Jisubí Lí:yíng Appiko Taniːyém Domonam
(Moti 15.32-39)
8
Odo longíngkídíːdo bojéruːngkopé taniyé édílo lékoda gíkumsutoji, bulukké dopénammé okkosin kamanammé, Jisubí bíkkol luyírsunékídíːdém bíkkodoːpé goggeːla luto, 2 "Sé: taniːkídíːsém ngo airuːpé ayaːpé-méːdung, kapilaːné bulu ngok lédílo loumkopé duːmínna dung, odokké bulukké dopénammé okkosin kamang. 3 Ngo bulum kénong kénoːpé okumpé mélíkkumílo; bulu lambédo kéttablaːdo; kapéné bulukkolok akke airuːpé moːtéːlokké gídung."4 Bíkkol luyírsunékídíːdé bím lulatsutoku, "Séː sullipotaso taniːkoné siddín taniːyém kapé okolok paːla donamém doboyen?"
5 Jisubí bulum tauto, "Nolukké éddíko pitangé dun?"
Bulu lulatsutoku, "Kínítko."
6 Bí taniːkéré:dém amo:do teddopé lulíkto. Odokké pitang kíníddém langgeːla aipai bito, odokké édémbulum pennírgeːla taniːkéréːdém ordopé bíkkol luyírsunékídíːdém bito; odokké bulu édémbulum taniːkídíːdo orbito. 7 Bulukké apir-pirnyiko pirmen ongngosin dungngai; bí ongokídíːdok légaːpé aipai bigeːla édémbulumsin taniːkídíːdém orrígbidopé lulíkto. 8 Bulu dola dotísukang, odokké orngadnamdém bulu gempa kínítko biːdopé tíkumsutoku. 9 Odo lí:yíng appikíramkopé taniyé dungngai. 10 Bulum mélíkkunam lédupé; bíkkol luyírsunékídíːdok lédílo lomdanna olluːdo saːla, Dalmunutaa mo:dumpé gíkang.
Parosikídí:dé Kanggotko Manam
(Moti 16.1-4)
11 Odo Parosi ékké gíla bík lédílo lukerkaːmínsuto. Bulu bím anka:la, tayéng-amo:tok kanggotko koto.b 12 Bí kínggípé sagígíge:la luto, "Kapila séː opesé kanggotko madun? Ngo nolum arodém lubidung, séː opesém oko kanggodémsin léngkanmaːyé." 13 Odo bí bulum mépagla gíla olluːdo lékoda saːla kekonpé kongkola gíkang.
Parosilogla Erotké Luyírnam
(Moti 16.5-12)
14 Luyírsunékídíːdé píːnamkopé pitangém bompénamdém mitpansuto, bulukké pitang aborongko buluk lédílo olluːdo dungngai. 15 Jisubí bulum lupangém luto, "Nolu totsulang, Parosilogla: Erotkéc ka:rdokkéd ansulduːlang."e
16 Bulu akoné akoném luposugeːla luto, "Ngolukké pitang kamanamméi sémpé ludung."
17 Buluk luposunamdém anpínggeːla, Jisubí bulum tauto, "Nolu kapila pitang kamanamdok agomém ludun? Nolu suːpésin kaːlasin kinma:danei? Noluk asiném su:pésin kapila tormola léːtang?f 18 Amigé dunggela nolu kaːbegmaːnei, odokké yerungé dunggeːla nolu tadbegmaːnei? Odokké nolu méːpamaːnei? 19 Édílo ngo líːyíng angngo légaːpé pitang borngoko pennírka, nolu éddíko gempé biːdopé pennírnam pitangém tíkumsukakun?"
Bulu bím lulatsutoku, "Yíːlaːnyíko."
20 Odokké édílo ngo líːyíng appidok légaːpé pitang kínítko pennírkan, nolu gempa éddíkopé biːdopé tíkumsukakun?"
Bulu lulatsutoku, "Kínítko."
21 Bí bulum luto, "Nolu suːpésinei kinma:dan?"
Jisubí Miglun Taniːkoném Betsaida:do Kaːbegmotoku
22 Bulu Betsaidado:pé gíkang, odokké tani ékké miglun tani:ko gíbola bím Jisubí gakkíbidopé kumdanna luto.g 23 Bí miglun taniːdém alagdok sogabgeːla do:luːdokké ruːyipé gílenbokang. Odokké bí taniːdok amigdo sugrumníggeːla bík tayéːdo alag pigabgeːla bí bím tauto, "No ka:begdagye?"
24 Taniːdé bérsangge:la luto, "Ngo taniːyém ka:pa:dung; émpigeːla bulum ísíngémpé gígodopé kaːdag."
25 Odo lékoda Jisubí bík alagém bík amigdo riːyidbito; odo bí amigdém darnammé kaːbekkangku, appíngém naréngoːpé kaːbekto. 26 Jisubí bím sémpé lugeːla bík okumpé mélíktoku, "Doːluːdo gíaːpoːyoku."
Pitorké Lukanbinam
(Moti 16.13-20; Luk 9.18-21)
27 Jisubí:la bíkkol luyírsunékídí:dé Kaiseria Pilipidok kérangké do:lungkídí:do:pé gíkang. Lambédo bí bulum tauto, "Ngo séːkobí émna taniyé ngom ludang?"h
28 Bulu bím lulatsutoku, "Akke no Jon Baptistbí; akoné Elija:bí; akedé no lungor-lunékídíːdok aːko émna ludag."
29 Odo bí bulum tauto, "Émpigeːla noluka ngo séːkobí émna ludon?"
Pitorbí bím lulatsutoku, "No Kiristobíi."
30 Jisubí bulum séːkomésin édém lubimaːdopé lutumto.
Jisubí Bík Sinamdém Lunobinam
(Moti 16.21-28; Luk 9.22-27)
31 Odokké bí bulum luyírbito, Tani:ké Aoːbí bojéruːngko duːgém dopoyé odokké midumkídíːdé, abíné miríkídíːdéːla luro luyírnékídíːdé bím topaksuyé. Bím mokeruːyé odokké loum lédupé bí lékod-turyéku. 32 Bí édém tatkinnadoːpé lubito, édémpila Pitorbí bím gíyodbogeːla édémpé ludag émna ge:to. 33 Émpigeːla Jisubí ngelatsula bíkkol luyírsunékídíːdém kaːto, odokké bí Pitormé morítto, "Uiːya, no ngok kéraːsokké géːrkangǃ" Odokké bí luto, "No Ruːnéké agomém méːmang, émpige:la taniːké agomém mé:ladung."
34 Odo Jisubí bíkkol luyírsunékídí:dok lédílo tani kéréːdém goggeːla lutoː "Séːkai ngok lédulo gímínmílo, bí aíém topaksupa:yé odokké bík kurusdém joːla ngok lédulo gímínpaːyé. 35 Kapéné séːkobí bík iji-yalodém turmola léːpé mé:duji, bí édém yogmoyé, émpigeːla séːkobí ngok légaːpélaː tatpon lutaddok légaːpé bík iji-yalodém yogmodagji bíkkédém moturbiyé. 36 Taniːkolokképé oko ainamén bí moːpísok appíngém panggeːla, aíké turnamdém yokpagmomílo? 37 Nok iji-yalodém paːlatkunam légaːpé no okkomsin bilaːmang. 38 Séːkoi ngomnaː ngok agomém séː benggonélaː aisíːman opesok kanggaːlo anyisumílo, édílo Taniːké Aoːbí bík Abuké unjíglo tayéng-yaːmekídíːdok lédílo gíladyékuji odo bíːsin bulum anyiyé."