MRK 13

Kumliːdém Momígnamdém Lubinam

(Moti 24.1-2, Luk 21.5-6)

Jisubí kumli:dokké gílendokudodo, bíkkol luyírsuné ako bím luto, "Luyír-abu, kangkítok, éddík pítan pítan ílíngénǃ Éddík botté bottén kangkanné okuménǃ"

2 Jisubí bím luto, "No séː botté bottén okumkídíːsém kaːdu:yé? Sido édémpin ílíng apíko kamaːyé okodé ílíng píkondok tayéːdo duːyaryéji, kapilaːné ílíng appíːdém gépagamledyé."

Ngasodélaː Ipusire

(Moti 24.3-14; Luk 21.7-19)

3 Édílo Jisubí kumli:dok kekondo Olib adiːdo tedla dungngan, Pitor, Jems, Jon odokké Andriubí bím ami-kinmangoːpé tauto, 4 "Ngolum lukítei, édílo édébulu iyen, odokké édémbulum ilet-gíledyébo émna léngkanan kanggotkídíːdé kappar iyen?"

5 Jisubí bulum luto, "Ansulang, odokké séːkomsin nolu yatkosuyok. 6 Ngok aminno bojéruːngko 'Ngoíng bí,' émna lusula gíyé, odokké bulu bojéːkoném yadyodbomyé. 7 Édílo nolu mimag monamémna: mimag moyé émna tatpaːsuyéji, kapé iyyan émna méːdíryok; édémpé ipaːruːyé, émgom itérdé aːyong. 8 Kapéné taniːopíné taniːopínnok kekonpé dagrobyé, odokké migomdokko migomdokolok kekonpé dagrobyé; mongké mongkélo taromotoné tonyé, angkalé aːyé. Édébulu ommang paːdílok aki kiroboːnam kísayé.

9 Émpigeːla nolu aíé ansulduːlang; kapéné nolum kébaːbangkolo tolígyé; odokké nolum murong-okumkídíːdo díːyé. Ngok légaːpé nolu amoːruːtumnoglaː migomkídíːdok kanggaːlo daksaːla bulum lubikupénépé iye. 10 Odokké tatpon lutaddém appíng réngamno lugoːbiporuːpaːyé. 11 Odokké édílo nolum sogabgeːla kébangém baːyéji, okkom kapé luyyan émna méːdírnoːla duːyok. Nolum okkom lumoyéji édém odo ayírdo lulang, kapéné édém nolu lumang, émpigeːla Angunné Yalodépag luyé. 12 Bírokoné bírokoném odokké abukoné bík aoːdém sidopé yadlígyé. Ommangé buluk ané-abukídíːdém dagríksuyé odokké bulum sidopé mélígyé. 13 Ngok légaːpé appíng taniyé nolum tayumyé. Émpigeːla séːkobí léduduridoːpé oijosula duːyéji, bím moturbiyé.

Míryadgédopé Pésokannam Ayír

(Moti 24.25-28; Luk 21.20-24)

14 Émpigeːla bélumkannédé okodé momígmosígmodagji, édílo nolu bím angunné kumliːdo dagla duːdopé kaːpaːyéji (ponném tatkinmotok), odo séːkobulu Judiado duːji bulu diːtékídíːdoːpé dukpítsulang. 15 Séːkobí selab tayéːdo duːji, bí aíké okumdok okkomsin langkakupé réːyila okum araːdoːpé gíayokuk. 16 Odokké séːkobí arígolo duːji bík galuk-gasorém langkakupé gíladyokuk. 17 Amírrokanékídíːdéːla anyuksunné anékídíːdok légaːpé édé longékídíːdé éddík míryadla pésokanyénǃ 18 Édé ngasoddé dígínno amaːdopé kumnang. 19 Kapila:né odo longékídíːdo sémpin bottéruːné-ngasodé aːyé Ruːnéké ruːnam tayéːso ruːlendokkébo siloːpé édémpin ngasodé édíloːsin angkímang odokké aːsinmaːyé. 20 Ruːtumbí édé longékídíːdém andéːmomangamílo, tani: aːkosin turmaːyai. Émpige:la balennamkídíːdok légaːpé, bí édé longékídíːdém andéːmoto.

21 Odo ayírdo séːkaibí nolum sémpé lumílo, 'Kangkítok, Kiristobí sidé dungǃ Kiristobí élé dungǃ' édém nolu méngkésuyok. 22 Kapéné aroman Kiristobíːlaː aroman lungor-lunné lenna balenamkídíːdém pagmílo yatpé méːla bulu méːpílaːmaːnam agerémna méngaksunam kanggodém léngkanyé. 23 Édémpila aíé ansulang; ngo nolum appíngém lunongambitagbo.

Taniːké Ao:ké Gílatkunam

( Moti 24.29-31; Luk 21.25-28)

24 Émpigeːla odo longékídíːdo, kínggín ngasoddok lédupé, doːnyitém kémomoyé, odokké poːlobí bík píangém pímaːyé. 25 Takaré doːmírtokké opagledyé, tayéng-amoːtok yalokídíːdém éngunmoyé. 26 Odo Taniːké Aoːbí mukkaːlo kínggíné tornamnoːla unjíglo gídokupé taniyé kaːbeksuyé. 27 Bí tayéng-yaːmekídíːdém mo:písok suːpidoːpé mélígla Ruːnék balennam taniːkídíːdém moːpísok sukken aːkodokké duːtérdoːpé gíkumsumoye.

Tajík Amídok Kinpénam Agom

(Moti 24.32-35; Luk 21.29-33)

28 Su:pag tajík amíːdok séː kinpénamsém kintokː Édílo odok réngkéngé rémagla otsuré nyinnendoji, odo díiye aːdobo émna nolu kindag. 29 Édémíːpé, édílo nolu sémbulum idopé kaːpaːyéji, nolu kinyé bí yabgodoːpé gípíːla kéraːpé píːdokubo émna. 30 Ngo nolum arodém lubidung, édíloːpé séː opesé sipomaːyéji, odoloːpé séː appíːsém ipoːmaːyé. 31 Tayéng-amongélaː mo:písé yogyépé, émgom ngok agomkídíːsé édíloːsin yogmaːyé.

Séːkosin Édé Longédémnaː Aːdídém Kinmang

(Moti 24.36-44)

32 Édé longédémnaː aːdíːdém séːkosin kinmang, tayéːtok tayéng-yaːmeyélaː Aoːbíːsin édém kinmang, émpigeːla Abubí atéroːdé édém kindag. 33 Totsula du:lang, ansuka:sulang, kapéné édé aːdíːdé édílo píngaːyésong édém nolu kinmang. 34 Édé tani:kolok doːyíngkonémpé idag, séːko bík okumém mépagla akon moːdumkoloːpé gídodo okumdém kaːsíːdopé bík pagbokídíːdém tolígdag, appíngém bík aíké aíké ipénam agerém tolígdag odokké yabgodok kanggabla duːnédém ansukaːsula duːdopé lulígdag. 35 Odok-légaːpé ansukaːsula duːlang, kapéné édílo okumdok ruːtumdé gíyékuji, yummayírdoyé, yuméyoːraːdoyé, porokkododoyé roːrokomdoyé, édém nolu kinmang. 36 Ékímaːmilo bí bagémpé gílangkula nolum yubla duːdopé paːpéké. 37 Ngo nolum okkom lubipénaméji édé appíːdém lubitagboː Ansukaːsula duːlang."