Jisumé Mokepé Émna Ruːsunam
14
Gíbo:la donam gí:díːdéːla kar lígmaːpé pitang donam gíːdíːdé loːnyongko dungngaboi, odo abíné miríkídí:déːla luro luyírnékídí:dé Jisumé ami-kaːmangoːpé kapé sogabla mokelaːyan émna lambéko magola dungngai. 2 Bulu luto, ''Gíːdí ayírarso ipoyo, émmaːmílo taniːkídíːdé urradyé."Betani:do Jisumé Írnam
(Moti 26.6-13; Jon 12.1-8)
3 Édílo bí Betaniːdo, ngero-roːnam Simonké okumdo apin doːpé émna tebuldo tedla dungngan, odo airu:pé arékan yonsunamko okodém nérkígné tulangki mantang kamponéla tupunné ílíngki monam botolko bomaːla néːngko gíaːdo. Bí botoldém tupporgeːla yonsunamdém Jisuk tukkudo yonnígbito.a 4 Émpige:la odok du:né taniːkídíːdok akke aglíng-saːla akoné akoném luto, "Kapila yonsunamsém isesiyedun? 5 Édém konamkaːmílo dítag akolok gerra paːnam murkongém abayangko paːla opanném bilaːyai." Odokké bulu bím aglíːlo luto.
6 Émpige:la Jisubí luto, "Nolu kapila bím lukiluaddun, bím atéroːpé duːmoto? Bí ngok légaːpé ainé agerko gerbitag. 7 Kapéné opanné noluk lédílo loːdém duːyaryé, odokké nolu édíloi méːyéji oddoi buluk légaːpé ainé agerko gerbilaːyé; émpigeːla ngo noluk lédílo loːdísém duːyarmaːyé.b 8 Bí okom ila:dagji édém ibitak. Bí ngok adin-amírsém yusíːnam légaːpé yonsunamdém yonbila moninsunoːbitag. 9 Ngo nolum arodém lubidung, mo:písok okoloi tatpon lutatsém lugoːbiyéji, bí okkom ibitagji édémsin, bím méːpaːnam légaːpé lubiyé."
Judaːbí Jisumé Yadla-Kopé Togésunam
(Moti 26.14-16; Luk 22.3-6)
10 Odo Juda Iskortiabí, yíːlaːnyidok aːko, Jisumé abíné miríkídíːdok alaglo yadla-kolígnam légaːpé gíkang. 11 Bulu édém tatpaːsula airuːpé méːpoːla bím murkongém bipé émna luto. Édémpila bí bím buluk alaglo tolíkpé émna solko magola duːto.
Ruːtumké Dobonam
(Moti 26.17-25; Luk 22.7-14, 21-23; Jon 13.21-30)
12 Ka:r lígmap pitang donam gíːdíːdok anggotpo:né longédo, édílo gíboːla donamdok meːr-aoːdém palígdoji, Jisukkol luyírsunékídíːdé bím tauto, "Ngolu okolo:pé gíla nok léga:pé gíboːla donamdém moninsuta émna no méːdang?"
13 Édémpila bí bíkkol luyírsunékídí:dok annyiko sémpé lula mélíkto, "Nogorolo:pé gíangkang, odokké nolu asi kiːlíngko joːbomné taniːko ríksuyé, bík lédulo gímínnang. 14 Odokké bí okoloi gíaːyéji odo okumdok ruːtumdém taulang, 'Luyír-abubí ludag, ngok mibo-dungko soyardé okolon, okolo ngo ngokkol luyírsunékídíːdok lédílo gíboːla donamdém dojonsuyén?" 15 Bí noyim donam légaːpé laginam appíngém tíla léːnam tayéngké bottén soyarko léngkanbiye, odo ngoluk légaːpé moninsunolang."
16 Luyírsunékídí:dé gíla nogordoːpé gíaːto odo Jisubí bulum lubikamardémpé attarkídíːdém paːto. Édémpila bulu gíbo:la donamdém odo moninsuto.
17 Édílo yummayírkaːji odo bí yíːlaːnyidém gíjonsula gído.c 18 Édílo bulu tebuldo doladungngan odo Jisubí luto, ''Ngo nolum arodém lubidung, noluk araːsok aːko, séːko ngom dojonsulduːji, bí ngom yadla-kopagyé."
19 Bulu mé:díramkang odokké ako akopé bulu bím luto, ''Édé ngoma ayi?''
20 Bí bulum luto, 'Édé yíːlaːnyidok aːko, sé:ko ngok lédílo pita:dém batiːdo jí:lígduːji. 21 Taniːké Aoːbí bím adla léngkamdémpé siyé, émpigeːla méːdíré édé taniːdoːpé séːko bím yadla-kopagyejiǃ Édé taniːdém omanamkaːmílo bíkképé aiyayai."
22 Odokké buluk dola du:dodo Jisubí pitangko laːsangge:la aipai bige:la édém pentuːto odokké édém bulum bigeːla luto, ''Séː pitaːsém langgeːla dotok, séː ngok adiné.''
23 Odokké bí batiːdém laːsaːto, aipai bigeːla édém bí bulum bito, odokké bulu appíngé odok tíːto.d 24 Odokké bí bulum luto, ''Luségnamdoke ngok iːdé sidé okodé bojéruːngkolok légaːpé bidlenbidung." f 25 Ngo nolum arodém lubidung, ''Ngo lékoda angur a:yelok alangém tíːpongkumaːbo édé longédo:pé édílo ngo Ru:nék migomdokodo anu-tíːnamém tíngkumaːyeji.''
26 Édílo bulu kumnam-niːtomko gokton, bulu Olib adi:doːpé gílenkang.
Pitorké Lupaksunamdém Jisubí Lunoːbinam
(Moti 26.31-35; Luk 22.31-34; Jon 13.36-38)
27 Odok lédupé Jisubí bulum luto, ''Nolu appíngé opagledyé, kapéné édém adla lé:tag, 'Ngo meːr-ka:sí:nédém díːtabyé, odo meːrkídíːdém dukpitsumoyé.'g 28 Émpige:la ngok turkunam lédupé, ngo nolum gípoːyaːla Galili:pé gíyé.''
29 Pitorbí lusuto, ''Bulu appíngé opagleddaggom, ngo opagledmaːyé.''
30 Jisubí bím luto, ''Ngo nom arodém lubidung, siyumké yummarso porogé lémnyiko kogma:dapé, no ngom léumkopé lupaksuyé.''
31 Émpige:la bí kínggípé lusukang, ''Nok lédílo ngo simínruːpénamgom, ngo nom lupaksuma:yé.'' Odokké bulu appí:dé édémí:pé luto.
Getsimoniːdo Jisuké Kumnam
(Moti 26.36-46; Luk 22.39-46)
32 Odokké bulu Getsemoni émkodoːpé gíkang; odokké bí bíkkol luyírsunékídí:dém luto, ''Ngok kumdodo, nolu sido tetpoːto.'' 33 Bí Pitormé, Jemsmé odokké Jonmé bík lédílo gíboto, odokké bík tayéːlo méːdíréla ngasoddé angkang. 34 Bí bulum luto, ''Ngok iji-yalosé airu:pé méːdírdung, siyanggéduboːmín, so du:poːnggeːla annang.''
35 Ajjiːouko gígéngeːla bí amo:boːpé pogbumgeːla kumto, sém ilaːnamka:mílo, séː ayírsém ngokkolokkém gíbadmotei. 36 Bí luto, ''Abba, ngok Abu, no appíngém ila:dag, séː du:g donam batiːsém ngokolokkém langértei; émgom ngok méngkampémang, émpigeːla no kapé méːdagji édémpépag.''h
37 Odokké bí gíladlangkula bulum yubla du:dopé paːto. Bí Pitormé tauto, ''Simon, no yubngaksulaidun? No aːdí aːkoukosinnei darra du:la:toman? 38 Anna kumna du:lang odo nolu ankaːlo gía:ma:yé. Yalodé ilíːdag émgom, adin-amíré iddag."
39 Lékoda bí gíge:la édémíng kumtoku. 40 Édílo bí gílattokun, bulum lékoda yubngaksula duːdopé paːto, kapéné yummibatsula buluk amigdé idbomkang, odokké bulu bím okkom lupénamén édém kintomang.
41 Bí léumkopé gílatkunam lédupé bulum luto, "Nolu suːpésin yubngaksula yuptíla dun? Ayírdé píngangka:bo! Ka:toka, Tani:ké Aoːmé yadla-kopagla imurnékídíːdok alagdo tolígnan ayírdé píngangkaːbo. 42 Daroptoǃ Kajé ngolu gílaboi; kangkítok, ngom yadla-kopénédé sidé píngadobo.''
Jisumé Sogabnam
(Moti 26.47-56; Luk 22.47-53; Jon 18.3-12)
43 Bík agom lula duːdíːdo yíːlaːnyidok aːko, Judaːbí oddar gíaːdo. Bík lédílo abíné miríkídíːdok, luro luyírnékídíːdoglaː midumkídiːdok mélígnam kéréngkopé taniyé buluk alaglo yoksémnaː tukuném bomaːla gído. 44 Odo yadla-kopagnédé bulum kanggotko sémpé lula léngkanbito, ''Sé:koméi ngo dosugyeji bíːéibo édé tani:dé; bím sogabgeːla kanggabla gíbolangku."
45 Oddar Judaːbí Jisukodoːpé gígeːla luto, "Rabbiǃ" odokké bí bím dosukto.
46 Taniːkídíːdé Jisum laglígla sogapto. 47 Odo kéraːdo dagla duːnékídíːdok aːkoi bík yoksém sadlenna abíngaryan mirídok pagbodok yerungém papagbito. 48 Jisubí bulum luto, ''Nolu yoksém, tukuném bomna rodgoném sogapkolo gínam kísapé ngom sogapkapéi gídun?
49 Longé longgém ngo noluk lédílo kumli:do luyírbidungngai, émpigeːla nolu ngom sogaptomang. Émgom Ruːnék-gomugdém ilet-gílednam légaːpé sogapkolo gídung."j
50 Odo appíːdé bím mépagla dukpagamkang.
51 Okkomsin gémap sémígné gasorko yetposuné yaːmeko bík lédílo gímíndo, odokké bulu bímsin sogapto. 52 Émpige:la bí sémígnék gasordém mépagla pítsula dukpakkang.
Jisubí Kébaːdo Dakkansunam
53 Odokké bulu Jisumé abíngaryan mirído:pé gía:boto; odokké abíné miríkídí:dé, midumkídíːdéːla luro luyírné appíːdé gíkumsuto.
54 Pitorbí moːténgougampé bík lédílo gímínto, abíngaryan mirídok lottaːdo bí kanggabnékídíːdok lédílo tedmínna umí amsumínto. 55 Abíné miríkídí:déːla kéba:dok appíngé Jisumé mokelaːnam légaːpé bík kekonpé lubikunéko mago:to; émpigeːla bulu aːkosin paːtomang. 56 Bojéruːngko taniyé bík kekonpé aroman lukaném lubito émpigeːla buluk lunamdém lékokaːmínsutomang.
57 Odo akke daksaːla bík kekonpé séː aroman lukanbinamsém lubito, 58 ''Sé: kumli:sém okodém alakki motuːji édém ngo momígyé, bík édémpé lunamdém ngolu tattag, odokké loumno anguné asongko moye, émpigeːla taniːlok alakkimang."l 59 Émpige:la odosin buluk lukanbinamdé lékotomang.
60 Odo abíngaryan mirídé pongkodo daksanggeːla Jisumé tauto, "Sé: taniːkídíːsé nok kekonpé okkom lukanbiduːji, édém lulatsukupénam nokké okkosinei kaman?"
61 Émpigeːla bí okkomsin lulatsukumaːpé asoːpé dungkang. Abíngaryan mirídé bím lékoda tautoku, ''Ayang-paːnédok Ao, édé Kiristobíːi noi?"
62 Jisubí lulatsutoku, "Éː Ngoːda bí; odokké Taniːké Aoːbí Kínggíːtaríːné Atérké lagbíkpé tednamém odokké tayéːtokké mukkaːlo gíkunammém nolu kaːbegyé."m
63 Odo abíngaryan mirídé bík galugém bupetsugeːla luto, ''Kapila suːpaksin ngolum sémyang lusedbinam lukanbinamko lagidang?''n
64 Ruːném luka:namdém nolu tattagbo.
Nolu okko émna méːdang?"
Bulu appíːdé bím sinam paːpéné imurnép-sappakto.o
65 Odo akke bím takírém sugrumbomkang, akedé migmodém uːrumgeːla díːto, odokké sémpé luto, ''Saː lungor-lutobopén!'' Odokké kanggabnékídíːdé bím dínggeːla gípagbokang.
Pitorbí Jisumé Lupagnam
(Moti 26.69-75; Luk 22.56-62; Jon 18.15-18,25-27)
66 Pitorbí kéíkké lottado du:dodo, abíngaryan mirídok pagnéko gíla, 67 Pitormé umí amsula duːdopé ka:to, bí bím kaːmíla kanggeːla luto, "Noːsin Najaroddok Jisuké lédílo dungngai."
68 Émpige:la bí sémpé lula édém lupaksuto, “No okkoméi ludu:song ngo kinsinma odokké tatkinsinmang .” Odokké bí séːtur kéraːdoːpé gílenkang. Odokké oddar porogé kokkang.
69 Odokké pagnédé bím kaːla odok dagla duːnékídíːdém lubito, “Séː tani:séːsin bulukkolok aːko.” 70 Émpigeːla lékoda bí lupaksuto.
Odokké asudouko duːnam lédupé dagla duːnékídíːdé Pitormé luto, "Aroruːpé no bulukkolok akorungko; kapéné no Galili taniːkoda."
71 Émpigeːla bí aíém peliksula pesubidanna lubomkang, “Noluk lubomna duːnam taniːdé séːkosong édém ngo kinmang."
72 Oddar porogé kogropkoda kokkang. Odokké Jisubí okkom bím lukaːji édém Pitorbí méːpaːtoku, “Porogé lémyikopé kogmango:dapé no ngom léumkopé lupaksuyé.” Odokké bí airuːpé duːgla asiné bedgédopé kapto.