Imani da nangio da mosa'o
5
1 Pera miano da parasaeaho i Yesus hicua Mokole Pompokosalama da ari nidandino Apu Alla, ko'ira miano da tewalimo anano Apu Alla. Inai da lou'o tamano, matantuomo dahoo nta lou'o anano. 2 Diemo peto'ono hito lolarohira ko'ira anano Apu Alla, yahoo lou'o Apu Alla ronga nunu'o pera parentano. 3 Kana'umpe lou'o Apu Alla yahoo nunu'o parentano. Ronga parentano nai da'a mobea. 4 Kana'umpe pera miano da tewalimo anano Apu Alla, ko'iramo da nangio da mosa'o die hai wita'ea. Ronga nta ponanginto yahoo parasaeanto. 5 Inai da nangio da mosa'o die hai wita'ea? Te'iaasi miano da parasaea hicua i Yesus Anano Apu Alla.Saksiino Anano Apu Alla
6 Iaamo da ari leu meronga e'e ronga rea, yahoo Yesus Kristus.a Kai ari leu na'iaa te'iaa e'e mpena, sawali e'e ronga rea. Ronga Sangkoleono Apu da saksii'o hi menona, kana'umpe Sangkoleono Apu yahoo pu'uno da menona. 7 Kana'umpe dahoo otolu saksii: 8 Sangkoleono Apu, e'e, ronga rea. Ko'otolu'o koie saksii pengkenaa. 9 Da sinaksiino to manusia totarimaamo, sawali da sinaksiino Apu Alla pompokulaloihopo. Ronga da sinaksiino Apu Alla yahoo Anano. 10 Miano da parasaeaho Anano Apu Alla, menonanoomo koie da sinaksii hai pelaroano, sawali miano da sai parasaeaho Apu Alla, koiemo da mekule-kule'io Apu Alla, nasai parasaeaho Apu Alla hi daa saksii'o Anano. 11 Da sinaksiino yahoo: Hi arimo Apu Alla weehakita'o tora ngkaidaaha, ronga Anano yahoo pu'uno toraaha. 12 Miano da boboto'akono Anano Apu Alla, dahomo koie toraaha hai iaa, ronga miano da sai boboto'akono, nahina toraahano koie miano.
Daa-daano tora ngkaidaaha
13 Kaku buriakokomiu'o die sura, da parasaeaho Anano Apu Alla, kami nto'orio himi mpo'awa tora ngkaidaaha. 14 Nato da'amo montangkoro mera'iako hai Apu Alla, tendenomo hito to'oriomo, ki hapa da pino'itanto, asala ki nunu'o po'eheno, dahoo nta podedeaho. 15 Ronga kito to'oriomo hi weekita hapamo da pino'itanto, toto'oriomo hito tarimaamo hapamo da pino'itanto.
16 Kimi ontoo petilamiu da moweweu dosa da sai mompokomate imani, mi'amalaakono hai Apu Alla; dahomo Apu Alla nta moweeho toraaha. Sawali dahoo dosa da mompokomate imani.b Naku da'a kanahi kami amala tendenomo dosa da kana koie. 17 Luwu niweweu ntesala yahoo dosa, sawali dahoo dosa da sai mompokomate imani.
18 Toto'oriomo, luwuo miano da tewalimo anano Apu Alla, ndoda'amo mpoweweu ngkaida'a dosa, nangkuamo Anano Apu Alla da olumihira, ronga ponggawano bilisi pu'uno pososa'o nai to'orimo hapai'ira. 19 Toto'oriomo hicua hai Apu Alla pebintaanto, ronga die upuo wita'ea kuasaniomo koie pososa'o. 20 Toto'oriomo, Anano Apu Alla ariomo leu ronga moweekita paha, kato to'orio Apu Alla da santo'u-to'u menona. Diekana torakitamo boboto'akono Apu Alla da santo'u-to'u ronga boboto'akono Yesus Kristus Anano. Diemo Apu Alla da menona ronga diemo tora ngkaidaaha.
21 Raro anaku, mimentalahio ka'apu-apu.