1 Yahya i

Surano

Yahya

da meri'ou

Pobetekino Gau

Dahoo orua patuduno i Yahya kai poburi die sura. Me'asa, oliwihira miano da mobasa, kando tora boboto'akono Apu Alla ronga Yesus Kristus. Ko'orua, pokompehawa'ira kando osie nunu'o pompotisu ntesala da tule'i pokohancuru'o boboto'ando. Koie pompotisu ntesala pebintaano hai kaguru-guru da kanahi, hapa-hapa da da'a die hai wita'ea te'iaasi da mosa'o, nahina da moico. Nangkuamo kato salama te'iaasi kito bintaa pasipoleno wita'ea. Kanahindo, Yesus Kristus na'iaa santo'u-to'uahano manusia, te'iaasi o'ontoahano kana-kana manusia. Kanahindo penda, « Mau ki mosa'o niweweunto, da'a mohapa, kana'umpe te'iaasi wotolunto da mosa'o, na'iaa sangkoleonto. » Hasilino pompotisudo yahoo, miano mparasaea sai mpekalola-lolaro ronga tepopobungku.

Kanahino i Yahya: Luwuo koie pompotisudo tesala'o. Koie i Yesus yahoo Anano Apu Alla da tewali manusia. Kito to'orio Apu Alla, matantuomo dakitamo nta mesipa'ako kana-kana Iaa. Batuano, dakitamo nta ari-ari moweweu sinalaki, nta nunu'o parentano, ronga nta mekalola-lolaro.

Me'asa penda patuduno i Yahya teburi hai pasala 5:13, da kanahi, « Kaku buriakokomiu'o die sura, da parasaeaho Anano Apu Alla, kami nto'orio himi mpo'awa tora ngkaidaaha. » Die hai sura dahoo teburi opi-opia peto'ono kato to'orio hito daamo tora merongaakono Apu Alla. Kito parasaeahomo Apu Yesus, dakitamo nta moseka mera'iako hai ra'ino Apu Alla.

Ihino sura

1. Po'ungkahino gau (1:1-4).

2. Kito to'orio Apu Alla, dakitamo nta ari-ari moweweu da mosa'o, ronga nta nunu'o parentano (1:5 – 2:17).

3. I Yesus Mokole Pompokosalama (2:18-27).

4. Bangu-banguto nai da'amo nta mengkena bangu-bangudo miano da tewali anano bilisi (2:28 – 3:24).

5. I Yesus Mokole Pompokosalama da tewali manusia (4:1-6).

6. Kahioomo kato mpekalola-lolaro (4:7 – 5:5).

7. I Yesus Anano Apu Alla da tawe kai poweekita tora ngkaidaaha (5:6-12).

8. Patuduno die sura ronga ino'awa kompura-puraano (5:13-21).