MRK 6

Jisumé Oko Taon Najareddo Bím Lupagnam

(Moti 13.53-58; Luk 4.16-30)

Jisubí odokké gípagla bíkkol luyírsunékídí:dém gíjonsula buluk aíké taonpé gítoku. 2 Odokké Yoddo longédo bí murong-okumdo luyírbito, bík luyírnamdém bulu tadla tadngaksula bulu luto, "Bí okolok sémbulum paːton? Kapin mé:joːnammém bím bitang? Bík alakki kapin méːpílaːmaːnam agerém gerdunǃ 3 Bí ísímistiridéːma:nei? Meriːké ao odokké Jems, Jusep, Judaːkélaː Simonké bírodé:ma:nei? Bík bírmékídí:dé ngoluk lédílo sido duːmínmaːnei?" Odok lédupé bulu bím lupakto.

4 Jisubí bulum luto, "Lungor-lunékoném appíːloi ménggésudag, émpigeːla bík aíké taondo ménggésuma, bík aí:taniːkídíːdoːla bík aíké okumdo ménggésunamém paːmang."

5 Kiné tani:ékkém bík alakki riːyidbigeːla bulum aimokunamdok ru:yipé, bí odo méːpílaːmaːnam agerém aːkosin ilaːtomang. 6 Bí taniːkídíːdok méːjíksunamé kamanamdém kaːla méngaksukang.

Jisubí Yí:laːnyídém Mélennígnam

(Moti 10.5-15; Luk 9.1-6)

Odokké Jisubí do:lu do:luːloːpé gíla taniːyém luyírbito. 7 Yí:laːnyídém bíkkodoːpé goggeːla, bí bulum annyi annyipé mélenníkto odokké bulum aiman yalokídí:dém ménennaːdopé ilang-gílangém bito. 8 Bík luyírnamkídíːdé séːbuluaiː "Noluk gídodo tukunoːngko bomnang odok ru:yipé okkomsin bomyok-pitangém, sogéném, odokké noluk ígíng jinrégdo murkongém bomyok. 9 Létagém gélang émpigeːla galugém bomsedyok. 10 Édílo nolu okumkolo gírasudoji, édé taondém mépagla gíkumaːdodoːpé oddung duːlang. 11 Nolum okolai boríksumaːmílo odokké noluk agomém tadmaːmílo, édílo nolu odokké gílendokuji odo noluk alédok bagabné lékamdém buluk kekonpé lukanbikunam kísapé lépaksulang."

12 Bulu gílenna taniyé méngkutsudokupé lugoːbito. 13 Bulu bojéko buttom ménnento odokké bojéru:ngko kiladuːné taniːyém tulangém yonbila ésaːmotoku.

Jon Baptismé Mokenam

(Moti 14.1-12; Luk 9.7-9)

14 Jisubí appíːloi amin-gígénammé, migom Erodbí édém tadbeksuto. Kapéné akke luto, "Jon Baptisbí sikolokké turkangku, édémpila méːpílaːmaːnam ager gernan tornamé bíkkol dung."

15 Akedé ludag, "Bí Elijaːbí."

Séːkai séːkai ludag, "Lekeké lungor-lunékídíːdok araːdok bí lungor-lunéko."

16 Émpige:la édílo Erodbí édém tattoji, bí luto, "Jonbí, sikolokké turdungkué, bík tukkom ngo papírmokaǃ" 17 Erodbí aíé Jonmé sogabdopé lulíkka, odokké bí bím yénggabgeːla makanaːlo tumka. Bí bík bíro Pilipké yamné Erodiaːké légangé édémpé ito, séːkom bí midaːmotang. 18 Kapilaːné Jonbí Erodmé lutídaggai, "Nok yignédém yamnépé laːnamdé laːmurdag."

19 Édémpila Erodiaːbí Jonké tayéːlo kínggípé aglíngé saːla bím mokepé méːto. Émgom bí paktomang, 20 kapilaːné Erodbí Jonmé pésodaggai odokké Jonbí arolok-duːnékolaː angunné taniːko émna kinna bím dagribomdungai. Édílo Erodbí Jonké luyírnammém taddungan, odo bí murdagai; émgom bí bík agomém méːpola taddungngai.

21 Émpige:la ainé longéko aːngkang, édílo Erotké onam longédé aːla bí bík migom-agergernékídíːdém, opisarkídíːdém odokké Galiliːdok midumkídíːdém apin dojonsupé gokto. 22 Édílo Erodiaːké omédé gía:la soːbiton, bí Erodméla: bík mibokídíːdém méːyumsumoto. Migomdé koːnéːdém luto, "No okkoméi lagidagji ngokkolok kotok, ngo nom édéméi bipé." 23 Odokké bí bím pesubito, "No okkoméi ngokkolok koyéji, ngo nom bipé, ngok migomdokosok orpongkogomsin bipé."

24 Koːnéːdé gílenna bík anédém tauto, "Ngo okkom koyen?

Bí lulatsutoku, "Jon Baptiské tukkudém kotok."

25 Odokké koːnéːdé oddar migomdoːpé duganggekula luto, "Ngok laginamdé, suːpagar no ngom Jon Baptiské tukkudém arémkolo bi."

26 Migomdé airu:pé méːdírkang, émgom bí pesubinam légaːpélaː mibokídíːdok légangé, bí bím lupaksulíːtomang. 27 Édémpila migomdé lomdanna kanggabla duːné maglíngkoném Jonké tukkudém bomadokupé lulígla mélíkto. Bí gíla makanaːdo bík tukkudém papírto, 28 odokké bík tukkudém arémkolo bomdoku, odokké édém koːnéːdém bito, koːnéːdé édém bík anédém bitoku. 29 Édílo Jonkol luyírsunékídíːdé édém tadbeksuton, bulu gíla bík simaːdém laːtoku, odokké édém agokolo yusíːto.

Líːyíng Angngoko Tani:yém Domonam

(Moti 14.13-21; Luk 9.10-17; Jon 6.1-14)

30 Mélígnamkídíːdé Jisukodoːpé gíladgekula bulu okkom ikan odokké luyírbikan édé appíːdém lubitoku. 31 Odo bí bulum luto, "Nolu aíé ngok lédílo rongngamnékoloːpé gímíntok odokké ajjiko duːrasupolai." Kapila:né bojéko taniyé gípadla duːnammé bulu donan ayírkosin paːmangai. 32 Édémpila bulu aíé ollungko koːbomna rongngamnékoloːpé koːlagíkang.

33 Émpigeːla bulum gípagdopé kaːné bojéko taniyé bulum kangkinto, édémpila taon appíːdokké bulu aléki dugla gíla bulumyang odoːpé gípíːpoyaːto. 34 Édílo Jisubí gípíːla botténé kéréngkopé taniːyém kaːbektoji, bí bulum ayaːpé-méːto, kapilaːné bulu kaːsíné kaman meːrémpé iladung. Édémpila bí bulum bojéruːngkopé luyírém luyírbito. 35 Yummayíré aːnammé bíkkol luyírsunékídíːdé bíkkodoːpé gíge:la luto, "Ngoluk dungkosé airuːpé araːdag odokké yummayírsinduːbo; 36 édémpila taniːkídíːsém mélíktokubo, odo bulu kérang-kétakké aríg ikoloːla doːloungkídíːdoːpé gíla buluk légaːpé donamém résulaːyépé."

37 Émpige:la bí lulatsutoku, "Nolu bulum o:kaiko dodopé bitopén."

Bulu bím luto, "Émpém ngolu língko annyi dinari arék donamém régeːla bulum dobopéi?"

38 Bí bulum tauto, ''Nolukké éddíko pitangé dun, gígeːla kaːta?"

Odokké édílo bulu paːtoji, bulu luto, "Pitang borngokolaː ongo pirnyiko dung."

39 Odo Jisubí bulum appíngém gípum gípumsula géjígné nésin tayéːdo teddopé lulíkto. 40 Édémpila bulu língko-língkokopélaː yíngo yíngokopé tetpumsuto. 41 Odo Jisubí pita: borngodémnaː ongo pirnyidém langgeːla tayéːto:pé ngesaːto, aipai bigeːla pitangkídíːdém pennírto. Odokké taniːkídíːdém orbidopé bí édémbulu luyírsunékídíːdém bito. Bí ongo pirnyidémsin buluk appíngké araːdo orpansubito. 42 Bulu appíngé dola dotísukang. 43 Odokké bulu yíːlaːnyí gempakopé dongadnam pitangémnaː ongngom tíkumsutoku. 44 Odok dobonam milbong taniːkídíːdé líːyíng angngokai.

Jisuké Asi Tayeːdok Lambégínam

(Moti 14.22-33; Jon 6.15-21)

45 Édílo Jisubí taniːkídíːdém urríktokun bí bíkkol luyírsunékídíːdém lomdanna olluːdo saːla bímyang koːpoːyaːla Betsaidapé gínoːmoto. 46 Bí bulum mélígamkunam lédupé, adiː tayéːpé kumkolo gísangkang. 47 Édílo yumédaggabon olluːdé pa:taːdok pongkodo dungngai, odokké Jisubí atéroːdé témpído duːtétkang. 48 Luyírsunékídíːdém airuːpé ngalatsula olluːdém koːla gídopé bí kaːto, kapilaːné ésardé bulum sarradbomdagakui. Porokkodí ayírdo bí asi tayéːdok lambégíla bulukkodoːpé gído. Bí bulum gíbaddungaboi. 49 Émpigeːla édílo bulu bím asi tayéːdo lambégídopé kaːtoji, bulu uiːyé émna méːla jéːsangkang. 50 Kapilaːné bulu appíngé bím kaːla yallo gíla pésokang.

Émpigeːla oddar bí bulum lubisula luto, "Asiné kínggítok, sidé ngoːmíné; pésoyok." 51 Odo bí buluk lédílo olluːdoːpé reːsaːto, odokké ésardé sarngasukang. Bulu appíːdé kínggípé méngaksukang, 52 kapéné bulu líːyíng angngo taniːyém pita:dobonamdok do:yi:dém kintomang; buluk asiné tordaggai.

Jisubí Genesareddo Molaːmaːném Ésaːmotoku

(Moti 14.34-36)

53 Édílo bulu kongkotoji, bulu Gennesaraddo konganggeːla odo ollu:dém rínggapto. 54 Odokké bulu olluːdokké gíidannaméi, taniːkídíːdé Jisumé kangkinto. 55 Bulu dugla gíla édé moːtag appíːdok kiné-ramném bí okoloi dung émna bulu tattoji odoːpé bulu bulum asuptéːtépé joːbomto. 56 Odokké doːlungkídíːdo, taonkídíːdomanggom aríkkídíːdo okolopéi bí gítoji, bulu kinném réko-kokokídíːdo duːmoto, bulu bík galug tuːyidéméi bulum gakkímodopé bulu kumdanna luto; odokké bím gakkíné appíːdéi ésangamkangku.