Jisubí Yoddo Longélo Ésaːmokunam
(Moti 12.9-14; Luk 6.6-11)
3
Odok lédupé Jisubí lékoda murong-okumpé gíangkang, odokké odo alag asongko sanpiːné tani:ko dungngai. 2 Bulukkolok akke bím lugélaːnamko magola dungngai, édémpila bí Yoddo longélo bím aimoyékunei émna bulu bím kéraːlokké kanggobomna dungngai.a 3 Jisubí édé alag sanpiːné tani:dém luto, "Appíngké kanggaːpé dagropto." 4 Odokké Jisubí bulum tauto, "Yoddo longélo okkom gerpénammén ainé agerémyé aiman agerém, turmokunamémyé mokenammém?"Émpige:la bulu asoːpé dungapkang. 5 Bí bulum kangírra kaːto, odokké buluk torné asinkídíːdém kaːla bí sagígíla taniːdém luto, "Nok alagdém lagjunto." Bí lagjunammé, bík alagdé aikangku. 6 Odo Parosikídí:dé gílennangkula lomdanna Erodia taniːkídíːdok lédílo kapé bím mokela:yan émna bík kekonpé ruːbosuto.
Jisukol Gímínné Taniːkéréngko
7 Jisubíːla bíkkol luyírsunékídí:dé Galili paːtaːdoːpé gílenkang, odo bottén kéréngkopé taniyé bík lédulo gímíndo. Bulu Galilidokké, Judiadokké,b 8 Jerusalemdokké, Idumia moːtagdokké, Jordandok sanggaké moːtagdokké, odokké Tayardokkéla Sidondok kérang-kétaglokké. Édé taniːappíːdé Jisukodoːpé gído kapilaːné bík gernam agerkídíːdém bulu tattak. 9 Taniyé bojébatsunammé, bím níːdubníːyuppéké émna bí bíkkol luyírsunékídí:dém ollungko moninsula léːdopé lulíkto. 10 Kapéné bí bojéruːngkoném ésaːmotoku, édémpila kinamkané appíːdé bím gakkípé émna bíkkodoːpé nérrabomdo.c 11 Odokké édíloi naréman yalo paːnam taniːkídí:dé bím ka:sudang, bulu bík kanggaːdo oaːla kabla ludag, "No Ru:néké Aoːdé."
12 Émpige:la bí séːkon édém lubimaːdopé bí bulum morídla lutumdag.
Jisubí Yíːla:nyí Mélígnamkídíːdém Balennam
(Moti 10.1-4; Luk 6.12-16)
13 Odok lédupé Jisubí adi:koloːpé gísangkang odokké sé:kobulum bí méːlíksudagaːji bulum gokto, odokké bulu bíkkodoːpé gído.d 14 Bí yí:la:nyíko balento séːkobulum mélígnam émna bí minníkto, bulu bík lédílo duːmíndopélaː lugoːbidopé tolíkto. 15 Odokké buttom ménnennaːdopé ilang-gílangém bito.
16 Bík tolígnam yíːla:nyídé sé:buluː Simon (sé:komé bí Pitor émna minníkto); 17 Jibedi:ké ao Jems odokké bík bíro Jon (bulum bí Boanerges émna minníkto, odok légíːdé Do:mír ao); 18 Andriu, Pilip, Bartolumiu, Moti, Tomas, Alpauské ao Jems, Taddius, Jilote émnam Simon 19 odokké Juda Iskortia, sé:kobí bím yadla-kopakto.
Jisubíːla Beljebubbí
(Moti 12.22-32; Luk 11.14-23; 12.10)
20 Odo Jisubí Kaparnaumdo okumkoloːpé gíkang, odokké lékoda kéréngkopé taniyé gíkumsukang, édémpila bíːlang bíkkol luyírsunékídí:dé donan ayírém panggétomang. 21 Taniyé lugékang, "Bí simatkang." Édílo bík éraːtaniyé édém tatpaːsuton, bulu bím sogabbomkupé émna gído. f
22 Odokké Jerusalemdokké gítogné luro luyírnékídí:dé luto, "Bím Beljebubbí, butukídíːdok migomdé pa:la léːtag! odokké bíkkoki bí buttom méndag."
23 Édémpila Jisubí bulum goggeːla luyisunamki lubitoː "Kapé Uiːbí Uiːmé ménnaːyén? 24 Migomdoko a:ko aíké araːdo aíké kekonpé angusumílo, édé migomdokodé du:yarma:yé. 25 Okum-érangkoné aíké araːdo aíké kekonpé angusumílo, édé okumdé du:yarma:yé. 26 Édémpila Uiːbí aíé aíké kekonpé dagrobla angusumílo, bí duːyarmaːyé; bík yognan ayírdé píngangkaːbo.
27 Arro, kínggín tani:kolok okumkolo:pé séːkosin gíaːla bík attarém poːbomnangkumang édíloːpé bím rínggappoːla léːpomaːyéji. Rínggabmílo bík okumdok attarém bomnayéku.
28 Ngo nolum arodém lubidung, tani:lok appíng imurémnaː buluk Ruːnémé lukaːnamdém mé:yinsubiyé. 29 Émpige:la sé:kobíi Angunné Yalomé lukaːyéji bím édíloːsin méːyinsubimaːyé; bík pa:bdé duːyaryé. 30 "Bíkkolo aiman yaloko dung," émna bulu lulaːyém bí édémpé bulum luton.
Jisuké Anédélaː Bírrangkídíng
(Moti 12.46-50; Luk 8.19-21)
31 Odo Jisuké anédéːla bírrangkídí:dé gípíːdo. Bulu ruːyido dagla dunggeːla bím gogdopé akoném mélíkto. 32 Tani kéréngko Jisum tedyedla dungngai, odokké bulu bím luto, "Nok oːbíːla nok bírrangkídí:dég ruːyélé nom magoldung."