پرڀُو يسُوع رو جِي اُٺڻ
24
پَڇي آچر رَي ڏِن ݾاڪݪي تارھي، او لُگائَي آپرَي ٺاھيوڙَي ݾُرَي شيون لي پرڀُو يسُوع رَي مُڪوم تي گئَي۔ 2 اُوئون جائي ڏيٺو ڪہ مُڪوم رَي موڏَي تي راکيوڙو پٿر ھٽيو پڙيو ھَي۔ 3 جڏي او مُڪوم ۾ گئَي، تو ڏيٺو ڪہ پرڀُو يسُوع رو لاش اوٿ ھائِي ڪونھي۔ 4 اَڃون او گھٻرائي اُڀَي ھتَي، تو اوچتو چمڪيلا گاڀا پيريوڙا ٻي آڏمي آئي اُوئون آگھي اُڀا۔ 5 لُگائَي ٻيئاجَي ھانَ آپرا ڪونڌا ھيٺا ڪيئا، پڻ اُوئون آڏميون ڪھيو ڪہ، ”ٿي جيتَي نَي مُوئوڙون ۾ ڪيئون جوئو ھو؟ 6 او ايٿ ڪونھي پڻ جِي اُٺيو ھَي۔ ياد ڪرو ڪہ اُوئي ٿونَي گليل صُوبَي ۾ ݾُڻايو ھتو ڪہ، 7 ’ضرُور ھَي ڪہ ھُون مُنش پُتر، پاپيون رَي حوالي ڪيئو جائين ھانَ ݾُولِي تي چاڙھيو جائين ھانَ تيجَي ڏِن ڀڙي جيتو ھوئي جائين۔‘“ 8 جڏي اُوئون لُگايون اَي ݾُڻيو، تو اُوئون نَي پرڀُو يسُوع را ٻول ياد آيا۔9 پَڇي او لُگائَي مُڪوم ݾون پاڇَي گئَي ھانَ اِگيارَي چيلون نَي ھانَ باقي ݾجون نَي او باتون ݾُڻائَي۔ 10 جڪون لُگايون سنتون نَي خبر ݾُڻائِي، اُوئون ۾ مريم مگدليني، يوئانا، يعقُوب رِي ما مريم ھانَ اُوئون ڀيڙَي ڪئين ٻيجَي لُگائَي ڀِي ھتَي۔ 11 پڻ چيلون ݾوچو ڪہ، ”اِيئون ڪيڪر ھوئي ݾگھَي ھَي۔“ اُوئون اِيئون باتون رو ڀروسو ڪونھي ڪيئو۔ 12 پڻ پطرس اُٺيو ھانَ ناݾتو مُڪوم ڏيݾا گيو۔ اوٿ پُگي اُوئي ڏيٺو ڪہ رُگو پرڀُو يسُوع رو کوڦڻ پڙيو ھَي۔ اَي جوئي او تموم گھڻو حيرون ھويو ھانَ پاڇو آپرَي گھري گيو۔
پرڀُو يسُوع رو ٻيئون چيلون نَي درشن
13 اُوئيج ڏِن پرڀُو يسُوع را ٻي چيلا امائوس گون ڏيݾا جاوتا پڙيا۔ او گون يروشلم شھر ݾون اندازن اِگيارَي ڪِلو ميٽر اݪگو ھتو۔ 14 او اُوئون ݾجَي باتون رَي بارَي ۾ جڪو اُوئون ڏِنون ۾ ھوئَي ھتَي، آپت ۾ باتون ڪرتا جاوتا پڙيا۔ 15 جڏي او ھيڪَي ٻيجَي ݾون باتون ڪرتا پڙيا، تو اِيئون ھويو ڪہ پرڀُو يسُوع آپ اُوئون رَي نيڙو آئي اُوئون ڀيڙو بيوَڻ لاگو۔ 16 پڻ اُوئون رَي اونکيون تي اھڙو پڙدو آئي گيو ڪہ او پرڀُو يسُوع نَي اوݪکي ڪونھي ݾگھيا۔ 17 پرڀُو يسُوع اُوئون ݾون پُوڇو ڪہ، ”ٿي ڪھڙَي باتون ڪرتا جائو پڙيا؟“ اَي ݾُڻي او اُڀي رھيا۔ اُوئون را مونڏا اُتريوڙا ھتا۔ 18 پَڇي اُوئون ۾ ھيڪَي، جڪَي رو نون ڪليپاس ھتو ڪھيو ڪہ، ”تُو، يروشلم شھر ݾون آوَي پڙيو، تو ڀِي ٿنَي خبر ڪونھي ڪہ اوٿ اِيئون ڏِنون ۾ ڪِي ھويو ھَي؟“ 19 پرڀُو يسُوع اُوئون ݾون پُوڇو ڪہ، ”ڪِي ھويو ھَي؟“ اُوئون بݪتِي ڏينِي ڪہ، ”يسُوع ناصرِي جڪو نبِي ھتو، او آپرَي ڪوم آپرَي باتون ۾ ايشوَر ھانَ ݾجَي مِنکون رِي نظر ۾ قُدرت آݪو ھتو۔ 20 ايشوَر رَي موٽَي پُوجاريون ھانَ مھورَي ݾردارون اُوئي نَي موت رِي سزا ڏيوَڻ رَي ݾارُو جھلايو ھانَ اُوئي نَي ݾُولِي تي چاڙھي مرائي ڇوڙيو۔ 21 پڻ مھونَي اُميد ھتِي ڪہ مھورِي اِسرائيلي قوم نَي او مُگتي ڏيشَي۔ اِيئي ݾجَي باتون نَي آج تيجو ڏِن ھَي۔ 22 مھورَي ٽولَي رَي ڪئين لُگايون مھونَي حيرون ڪري ڇوڙيا۔ او آج ݾاڪݪي تارھي مُڪوم تي گئَي ھتَي، 23 پڻ جڏي او اوٿ پُگَي، تو ڏيٺو ڪہ پرڀُو يسُوع رو لاش اوٿ ھائِي ڪونھي۔ پَڇي او پاڇَي آئَي ھانَ ݾُڻايو ڪہ فريشتون مھونَي درشن ڏي ڪھيو ڪہ، ’پرڀُو يسُوع جيتو ھَي۔‘ 24 اُوئي ݾون پَڇي مھورا ڪئينڪہ دوست ڀِي مُڪوم تي گيا ھتا، اِيئوج ڏيٺو جون لُگايون ڪھيو ھتو ڪہ پرڀُو يسُوع رو لاش اوٿ ھائِي ڪونھي۔“ 25 پَڇي پرڀُو يسُوع اُوئون نَي ڪھيو ڪہ، ”اي مُورکون، ٿون اُوئون ݾجَي باتون رو ڀروسو ڪيئون ڪونھي ڪيئو، جڪو نبيون ڪيئَي ھتَي۔ 26 اَي ضرُوري ھتو ڪہ مَسيح اِيئي نمُونَي ڏُک ڏيکڻ ݾون پَڇي آڪاش ۾ جائي آپرو مونَ مرتبو لَي۔“ 27 پَڇي پرڀُو يسُوع مُوسيٰ ݾون لي ݾجَي نبيون توڻي شاستر رَي ݾجَي باتون اُوئون نَي ݾمجھائَي جڪو اُوئي رَي بارَي ۾ لِکيوڙَي ھتَي۔ 28 بيتا بيتا او اُوئي گون رَي نيڙا پُگا جيٿ اُوئون نَي جاوڻو ھتو۔ پرڀُو يسُوع اِيئون بيوَڻ لاگو جھڙو ڪہ اُوئي نَي اَڃون ڀِي آگھي جاوڻو ھووَي۔ 29 پڻ اُوئون اُوئي نَي مجبُور ڪري ڪھيو ڪہ، ”ڏِن آٿويو رو ھانَ انڌارو ڀِي ھوئڻ آݪو ھَي، اِيئي رَي ڪري ٿي مھون ڪڍي رو۔“ پَڇي پرڀُو يسُوع اُوئون ڀيڙو گيو۔ 30 جڏي او اُوئون ڀيڙو ٻاٽِي کاوڻ ٻيٺو، تو پرڀُو يسُوع ٻاٽِي لي ايشوَر رو شُڪر ڪيئو ھانَ ٻاٽِي ڀونگي اُوئون نَي ڏيوَڻ لاگو۔ 31 پَڇي اوچتو اُوئون رَي اونکَي کُلئَي ھانَ اُوئون پرڀُو يسُوع نَي اوݪکيو، پڻ يڪدم او اُوئون رَي اونکيون ݾون اَلوپ ھوئي گيو۔ 32 پَڇي او ھيڪَي ٻيجَي نَي ڪيوَڻ لاگا ڪہ، ”جڏي او مارگ ۾ آپون ݾون باتون ڪرتو پڙيو ھانَ آپون نَي شاستر رَي ݾجَي باتون رَي بارَي ۾ ݾمجھاوتو پڙيو، تو اُوئي ٽيم آپڻا من ڪِترا نِي خُوشِي ݾون ڀريجا ھتا۔“
33 پَڇي اُوئيج ٽيم او اُٺي يروشلم شھر ڏيݾا پاڇا گيا۔ جڏي او اوٿ پُگا، تو اِگيارَي چيلون نَي ٻيجون چيلون ڀيڙا ڏيٺا۔ 34 او آپت ۾ ڪيتا پڙيا ڪہ، ”پرڀُو ݾاچيلي جِي اُٺيو ھَي۔ اُوئي شمعُون نَي درشن ڏينو ھَي۔“ 35 اَي بات ݾُڻي اُوئون ٻيئون چيلون ڀِي اُوئون نَي ݾُڻايو ڪہ امائوس گون ڏيݾا جاوتي بِݪا ڪِي ڪِي ھويو ھتو ھانَ ڪيڪر ٻاٽِي ڀونگتي بِݪا اُوئون پرڀُو يسُوع نَي اوݪکيو ھتو۔
پرڀُو يسُوع رو آپرَي چيلون نَي درشن
36 جڏي او اَي باتون ڪرتا پڙيا، تو پرڀُو يسُوع آپ آئي اُوئون رَي بِچ ۾ اُڀو ھانَ اُوئون نَي ڪھيو ڪہ، ”ايشوَر ٿونَي ݾُکيا راکَي۔“ 37 اَي ݾُڻي او تموم گھڻا ٻيئاجا ھانَ ݾمجھا ڪہ اَي ڪو ڀُوت ھَي۔ 38 پرڀُو يسُوع اُوئون نَي ڪھيو ڪہ، ”ٿي ڪيئون ٻيئاجو ھو؟ آپرَي من ۾ شَڪ ڪيئون ڪرو ھو؟ 39 مھارا ھاٿ ھانَ پگ جوئو ھُون ݾاگي ھون۔ ڀُوت رَي موݾ ھانَ ھاڏکَي ڪونھي ھوتَي، پڻ ٿي مھنَي ھاٿ لگائي جوئي ݾگھو ھو۔“ 40 پَڇي اَي ڪئي پرڀُو يسُوع اُوئون نَي آپرا ھاٿ ھانَ پگ بتايا۔ 41 پَڇي او تموم گھڻا خُوش ھانَ حيرون ھويا۔ تو ڀِي اُوئون نَي ڀروسو ڪونھي ھويو۔ اِيئي رَي ڪري پرڀُو يسُوع اُوئون نَي ڪھيو ڪہ، ”ڪِي ٿون ڪڍي کاوڻ رَي ݾارُو ڪئين ھَي؟“ 42 تو اُوئون پرڀُو يسُوع نَي ڀُونجوڙِي مڇِي رو ھيڪ ٻيرو ڏينو۔ 43 پرڀُو يسُوع اُوئون رَي رُوبرو مڇِي رو ٻيرو کاڌو۔
44 پَڇي پرڀُو يسُوع اُوئون نَي ڪھيو ڪہ، ”اَي مھارَي بارَي ۾ او باتون ھَي جڪو مھَي ٿونَي اُوئي ٽيم ݾُڻائَي ھتَي، جڏي ھُون ٿون ڀيڙو ھتو ڪہ او ݾجَي باتون پُورَي ھووَي جڪو مُوسيٰ رَي توريت شاستر، نبيون رَي شاستر ھانَ زبُور شاستر ۾ لِکيوڙَي ھَي۔“
45 پَڇي پرڀُو يسُوع اُوئون نَي شاستر رَي اِيئون باتون رو مطلب ݾمجھايو۔ 46 پرڀُو يسُوع اُوئون نَي ڪھيو ڪہ، ”شاستر ۾ مھارَي بارَي ۾ اَي لِکيوڙو ھَي ڪہ،
’مَسيح ڏُک ڏيکشَي، مري جاشَي
ھانَ تيجَي ڏِن مُوئوڙون ݾون جِي اُٺشَي
47 ھانَ اُوئي رَي نون ݾون توبھون ھانَ پاپون رِي معافي رو پرچار،
يروشلم شھر ݾون شرُوع ڪري ݾجَي قومون ۾ ڪيئو جاشَي۔‘
48 ٿي اِيئي ݾجَي باتون را گواھ ھو۔ 49 ݾُڻو، ھمَي ھُون ٿون ڪڍي پويتر آتما ميلين جڪَي رو واعدو مھارَي پِتا ڪيئو ھَي۔ پڻ جترِي توڻي ايشوَر رَي طرفون ٿونَي پويتر آتما رِي طاقت نِي ملَي اُترِي توڻي ٿي اِيئي شھر ۾ ٻيٺا رھيا۔“
پرڀُو يسُوع رو آڪاش تي جاوڻ
50 پَڇي پرڀُو يسُوع آپرَي چيلون نَي شھر ݾون ٻاھر بيت عِنيا گون رَي نيڙو لي گيو۔ اوٿ اُوئي آپرا ھاٿ کڻي اُوئون نَي برڪت ڏينِي۔ 51 جڏي او اُوئون نَي برڪت ڏيتو پڙيو، تو اِيئون ھويو ڪہ او اُوئون ݾون ڌار ھوئي آڪاش تي کڻيجي گيو۔ 52 چيلون اُوئي آگھي آپرا شيش نِمايا ھانَ پَڇي او خُوش ھوئي يروشلم شھر ڏيݾا پاڇا گيا۔ 53 او ھروز ايشوَر رَي گھر ۾ جائي ايشوَر رِي بڏائي ڪرتا رھيا۔