Yesus Kristus da me'e'etaakita
2
1 Raro anaku, kaku buriakomiu'o kana die, kami osie mpoweweu dosa. Sawali ki daa miano da moweweu dosa, dahoo tolea da me'e'etaakita hai Ama, yahoo Yesus Kristus da mongkote. 2 Iaamo pesomba sinumbele da uwohio dosanto, ronga na'iaa te'iaa dosa mpantato, sawali ronga dosano pera ihino wita'ea.3 Diemo peto'ono hito to'orio Apu Alla, yahoo kito nunu'o parentano. 4 Inai da kanahi, « Kuto'orio Apu Alla, » sawali ki sai da'a nunu'o parentano, koiemo miano mpekulepi ronga hai pelaroano nahina da menona. 5 Sawali naiho da nunu'o haratiano, koiemo miano da mondo'ako pololarono Apu Alla. Koiemo peto'ono hito daa tora merongaakono Apu Alla. 6 Inai da kanahi, toraahano me'asa'omo ronga Apu Alla, kahioomo kai tora nunu'o sipano i Yesus.
Parenta tonia
7 Raro mpetila da telou! Die da niburincu na'iaa parenta tonia, sawali parenta lembahi da dungkukomiu sa'isomiu mparasaea. Koie parenta lembahi yahosi haratiano Apu Alla da ari pinodeamiu. 8 Mau kicana koie, die da niburincu parenta toniasi na'ana: menonaano koie parenta dahano inonto hai wotoluno Apu Yesus ronga hai wotolumiu. Kana'umpe da rondoma samoli-molionomo ronga da kontu'uma molinyaa tepanaamo.
9 Inai da kanahi, dahoo moo'ia dahano molinyaa, sawali dahosi kokoleaho petilano, koie miano dahosi hai laro rondomaano dungku diekana. 10 Inai da mololaro petilano, dahano moo'ia molinyaaho, ronga hai toraahano koie miano nahina da mompokontuuna hai dosa. 11 Sawali inai da kokoleaho petilano, dahano moo'ia ronga lolako hai laro rondomaa. Nai to'orio maina nta lako'ano, nangkua da pokomopusuo matano koiemo da rondoma.
12 Die kuburiakokomiu'o, hai raro anaku, hina inampunimo dosamiu tendenomo Apu Yesus. 13 Kuburiakokomiu'o, hai raro da motu'a, himina nto'oriomo Iaa da da'amo mebinta iso-iso. Kuburiakokomiu'o, hai raro ntora mongura, himi nangiomo ponggawano bilisi pu'uno sa'o.
14 Kuburiakokomiu'o, hai raro anaku, himina nto'oriomo Apu Alla yahoo i Ama. Kuburiakokomiu'o, hai raro ngkamotu'a, himina nto'oriomo Iaa da da'amo mebinta iso-iso. Kuburiakokomiu'o, hai raro ntora mongura, himina mokora, ronga haratiano Apu Alla da moo'iahio pelaroamiu, ronga mina nangiomo ponggawano bilisi pu'uno sa'o.
15 Osie mokeahako wita'ea ronga pera ihino. Kana'umpe inai da mokeahako wita'ea, nai da'amo lou'o Apu Alla Tamanto. 16 Kana'umpe luwu da da'a hai wita'ea, yahomo da pinokeahakono wotolu, da pinokeahakono mata, ronga da nimentaba'ako, na'iaa mebinta hai Tamanto, sawali mebinta hai wita'ea. 17 Kana'umpe die wita'ea dahoo nta lono merongaa da pinokeahakono, sawali miano da nunu'o po'eheno Apu Alla nta tora ngkaida'a.
Musuno Kristus
18 Raro anaku, diekana nta kiama'o die wita'ea! Dakomiumo modeaho hi daa nta leu musuno Kristus, ronga diekana me'aluomo pedaluno Kristus da mesosaba. Koiemo peto'ono hi dungkumo nta kiama'ano wita'ea. 19 Ko'ira pedalu pebintaando hai cita, kana'umpe santo'u-to'uahano, ko'ira na'iaa cita. Kinangkua wainto mianonto, dahiramo nta sadia merongakita. Sawali kando bintanicita, menteehanomo hi sa'iaa icita.
20 Sawali icomiu aricomiumo tarimaa Sangkoleono Apu mebinta hai Apu Yesus, yahomo luwumiu kami nto'orio pompotisu da menona. 21 Kaku buriakokomiu'o die, na'iaa tendenomo hi sami mpaha'omo da menona, deenapo himi mpaha'omo ronga to'oriomo koie da menona hi sai paisa mekulepi.
22 Inai da mengkule? Da mengkule yahoo miano da kanahi i Yesus na'iaa Mokole Pompokosalama da ari nidandino Apu Alla. Koiemo musuno Kristus, da sai akui'o i Ama ronga i Ana. 23 Kana'umpe nai-naiho da mehapuiho i Ana nai boboto'akono i Ama. Ronga inai da akui'o i Ana, pengkenaamo hi boboto'akono i Ama.
24 Koie lele da ari pinodeamiu isomiu parasaea, kahioomo kai poo'ia hai pelaroamiu. Ki poo'ia hai pelaroamiu, dakomiumo nta sadia boboto'akondo i Ana ronga i Ama. 25 Ronga diemo da ari pedandino hai cita: yahoo tora ngkaidaaha.
26 Kuburiakokomiu'o die dadaano ko'ira miano da konainoo tandaiho nta akalakomiu. 27 Sawali mekona hai comiu, Sangkoleo da ari tinarimamiu hai Yesus sadia ngkaida'a merongakomiu. Nangkuamo kasai da'amo paraluu ki daa miano meha da potisukomiu. Kana'umpe Sangkoleono motisu'akomiu'o luwu; ronga koie pompotisuno menonaa, na'iaa kule. Nangkuamo koie, kahioomo kami nunu'o pompotisuno, ronga misadia boboto'akono Apu Yesus.
Raro anano Apu Alla