Amni Pidnédém Luyisula Lubinam
(Moti 13.1-9; Luk 8.4-8)
4
Jisubí lékoda Paːtang ragodo luyírbito. Bottén kéréngkopé taniyé bík kéraːdo gíkumsunamé, bí ollungkolo sa:la odok tayéːdo tetkang odokké tani: appí:dé ragodo dagla dungkang.a 2 Bí bulum bojéko doːyíngém luyisunamki luyírbito, odokké bík luyírdo bí lutoː3 "Tatpong! Aríg-inékoné bík amniém pitkapé gílenkang. 4 Bík pidla duːdodo, akke gubati ru:yido oletkang, odokké péttangé déngaːla édémbulu paladongapto. 5 Akedé torné-ílíng kakolo oletkang, okolo deːtak-amongé kasodaggan. Amoːdé bosornammé amnidé lomdanna saːlenkang. 6 Émpige:la do:nyidé kaːlenammé, bulum kaːsanto, kapéné léppírdé perbudmaːnammé bulu sanapkang. 7 Ake amniyé tang araːlo okepkang, tangkídíːdé buluk lédílo saːjonsuto odokké bulum partidamtoku. Édémpila bulu badlennaːtomang. 8 Émgom amni ékké ainé amo:lo oletkang. Odokké édébulu saːlenna míːtaːla parbomna aːyém yíum, yíngkéng, odokké língkokopé eːbadla eːto."
9 Odo Jisubí luto, "Sé:kké yerungé du:ji, bím tadmotoka."
Luyisubinamdok Légíːdé
10 Édílo bí atéro:dé dungngan, Yí:la:nyídéːla bík kéraːdok duːnékídíːdé luyisunamdok légíːdém bím tauto. 11 Odo bí bulum lubito, "Ru:néké migomdokodok kinpíːmaːnamdém nolum kinmodung. Émpige:la séːkobulu ruːyéːlé duːji bulum appíngém luyisunampé lubido.b 12 Édémpimílo,
"Bulu ka:dom kaːbegyépé émpigeːla
édíloːsin kangkinmaːyé,
odokké tadbegyépé émpigeːla
édíloːsin tatkinmaːyé;
émmaːmílo bulu gíladyaːkupé odokké
bulum mé:yinsinsubiyai!c
Jisubí Amni Pidnédok Luyisunamdém Lusarbinam
(Moti 13.18-23; Luk 8.11-15)
13 Odo Jisubí bulum luto, "Nolu séː luyisunamsém tatkintoma:nei? Émpémílo nolu kapé luyisubinam appíːdém tatkinyén? 14 Amni pidnédé Ruːnék gomugém pidlíkto. 15 Tani akke gubati ruːyidok oledné amniémpé idag, okolo gomugdém pidlíktoji. Édílo bulu édém tatton, Uiːbí oddar gíla pidlígnam gomugdém bulukkolokkém laːpakto. 16 Akekídí:dé, torné-ílíng dungkolo pidlígnamdémpé idag, gomugdém tadgeːla oddar méːpodanna édém toríksudag. 17 Émpigeːla bulukké léppíré kamaːnammé, bulu bojéko duːyarmang. Édílo agomdok légangé ngasodélaː ipusireyé a:dang, bulu lomdanna mépagdag. 18 Akedé tang ara:lok pidlígnam amniémpé idag, gomugdém taddag; 19 émpige:la séː turnamsok légangé méːnamdé, mirémníːnamdéːla bangkí bangkí attarém asin-méːbonammé aːla gomugdém partidbomdag, odo édé badlenmang. 20 Akedé, ainé amo:lo pidlígnam amniémpé idag, bulu gomugdém taddag, édém toríksudag, odokké yíngum, yíngkéng, língkokopé pidnamdémyang aːyém eːbadla eːdag.
Tígéng Tayéːdo Serakidé
21 Odokké bí bulum luto, "Nolu Seraki:ko baːnodgeːla édém tígéngkolo tímaːpé bati manggom asub kéíkkolo léːpé émna bomaːdonei? 22 Léːsilaːnam okkosin kamang okodém léngkankumaːyéji, odokké kinpíːmaːnam okkosin kamang okodém píaːlo kinkumaːyéji. 23 Séːkké tadnan yerungé du:ji, bím tadmotok."
24 Odokké bí bulum luto,"Nolu okkom tadduːji édém tadmiːla tadlang. Oko kínanékokki nolu kíla bidoji, édé kínnínodokki nolumsin kínala biyéku; odokké édémyaːsin dérkoːyaːpé.ed 25 Sé:kké duːji bím bojéyangko bisedyé, séːkké kamaːji, bíkké okko duːji édémsin bíkkolokkém laːpagyé."
Mí:taːbomné Amniːdém Luyisubinam
26 Odokké bí luto, "Ru:nék migomdokodé sémpé idag. Tani:koné aríkkolo amniém pidlíkto. 27 Yummém longngém, bí yubgom kinsul dunggom, amnidé saːlenna míːtaːbomdag. Émpigeːla édé kapé míːtaːduːji édém bí kinmang. 28 Amoːdé aíé aːyém eːmodag, anné bornyíko nginnepoːmodag, odokké atkodém, odok lédupé atkodo aːyém biːdopé eːmodag. 29 Odokké édílo a:yédé mindoji, bí kasiki gadbomdag, kapilaːné édém gatkunan ayíré píngangkaːbo."
Pétu Ammodém Luyisubinam
30 Bí lékoda luto, "Ru:nék migomdokodé okkom gésudang odokké kapin luyisubinamki ngolu édém lusarbiyyan? 31 Édé pétu ammokonémpé idag, amoːdo pidlígdodo moːpísok pirmeyaːné ammoko. 32 Émpigeːla édílo pidlígdoji, édé míːtaːla baːri oying araːlok míːtapagyaːdag, botté-botténé réngkéngé padlenammé doːmírtok péttangé odok ugyumdo asubém giːlaːdag.
33 Bulu éddíko tatkinnaːton, édémpin bojéruːngko luyisubinamki Jisubí bulum agomdém lubito. 34 Bí luyisubinamém lumaːpé bulum okkomsin lubitomang. Émpigeːla édílo bík aíké luyírsunékídí:dé bík lédílo atéroːpé duːmíndon, odo bí appíːdém lusarbidag.f
Jisubí Bottén Ésarko Sarngasumoto
(Moti 8.23-27; Luk 8.22-25)
35 Édé yummayíríːdo, bí bíkkol luyírsunékídí:dém luto, "Kajé ngolu paːtaːsok kekonoloːpé gíkajé." 36 Odo luyírsunékídíːdé taniːkéréːdém mépakto odokké oko olluːdo Jisubí tednoːla dungngan odoːpé sangala bulu bím gíbokang. Odokké odo ollung ékkésin dungngai. 37 Odo bottérun ésarko sarsangkang, odokké siyaddé kaksaːla ollu:do assém kagbito, édémpila olluːdé jíngadagaboi. 38 Jisubí olluːdok kuːdumdo dumpa pudanna yubla dungngai. Odo luyírsunékídíːdé bím urrobgeːla luto, "Luyír-abu, no ngoluk légaːpé ajjikosinéi méːbiman, kangkíto, ngolu siyébomaːlang?"
39 Bí dagrobgeːla bottén ésardém morítto odokké siyaddém luto, "Ansíngoːpé aso:pé du:tok!" Odo bottén-ésardé sarngasukang odokké siyaddé asoːpé dungkang. 40 Bí bulum luto, "Kapila nolu pésodun? Nolukké su:pésin méːjíksunamé kamadanei?"
41 Odo bulu aigampé pésola akoné akoném taukaːmínsuto, "Sé:kon bí? Ésarélaː siyaddéːsin bík agomém-tattémíndag!"