Aiman-uiːpaːnam Tani:koném Jisubí Ésaːmotoku
(Moti 8.28-34; Luk 8.26-39)
5
Odok lédupé bulu paːtaːdok kekonké moːtak, Geraseniːpéa gípí:to. 2 Édílo Jisubí ollu:dokké gíitoji, aiman yalo paːnam tani:ko bím ríksukolo agodokké gílendo. 3 Édé tani:dé ago-goluːlo du:dagai, odokké séːkosin bím ikoliki ríntumna léːlamangngaboi. 4 Bím alé alagdok rínggabla léngkeːdungngai, émpigeːla bí ikoliːdém busotsudagai odokké bík alédok koggabla léːnam yogírkídíːdémsin bukínsudagai. Bím morala léːnané tornamé sé:kkésin kamangai. 5 Longgém-yummém bí ago-golungkídíːdoːla adikídíːdo gígola kabdungai odokké ílíngki bí aíém gadjoksudagai.6 Édílo bí Jisumé moːtéːpé ka:ton, bí dugla gíla bík kanggaːdo lébí:tumangkang. 7 Odokké bí bottépé jé:la luto, "Jisu, Kínggíːtaríːné Ruːnéké Ao, ngokkolok nom okkom lagidang? Ru:néké aminno kumdung no ngom mokemoramyo!"b 8 Jisubí bím luto, "No aiman yalono, séː tani:sokké gílentoku!"
9 Jisubí bím tauto, "Nok aminém okko émtang?"
Bí lulatsutoku, "Ngok aminé Liːjionc, kapilaːné ngolu bojéko dung." 10 Odokké édé mongkédokké bulum mélennígmaːdopé bí Jisumé kumdanna luto.
11 Odo bottén kéréngkopé e:gém kérangké adi:do dogomola léːtagai. 12 Butukídíːdé Jisumé kumdanna luto, "Ngolum eːgkídíːdoːpé mélíktei; ngolum buluk araːdo:pé gíaːmotei." 13 Bí bulum gía:dopé tolíkto, odokké aiman yalokídíːdé gílenna e:gkídíːdo durangkang. Eːg kéré:dé, líːyíng annyiːkíramkopé idagai, paːtaːdok oudné ragodokké asibo sumjísula singapkang.
14 E:g ka:sí:nékídíːdé duglangkula édé doːyiːdém taondoːla doːluːdo lubitoku; odokké okko kapikaːji édém kangkolo taniːkídíːdé gílendo. 15 Édílo bulu Jisukodoːpé gípíːtoji, bulu liːjion butukídíːdok pa:nam taniːdém Jisuké kéraːdo aikangkanoːpé galuk géla, ansíngoːpé tedla duːdopé kaːla bulu appíngé péssamkang. 16 Sé:kobulu édém ka:toji bulu taniːkídíːdém édé butu paːnam tani:dé kapé aikangkuji odokké e:gkídí:dok doːyiːdémsin lubito.
17 Odo taniːkídíːdé Jisumé buluk moːtagdokké gípagdokupé kumna luropkang.
18 Jisubí ollu:do sangadokudodo, butu pa:nam tani:dé bík lédílo gímínpé émna kumdanna luto.
19 Émpige:la Jisubí bím gíbomap igeːla luto, "Nok aíké okumpé gíkangku odokké Ru:tumbí nok légangé oko okkom ibitoji odokké éddíko bí nom ayaːtoji édém lubitaku."
20 Édémpila édé taniːdé gílangkula Jisubí bík légangé oko okkom ibitoji édé appíːdém Dekapolisdod lubitoku. Odo taniː appíːdé méngksukang.
Jairaské Omédéːla Molaːman Mimédé
(Moti 9.18-26; Luk 8.40-56)
21 Édílo Jisubí lékoda ollungki paːtaːdok kekonpé kongkotokuji. Odo paːta ragodo bojéruːngkopé taniyé bík kéraːdo gíkumsukang. 22 Jairas émnam, murong-okum migomko odo:pé gído, Jisumé kanggeːla bí bík alédo tungaːla, 23 bím kumdanna luto, "Ngok ommouːbí simosimala dung. Ayaːpé-méːla gíla nok alakki bím ri:yidbitei oddoi bí ailangkula turyeku."
24 Édémpila Jisubí bík lédílo gímíntoku. Bottén kéréngkopé taniyé bík lédílo gímínna bím appíːlokké ní:rumbomkang.
25 Odokké odo dítak yí:la:nyíko i:yé bidla kínggípé kiladuːné miméko dungngai. 26 Kinam-kaːbiːnékídíːdok bím kaːbinamkídíːdé bíkképé airuːpé kidagai, odokké bí bík kanam appíngém pidamto, émgom aitayingém aiyangoːmapé ikang. 27 Édílo bí Jisumé tatpaːsutoji, bí taniːkérédokké bík lamkudoːpé gísa:la bík gétémnam galugdok gakkíto, 28 kapilaːné bí méːto, "Ngo bík génamdém gakkímíloi, ngo ésaːyéku."
29 Oddar bík i:dé bidngasukang odokké bí bík kinamdokké aikangku émna bík amírdo anpaːsuto. 30 Odokké oddar Jisubí bíkkolokké tornamé gílenkang émna anpaːla bí kéréːdok araːdo ngenggeːla tauto, "Sé:ko ngok galuksok gakkíton?"
31 Bíkkol luyírsunékídíːdé lulatsutoku,"No kangkítok taniːkídí:sé nom níːrumnadung, émpém no kapé taulangkan, 'Sé:ko ngom gakkíton émna?' "
32 Émpige:la sé:ko bím gakkíton édém kaːpé émna Jisubí ngenggotíto. 33 Odo édé né:dé, okko bíkkolo kapikaːji édém kingeːla, bí gíaːla bík alédo lébíːtungala pésola jinna, bím aro appíːdém lubisuto. 34 Jisubí bím luto, "Omma, nok mé:jíksunamdé nom ésaːmotakku. Ansíngoːpé gíkangku odokké nok kikínkimíndokké ésangkangkulangka."
35 Édílo Jisubí agom lulangí dungngan, murong-okum migom Jairaské okumdokké taniːékké gído. Odokké bulu luto, "Nok omédé sikang, édémpila kapila luyírnémé gídírgísomoyébon?"
36 Bulu okkom lutoji édém tadmaːnémpé igeːla, Jisubí murong-okum migomdém luto, "Pésoyok; méngkoːsutok." 37 Bí sé:komsin bík lédílo gímínmotoma, émpigeːla Pitormé, Jemsmé odokké bík bíro Jonmé gíjonsuto. 38 Édílo bulu Jairaské okumpé gípíːton, Jisubí taniːkídíːdém denggela sagígíla bottépé kabla duːdopé ka:to. 39 Bí gíanggeːla bulum luto, "Kapila siddík denggela kabladun? Ko:né:sé simaːumpé yublaːmíndun."
40 Émpige:la bulu bím yírkaːto. Bí bulum appíngém urrennígnam lédupé, bí ko:né:dok ané-abudémnaː bíkkol duːné luyírsunékídí:dém gíbola, okolo ko:né:dé dun odoːpé gíkang. 41 Bí koːnéːdok alagdok sogabgeːla bím luto, "Talita koum!" (okodok légíːdé "Ko:néngoua, ngo nom ludung, daropto!").e