Taːtobuluk Ilod-gíloddém Mopidnam
(Moti 15.1-9)
7
Odok lédupé Jerusalemdokké gíné Parosikídíːdéːla luro luyírné ékké Jisuké kéraːdo gíkumsuto. 2 Odokké bulu bíkkol luyírsuné ékké lasuksumapé doːabomnamém kaːto okodé naréman agerén.3 Kapéné Parosiélaː Jiudi tani appíngé buluk taːtobuluk luyírbinamém ibomdagː édíloːpé bulu buluk alagém ibom-gíbomnam kísapé supusumaːji odoloːpé bulu domang. 4 Édíloi bulu réko-kokolokké gíaːdokuji odokké édílo:pé írsukumaːji odoloːpé bulu doma-tíːmang. Odok-tayéːpé bulukké bangkí-bangkíné ilod-gílodé dung, bati béːpunam, tekeli notpunam, gonti béːnam odokké tetkom kagarnam.a
5 Édémpila Parosikídíːdéːla luro luyírnékídíːdé Jisumé tauto, "Kapila nokkol luyírsunékídíːdé taːtoyaːyobuluk ilod-gílotkídíːdém ibomna duːman, bulu lasuksumaːpé dodun?"b
6 Bí bulum lulatsuto, ''Séumonékídínga, noluk tayéːlo Jisoyaːbí kabodopé lugaptag; bí sémpé adla léːtagː
'' 'Édé tani:kídí:dé buluk nappangki ngom ménggésudag,
émpigeːla buluk asiné ngokkolokké bojéruːngko moːtéːpé duːdag.c
7 Buluk ngom kumnamdé agerkamang,
kapilaːné bulu taniːlok luyírém ngok luroé émna luyírdag.'
8 Nolu Ruːnék lulígnamkídíːdém mépagge:la taniːlok luyírém ibomdag.''
9 Odokké bí bulum luto, "Noluk lekeké ilodgílotkídíːdém iyardopélaː Ru:néké Luroːdém lupaksunané nolukké ainé lambéko dungǃ 10 Kapéné Musiːbí lutag, 'Nolu noluk ané abbom ménggésulang,' odokké 'Sé:kobí bík ané abbom pelígyéji; bí sipéruːnammé.'d 11 Émpigeːla nolu luyírdag séːkai bík aíké ané-abbom sémpé lumílo, 'Ngo nolum oko okkom kaːdumsupénamman édémbulum korbantage' (édé Ruːnémé aman kísapé binamé), 12 odo nolu bím bík ané-abudok légaːpé okkomsin imomaːbong. 13 Édémpé nolu noluk ilodgílotki Ruːnéké agomdém arékamaːdopé sappagdag. Odokké édémpin bojéruːngko agerém nolu gerdag.
Okko Taniːkoném Naré:maːnép Imodang
(Moti 15.1-20)
14 Odo Jisubí tani: kéréːdém lékoda bík kéraːdoːpé goggeːla luto, "Nolu appíngé, ngok lunamsém tadgeːla sém tatkinnang. 15 Ru:yíːlokké gíaːné okkosin taniːkoném naréːmaːnép imolaːmang; édémpimap taniːlok araːlokké oko okko gílendoji, édébulupag taniːyém naréːmaːnép imodag." 16 f Séːkkaiké yerungé duːmílo bím tadmotok.
17 Odokké édílo bí taniːkídíːdém mépagla okumdoːpé gíaːton, bíkkol luyírsunékídíːdé bím édé luyisunamdok légí:dém tauto.g 18 Bí tauto, "Nolu airuːpei makkordang? Nolu kaːbegmaːnei ruːyidokké araːpé gíané okkosin tani:koném naréːmaːnépé imolaːmang?h 19 Dolígnammé araːpé gíaːdag, asindoːpémang, émpigeːla akidoːpé gíaːdag, odokké édém elennígdakku. Édémpé lubila Jisubí appíng donamé naréːdag émna lukanbito.
20 Bí luyartíto, "Okko tani:kolokké gílendoji édé taniːkoném naréːmaːnépé imodag. 21 Kapéné ara:bokké, tani:lok asin ara:bokké- aiman mé:loddé, laːnggonammé, dopsonammé, mokenammé, benggonammé 22 méːbonammé, aima:ném méːnamé, yadgonam, la:pé ménggonam, dígnam, aimang émna lupagbinam, pugdapé-méːsunam odokké makkorné. 23 Séː aiman appíːsé araːbokké gílendag, odokké édébulu taniːkoném naréːmaːnépé imodag.
Mimékolok Méːjíksunam
(Moti 15.21-28)
24 Odo Jisubí édém mépagla Tayar+ \fr 7.24 \ft Ake akelo Tayarélaː Sidoné émna attag moːtakpé gíkang. Bí okumkolo:pé gíaːto odokké édém séːkomsin kinmolíːtoma; émgom bík odok duːnamdém amme kinapto. 25 Mimékolok ajjiːoné omékoném aiman-yallo paːla léːtagai, édílo bí Jisum tatpaːsuton lomdanna bíkkodoːpé gíla bík alédo oangkang. 26 Édé mimédé Jiudiman opínkai, bí Siriadok Poinesia moːtagdokkai. Bík omédok butudém ménnenbidokupé bí Jisumé kumdanna luto. 27 Émpigeːla Jisubí bím luto, "Ommangémi dotísupo:motok, odokké omma:lok donamém laːpaggeːla ikiém érrígbinamdé kaboné agermang."
28 Bí bím lulatsutoku, ''Arro, Ruːtuma; émgom doko kéígdok duːné ikikídíːdé koːkangkídíːdok dopidnam pimpirém dodag."
29 Odo bí bím luto, "Sémpin lulatsukunam légaːpé, no gílaːdakkubo; butudé nok omédokké gílenkangkubo."
30 Bí okumpé gílangkula omédém asubdo kédla duːdopé paːto; odokké butudé gílenkangku.
Jisubí Ru:benélaː Gommanéko Ésaːmotoku
31 Odo Jisubí Tayar kéraːdokké mépagla gíla, Sidondok gípadla Galili Paːtaːpé gítogla, Dikapolis moːtakpé gíto. 32 Odo tani ékké ru:bené taniːkoném séːko gommadagan bíkkodo:pé gíbodo, odokké taniːdok tayéːdo bí bík alagém pigabbidopé taniːkídíːdé kumdanna bím luto. 33 Jisubí bím tani:kídíːdokkém gíyodbogeːla, bík yeru bornyiːdo bík lagném nígaːlíkto. Odokké bí takírém sukkadgeːla bík ayodém gakkíto. 34 Odokké Jisubí tayéːtoːpé ngesanggeːla bottépé sagígíla bím luto, "Epapataǃ" (Okodok légí:dé, "Tadbeglubekka:langka).
35 Oddar taniːdok yeruːdé tadbekkangku, bík ayodé rémakkangku, odokké bí tatpoːpé agomém lulangkangku. 36 Jisubí bulum séːkomsin okkomsin lubimaːdopé lulíkto. Émpigeːla bí éddíko lutumtoji, bulu odogíngkíddíːko édém luyangoːbiyato. 37 Odokké tadné taniːappíːdé méngaksula luto, "Bí appíːdém aiyopé ito; bí ruːbeném tadbegmotoku odokké gommaːnédémsin agom lulamotoku."