پرڀُو يسُوع رو جِي اُٺڻ
16
جڏي پويتر ڏِن پُورو ھويو، تو مريم مگدليني، يعقُوب رِي ما مريم ھانَ سلومِي، ݾُرَي شيون مول ليئَي ڪہ جائي پرڀُو يسُوع رَي لاش تي لگاوَي۔ 2 او آچر رَي ڏِن ݾاڪݪي تارھي ڏِن اُگتي بِݪا مُڪوم ڏيݾا گئَي۔ 3 او مارگ ۾ آپت ۾ باتون ڪرڻ لاگَي ڪہ، ”آپڻَي ݾارُو مُڪوم رَي موڏَي تي راکيوڙو پٿر ڪُڻ اݪگو ڪرشَي؟“ 4 ڪيونڪہ او پٿر موٽو پٿر ھتو۔ پڻ جڏي اُوئون جائي ڏيٺو ڪہ پٿر تو ھٽيو پڙيو ھَي۔ 5 جڏي او مُڪوم ۾ گئَي، تو ھيڪَي جوان نَي آڇا چمڪيلا گاڀا پيريوڙا ݾاجَي پاݾَي ٻيٺوڙو ڏيٺو۔ اُوئي نَي ڏيکي تموم گھڻَي حيرون ھوئَي۔ 6 اُوئي اُوئون نَي ڪھيو ڪہ، ”ٿي اترَي حيرون ڪيئون ھو۔ ڪِي ٿي يسُوع ناصرِي نَي جوئو ھو، جڪَي نَي ݾُولِي تي چاڙھيو ھتو؟ او تو جيتو ھويو رو ھانَ او ايٿ ھائِي ڪونھي۔ جوئو، اَي او جگھا ھَي جيٿ اُوئون اُوئي رو لاش راکيو ھتو۔ 7 ھمَي ٿي جائي پطرس ھانَ ٻيجَي چيلون نَي ݾُڻائو ڪہ پرڀُو يسُوع ٿون ݾون پيل گليل صُوبَي ڏيݾا جاشَي۔ اوٿ ٿي اُوئي نَي ڏيکشو، جون اُوئي آپ ٿونَي ݾُڻايو ھتو۔“ 8 تو او لُگائَي مُڪوم ݾون نڪري ناٺَي، ڪيونڪہ او ٻِي رَي ڪري ڏڪتَي پڙئَي ھانَ حيرون ھتَي اِيئي رَي ڪري اُوئون مارگ ۾ ڪينَي ڀِي ڪونھي ݾُڻايو۔پرڀُو يسُوع رو مريم مگدليني نَي درشن
9 [پرڀُو يسُوع آچر رو ݾاڪݪي تارھي جيتو ھوئڻ ݾون پَڇي ݾجون ݾون پيل مريم مگدليني نَي درشن ڏينو، جڪَي ݾون اُوئي ݾات ڀُوت ڪاڍيا ھتا۔ 10 مريم مگدليني جائي پرڀُو يسُوع رَي ساٿيون نَي ݾُڻايو جڪو ڏُک رَي ڪري روتا پڙيا۔ 11 جڏي اُوئون ݾُڻيو ڪہ پرڀُو يسُوع جيتو ھويو ھَي ھانَ اُوئي مريم مگدليني نَي درشن ڏينو ھَي، تو ڀِي اُوئون اِيئي بات رو وِشواس ڪونھي ڪيئو۔
پرڀُو يسُوع رو ٻيئون چيلون نَي درشن
12 اُوئي ݾون پَڇي پرڀُو يسُوع ٻيجَي رُوپ ۾ ٻيئون چيلون نَي درشن ڏينو جڪو گون ڏيݾا پنڌ جاوتا پڙيا۔ 13 اُوئون پاڇو جائي يروشلم شھر ۾ ٻيجون مِنکون نَي ݾُڻايو، پڻ مِنکون اِيئي بات رو وِشواس ڪونھي ڪيئو۔
پرڀُو يسُوع رو اِگيارَي چيلون نَي درشن
14 پَڇي پرڀُو يسُوع اِگيارَي چيلون نَي اُوئي ٽيم درشن ڏينو جڏي او ٻيݾي ٻاٽِي کاوتا پڙيا۔ پرڀُو يسُوع اُوئون نَي دڙڪا ڏينا ڪيونڪہ اُوئون را من ڪاٺا ھوئي گيا ھتا ھانَ اُوئون وِشواس ڪونھي ڪيئو ھتو، پڻ اُوئون رو ڀِي وِشواس ڪونھي ڪيئو جڪون اُوئي نَي جيتو ھوئڻ ݾون پَڇي ڏيٺو ھتو۔
15 پَڇي پرڀُو يسُوع اُوئون نَي ڪھيو ڪہ، ”ٿي ݾجِي دُنيا ۾ جائو ھانَ ݾجَي قومون ۾ مھارَي نون رِي خُوشِي رِي خبر رو پرچار ڪرو۔ 16 جڪو وِشواس راکي پويتر سِنون ليشَي، تو اُوئي نَي مُگتي ملشَي ھانَ جڪو وِشواس ڪونھي راکَي، تو او ڏوھي ڪيئو جاشَي۔ 17 جڪو وِشواس راکشَي او پرچا ڪرشَي ھانَ مھارَي نون ݾون ڀُوت ڪاڍشَي ھانَ او نُوئَي نُوئَي ٻولَي ٻولشَي۔ 18 جي او ناگ جھالشَي، جي او زھر پيشَي، تو اُوئون نَي ڪئين ڪونھي ھووَي۔ او بيمارون تي ھاٿ راکشَي، تو بيمار ݾاجا ھوئي جاشَي۔“
پرڀُو يسُوع رو آڪاش تي جاوڻ
19 جڏي پرڀُو يسُوع اُوئون ݾون باتون ڪري ھئو ڪيئو، تو پَڇي او آڪاش ڏيݾا کڻيجي گيو ھانَ ايشوَر رَي ݾاجَي پاݾَي عِزت ھانَ اِختياري ݾون جائي ٻيٺو۔ 20 اِيئي ݾون پَڇي چيلا ھر جگھا جائي مِنکون ۾ پرچار ڪرڻ لاگا۔ پرميشوَر اُوئون ڀيڙو پرچار رَي ڪوم ۾ مدد ڪرتو رھيو ھانَ اُوئون ݾون پرچا بتائي ثابت ڪرتو رھيو ڪہ اُوئي رَي ڪھيوڙَي باتون ݾاچَي ھَي۔]