3
1 Ontoopo hi dompa owose pololarono Apu Alla Tamanto icita, kato nineehako anano. Ronga menonaa, icita yahoo anano Apu Alla. Koiemo sababuno kasando to'oricita mianono wita'ea, kana'umpe mianono wita'ea nasando to'orio Apu Alla. 2 Raro mpetila da telolaro, icita diekana yahoo anano Apu Alla, ronga nta moicono dadaanto oleo perumbui nai da'apo mentee. Sawali tona nto'oriomo, ki leumo Apu Yesus, dakitamo nta kana-kana Iaa, kana'umpe dakitamo nta ontoo dadaano da santo'u-to'uahano. 3 Pera miano da momperahi-rahi hai Apu Yesus, koie miano dahoo nta pokomowuaho wotoluno mebinta hai dosa, kana dadaano Apu Yesus.4 Pera miano da moweweu dosa limpakiomo parentano Apu Alla, kana'umpe koie dosa yahoo, hi nilimpaki parentano Apu Alla. 5 Ronga minto'oriomo hi ari leu Apu Yesus, kai oniniakondo'o dosano manusia, sawali Iaa nahina dosano. 6 Luwu miano da tora boboto'akono Apu Yesus nai da'amo nta moweweu ngkaida'a dosa. Miano da moweweu ngkaida'a dosa nai paisa ontoo ronga nai to'orio Apu Yesus.
7 Raro anaku, mi'osie moturusio miano kai pokomporekomiu, mau inai. Da nineehako miano ntekona te'iaasi da moweweu da tekona, kanamo dadaano Apu Yesus da tekona. 8 Sawali miano da moweweu ngkaida'a dosa, koiemo anano bilisi, kana'umpe ponggawano bilisi mebinta iso-isono moweweu ngkaida'a dosa. Nangkuamo koie, kai leu Anano Apu Alla nta mokolono'o pohedoano ponggawano bilisi.
9 Miano da tewalimo anano Apu Alla nai da'amo nta moweweu ngkaida'a dosa, namesipa'akomo sipano Apu Alla. Nai da'amo tule'i moweweu ngkaida'a dosa, hina ntewalimo anano Apu Alla. 10 Die mentoda'anomo teposengkano inai da tewali anano Apu Alla ronga inai da tewali anano bilisi: nai-naiho da sai moweweu da tekona ronga da sai mololaro petilano, koie na'iaa anano Apu Alla.
Mekalola-lolaro
11 Kana'umpe diemo haratia da iso pinodeamiu: kahioomo kato pekalola-lolaro. 12 To'osie kana i Kain, da tewali anano bilisi, kai popatee tuaino. Hapa sababuno i Kain kai popatee? Kana'umpe koie da niweweuno mosa'oo, sawali da niweweuno tuaino tekonaa.
13 Nangkuamo koie, raro mpetilaku, mi'osie tekangka kindo kokoleakomiu miano wita'ea. 14 Toto'oriomo hito bintaamo mateaha, kato pelinca hai toraaha, tendenomo lolarohira petilato. Inai da sai mololaro, koie miano poo'ia ngkaidaahomo hai mateaha. 15 Kana'umpe inai da mongkokolea petilano yahoo miano mpompepate, ronga minto'oriomo hi luwuo miano mpompepate nai po'awa tora ngkaidaaha.
16 Kanamo die kato to'orio batuano pololaro yahoo, hi arimo Apu Yesus soroo penaano tendenomo icita. Dadi, cita na'anta paraluu'o soroo penaanto tendenomo raro mpetilato. 17 Ki daa miano da kawasa, kai ontoo petilano da kakuranga, sawali nasai lolaroo, kana'umpemo pololarono Apu Alla kai daa nta moo'iahio pelaroano koie miano? 18 Raro anaku! To'osie mololaro te'iaasi hai wiwi atawa te'iaasi hai gau. Sawali kato pololaroako niweweunto ronga santo'u-to'uno.
Osie momee mera'iako hai Apu Alla
19 Kanamo koie kato to'orio hito nunu'o pompotisu da menona, ronga pokomontunduo pelaroanto hai ra'ino Apu Alla. 20 Kana'umpe ki pasalakita pelaroanto, Apu Alla owo-owose'opo pompahano ka'iaa pelaroanto, ronga Iaa da to'orio luwu. 21 Raro mpetilaku da telou, ki sato da'amo pasala'o wotolunto, nato da'amo nta montangkoro mera'iako hai Apu Alla. 22 Ronga pera da pino'itanto dakita nta awaa mebinta hai Apu Alla, hitona nunu'o parentano, ronga moweweu da mokomohende'o pelaroano. 23 Ronga diemo parentano yahoo: toparasaeaho Anano, Yesus Kristus, ronga kato mpekalola-lolaro kana hi ari tenakita. 24 Pera miano da nunu'o pera parentano Apu Alla tora pono-ponohaakono Apu Alla, ronga Apu Alla pono-ponohaakono. Ronga toto'oriomo hi pono-ponohaakita Apu Alla, hina arimo weehakita'o Sangkoleono.