Piladbí Jisum Kébaːbaːnam
(Moti 27.1,2,11-14; Luk 23.1-5; Jon 18.28-38)
15
Roːrokomdo abíné miríkídí:dé, midumkídí:dé, luro luyírnékídí:déːla Kiːnikébaːdok appíːdé ru:sékkosékto. Bulu Jisum yebomna gíbolgíla Pilatké alaglo tolíkto. 2 Odo Piladbí bím tauto, “No Jiudikídíːdok Migomdéi?” Jisubí bím lulatsutoku, “Noːmín édémpé ludun.” 3 Abíné miríkídí:dé bím bojéruːngko lugéngém lujémto. 4 Édémpila Piladbí bím lékoda tautoku, “Nokké lulatsukupénamé okkosin kamaːnei? Kangkítok, nok kekonpé bulu éddíko lujémnammém bomatang." 5 Émpige:la Jisubí okkomsin lulatsutomang, édémpila Piladbí méngaksukang.Jisum Mokedopé Lulígnam
(Moti 27.15-26; Luk 23.13-25; Jon 18.39; 19.16)
6 Odokké gíːdíːlo makanaːlok léːnam taniːkoném, séːkom taniːkídíːdé kodokuji, bím mélenníkkunam ibom-gíbomnamko dung. 7 Migom kekonpé dagrobnékídíːdok lédílo tumna léːnam, Barabbas émnam taniːmokené taniːko makanaːdo dungngai. 8 Édémpila taniːkídíːdé gísaːla Piladbí bulum okkom ibidoji édém ibidopé lurobbomkang. 9 Bí bulum tauto, “Jiudilok migomdém noluk légaːpé mélennígbidokupé nolu ngom méːdagnei?" 10 Abíné miríkídíːdé dígla:yém bím bík alagdo tolíktag émnamdém bí kinpíːto. 11 Émpige:la Piladbí Jisum mélenníkumaːpé Barabbasmé mélennígdokupé abín miríkídí:dé taniːkídíːdém luːurríkto.a 12 Édémpila Piladbí bulum lékoda tauto, “Ékímaːmílo noluk lunam Jiudikídí:dok Migommé ngo kapiyén?" 13 Bulu jéːla luto, “Bím kuruslo pítketok.” 14 Piladbí bulum tauto, “Kapila, bí oko imurém iton?" Émpigeːla bulu jé:yangokang, “Bím kuruslo pítketok!” 15 Taniːkídí:dém méːyumsumolíːla Piladbí buluk légaːpé Barabbasmé mélennígbitoku. Odokké Jisum sabukki díːmoge:la kuruslo pítkedopé tolíkto.
Maglíngkídí:dé Jisum Luka:nam
(Moti 27.27-31; Jon 19.2,3)
16 Odo maglíngkídíːdé bím Rajbobondok arangké lottaːdoːpé gíabokangku, odokké bulu akon maglíng appíːdém gokkumsuto. 17 Bulu bím ba:yomné galukko molíkto, odokké tanglok dumlupko bulu pogeːla édém bík tukkudo kublíkto. 18 Odokké bulu bím kumríksula luto, “Írroi Jiudikídí:dok migommé!” 19 Odokké bulu dorbumki bík tukkudok rantto, odokké takírém sugrumto. Bulu bím lébíːtumna kumríksuto. 20 Bulu bím lukaːnam lédupé, baːyomné galugdém bíkkolokkém pítpaggeːla bík aíké galugdém molíktoku. Odokké bulu bím kurusdo pítkekolo gílenbokang.
Jisum Kurusdo Pítkenam
(Moti 27.32-44; Luk 23.26-43; Jon 19.17-27)
21 Odo Alegjendarkélaː Rupuské abu, Simonbí, séːko Sireni nogordok taniːan, bí doːluːdokké odok gípaddokuém, maglíngkídíːdé bím bolbodapé Jisuké kurusdém joːmoto.b 22 Bulu Jisum Golgotadoːpé gíbokang (okodok légíːdé kulong kako). 23 Odokké bulu bím kuseré molusnam apongém bito; émpigeːla bí édém tíːtomang. 24 Odokké bulu bím kurusdo pítkegeːla bík galugdém buluk araːdo orpansuto, okkom séːkobí paːyéji odok légaːpé aminém-kungkaːto.c 25 Konanané ayírdo bím kurusdo pítketo. 26 Bík kekonpé lujémnam adnam lutaddé sémpaiː “JIUDIKÍDÍːDOK MIGOMDÉ.'' 27 Bík lédílo bulu rodgoːné taniːannyikom aːko bík lagbíkpé akondém bík lakkepé kuruslo pítketo. 28 d 29 Odokké odok gípadnékídí:dé buluk tukku íkíla bím luka:la ludungai, “Anyingéǃ No édé taniːdéːai séːko kumli:dém momíggeːla loumno mopínkupénédé,e 30 sa: no kurusdokké gíigeːla aíém mopítsukítoku!'' 31 Édémí:pé abín miríkídíːdéːla luro luyírnékídíːdé Jisumé lukaːto odokké akoné akoném luto, “Bí ammem moturdaggai, émpigeːla aíém motursulamangǃf 32 O Kiristo, Israelké Migoma, saː suːpag kurusdokké gíikítok, odo ngolu kaːla nom méngkésupé." Séːkobulum bík lédílo kuruslo pítté:tungaji bulusin bím luka:mínto.
Jisuk Sinam
(Moti 27.45-56; Luk 23.44-49; Jon 19.28-30)
33 Odokké loːtuːdokké yummayír aumné ayírdoːpé moːpísok appíːloi kémojíjíngkang. 34 Odokké yummayír aumdodo Jisubí bottépé jéːla kabla luto, “Eloi, Eloi, lama sabaktani?”okodok légí:dé, “Ngok Ruːné, ngok Ruːné, no kapila ngom mépakton?”g 35 Édílo odok kéraːpé dagla duːné ékké édém tatton odo bulu luto, “Kangkíto, bí Elijaːmé gogdung.” 36 Ako dugla gíla síːpagémpinéko marné apolo biːdopé jíːbudlíggeːla édém ikorangkolo níggabgeːla bím tí:dopé níksaːlígbigeːla luto, “Duːpoːto, odokké kaːjé kaːpolai, Elijaːbí gíla bím aropé laːyiyéji."h 37 Odokké bottéruːpé jéːla kabge:la Jisubí ngatérsukang. 38 Odo kumli:dok sorkomnamdé tu:yi:tokké kéígboːpé serkepakkang.i 39 Odokké édílo Jisuké kanggaːdo dagladuːné língko-opisardé, bík kabnamdém tatton odokké kapé bí sikan édém kaːton, odo bí luto, "Aroruːpé séː tani:sé Ruːnéké Aoːdéǃ" 40 Mimé ékké mo:téngoːulokké kaːla dungngai. Buluk araːdo Meri Magdolonibí, ame:né Jemskélaː Joseské ané Meribíːla Salomibí. 41 Galiliːdo bulu bík lédílo gímínna bík laginammém kaːsíːbidungngai. Bík lédílo Jerusalempé gísaːmínné bojéruːngkopé akon mimmésin odo dungngai.
Jisum Yusí:nam
(Moti 27.57-61; Luk 23.50-56; Jon 19.38-42)
42 Édé mosí:sunan longngai; Yoddo longém a:poyan longédé. Édémpila yummayíré aːnammé, 43 Arimotiadok Jusebbí, Jiudi kébaːdok ménggésunam kébaːajonkai, séːkobí aíésin Ruːnék migomdokodém toyaːla dungngai; bí ang-kínggíːla Pilatkodoːpé gíla Jisuk simaːdém kotoku.j 44 Jisubí sikang émnamdém tadla Piladbí méngaksukang; odokké bí língko-opisardém goglígeːla bím tauto bí aropéi sikabon. 45 Édílo bí Jisubí sika:bo émna língko-opisardok kinton, bí Jusebmé Jisuk simaːdém bitoku. 46 Bí asong-onno gayinko réto odokké simaːdém layiːtoku, odokké gayindokki yetto. Odokké ílíngém pakurra léːnam agokolo lé:to. Odokké bí pítané ílíngko agodok yabgodo pérkablíkto. 47 Meri Magdolonibí:la Joseské ané Meribí Jisum okolo yusíːton édém kaːto.