Sangkoleono Apu Alla ronga sangkoleono musuno Kristus
4
1 Raro mpetilaku da telou! Osie momparasaea pera miano da mogau kana nabii, sawali paresaa meri'ou kicuasi da nigauno mebinta hai Apu Alla; kana'umpe me'aluo kanabi-nabii da mesosaba latario upuo wita'ea. 2 Kanamo die dahamiu nta to'orio Sangkoleono Apu Alla: pera miano da akui'o Yesus Kristus hi ari leu hai wita'ea tewali manusia, koie miano tarimaamo Sangkoleo da mebinta hai Apu Alla. 3 Sawali pera miano da sai akui'o i Yesus, sangkoleo da tinarimano koie miano na'iaa mebinta hai Apu Alla. Koie sangkoleo yahoo sangkoleo musuno Kristus, ronga dakomiumo modeaho hi daa nta leu, ronga diekana dahomo die hai wita'ea.4 Sawali comiu, raro anaku, pebintaamiu hai Apu Alla. Minangihiramo ko'ira kanabi-nabii, kana'umpe Sangkoleo da perongamiu owo-owose'o ka'iaa sangkoleo da da'a hai wita'ea. 5 Pebintaando ko'ira kanabi-nabii yahoo die hai wita'ea. Da nigaudo yahoo dadaano die wita'ea, ronga miano wita'ea ndopodedeaho da nigaudo. 6 Sawali icita pebintaanto hai Apu Alla, ronga inai da to'orio Apu Alla dahoo nta modedeakita. Miano da sai mebinta hai Apu Alla, nando podedeakita. Koiemo peto'ono kato to'orio maina Sangkoleo da menona, ronga maina sangkoleo da mompokontesala.
Apu Alla kopololaroo
7 Raro mpetilaku da telou! Kahioomo kato mpekalola-lolaro, kana'umpe koie pololaro mebinta hai Apu Alla. Pera miano da kopololaro tewaliomo anano Apu Alla ronga to'oriomo Apu Alla. 8 Miano da sai kopololaro nai to'orio Apu Alla; kana'umpe Apu Alla kopololaroo. 9 Kanamo koie hi pokomentoda'o pololarono Apu Alla hai cita, yahomo Apu Alla kai tena'o Ana nte'i-nte'iaahano kai tii die hai wita'ea, kato po'awa toraaha mebinta hai Iaa. 10 Diemo pololaro: Na'iaa icita da lolaroo Apu Alla, sawali Apu Alla da lolarokita, ronga tena'o Anano kai leu tewali pesomba sinumbele da uwohio dosanto.
11 Raro mpetilaku da telou, kicanamo koie pololarono Apu Alla hai cita, kahioomo na'anta kato mpekalola-lolaro. 12 Nahina te'asa miano da ari ontoo Apu Alla, sawali kito mpekalola-lolaro, Apu Alla poo'iahomo hai cita, ronga mondo'anomo pololarono hai cita.
13 Na'arimo Apu Alla moweekita Sangkoleono, yahomo kato paha'o hito poo'iahiomo, ronga Apu Alla moo'iahicita. 14 Icamimo da ari ontoo ronga leleako, hi ari i Ama tena'o Anano kai leu tewali Gurusalamano die wita'ea. 15 Inai da akui'o i Yesus hicua Anano Apu Alla, Apu Alla da moo'iahio koie miano, ronga koie miano da moo'ia hai Apu Alla. 16 Toto'oriomo ronga toparasaeahomo pololarono Apu Alla hai cita.
Apu Alla koie kopololaroo. Miano da moo'iahio pololaro, koiemo miano da pono-ponohaakono Apu Alla, ronga Apu Alla da pono-ponohaakono koide miano. 17 Kanamo koie pololaro kai pinokomondo hai laro wotolunto, kai morodo laronto hai oleo pe'adili'a, kana'umpe toraanto die hai wita'ea kanasi hi ari tora Apu Yesus. 18 Hai larono pololaro nahina mee-mee; pololaro da to'u-to'u nangio mee-mee. Miano da momee, da pinomeetakono yahoo hi daa nta nihukuma. Dadi menteehanomo, koie miano da momee nai da'apo mondo'ako pololaro.
19 Kato pololaro, nameri'oumo Apu Alla lolarokita. 20 Ki daa miano da kanahi, « Polou'aku Apu Alla, » sawali kokoleaho petilano, koie miano miano mengkule. Kana'umpe miano da sai lolaroo petilano da inonto, kana'umpepo nta polouno Apu Alla da sai inonto? 21 Ronga diemo parentano da pinokodungkuno hai cita: Inai da lou'o Apu Alla, kahioomo kai lolaroo na'ana petilano.