوٿ ڪونھي ھتو۔ 25 جڏي باقي چيلون تُوما نَي ݾُڻايو ڪہ، ”مھون پرڀُو يسُوع نَي ڏيٺو ھَي۔“ اِيئي تي تُوما اُوئون نَي ڪھيو ڪہ، ”ھُون جترِي توڻي اُوئي رَي ھاٿون ۾ ڪوڪون را نِشون نِي ڏيکون ھانَ اُوئون نِشونون ۾ آپرِي اونگڙِي نِي گھاتون ھانَ آپرو ھاٿ اُوئي رِي پاݾڙِي ۾ نِي گھاتون، اُترِي توڻي ھُون ڪڏي ڀِي وِشواس ڪونھي ڪرون۔“
26 آٺون ڏِنون ݾون پَڇي جڏي پرڀُو يسُوع را چيلا ھيڪَي گھر ۾ ڀيڙا ھتا ھانَ تُوما ڀِي اُوئون ڀيڙو ھتو۔ اُوئي گھر را در بند ھتا، تو ڀِي پرڀُو يسُوع اُوئون رَي بِچ ۾ آئي اُڀو ھانَ ڪھيو ڪہ، ”ايشوَر ٿونَي ݾُکيا راکَي۔“ 27 پَڇي پرڀُو يسُوع تُوما نَي ڪھيو ڪہ، ”تُو آپرِي اونگڙِي مھارَي ڦٽون رَي نِشونون ۾ گھات ھانَ مھارا ھاٿ جو، تُو آپرو ھاٿ مھارِي پاݾڙِي ۾ گھات۔ شَڪ نِي ڪر رُگو وِشواس راک ڪہ ھُون جيتو ھون۔“ 28 اِيئي تي تُوما بݪتِي ڏينِي ڪہ، ”اي مھارا پرڀُو، تُوج مھارو ايشوَر ھَي۔“ 29 پرڀُو يسُوع اُوئي نَي ڪھيو ڪہ، ”ٿَي مھنَي ڏيٺو ھَي ھانَ پَڇي وِشواس راکيو ھَي، پڻ ڌن ھَي او جڪو بِنا ڏيٺَي مھَي تي وِشواس راکَي ھَي۔“