Dandi nta leuhano Apu
3
1 Raro mpetilaku da telou, diemo surangku ko'orua hai comiu. Hai larono die orua'o sura, mokeahaku pokompehawakomiu kai tetiani molino pinehawamiu. 2 Mokeahaku kami mpeehawa'o lele da ari pinokodungkudo raro nabiino Apu Alla, ronga parentano Apunto da pokosalamakita, da ari pinokodungkudo raro rasulu hai comiu.3 Da paraluu to'u kami nto'orio, yahoo kompura-puraano wotu danta leu, dahira nta mesosaba miano da pinaturuno po'ehendo da mosa'o, dahira nta me'anu-anukomiu kanahi, 4 « Dandino Apu: dahoo nta leu. Diekana-kana mainaamo? Mematehiramo miano mperi'ou, sawali luwuo dada'iaasi kana isono dunia da'a! » 5 Pomperadamihira sai akui'o hicua haratiano Apu Alla iponoha kai dadi langi ronga wita'ea. Sincalako wita'ea mebinta hai e'e, ronga tindahako da motu'i mebinta hai e'e. 6 Ronga koiemo e'e da tewali e'e waa owose da mokolono'o dunia iponoha. 7 Sawali koiesi penda haratiano Apu Alla da piaraa langi ronga wita'ea da da'a diekana, dungku oleo kiama kai kaaho api, dahano nta pinokolono miano mosa'o.
8 Sawali raro mpetilaku da telou, mi'osie kolumpee, hai ra'ino Apu, asa oleo atawa asa rewu ta'u pengkenaasi; nahina teposengkano. 9 Apu nai paisa mompokotado-tado pedandino, mau ki daa da kanahi nai oru. Sawali sabaraakokomiu, deenapo da po'eheno kai osie da'a da binasa, mau te'asapo. Mokeaho luwu miano kando mentoba mebinta hai niweweu ntesalado.
10 Sawali oleo nta leuhano Apu nta kana leuhano miano mpononako da sai tino'ori wotuno. Langi dahoo nta lono merongaa ruru da owose, pera da da'a hai langi dahoo nta lono'ako api, wita'ea ronga pera da ari niweweuno miano dahoo nta opuloako api.a
11 Ki daa nta pinokolono kana koie luwuo da da'a, comiu da mentorapo diekana, kana'umpemo nta daano toramiu? Kahioomo kami mentora molinyaa mpelaroa ronga nunu'o po'eheno Apu Alla, 12 kokonaa himi daa metotarima ronga mo'ita-ita kai orumo leu koie oleono Apu Alla. Koiemo oleo dahano nta tinunu langi kai hancuru, ronga tende mokulano, pera da meda'a hai langib dahoo nta lono. 13 Sawali da tinotarimanto yahoo langi da tonia ronga wita'ea da tonia da ari nidandino Apu Alla, daahano da adili.
14 Nangkuamo koie, raro mpetila da telou, himi daa totarimaa koie luwu, kahioomo kami ntepokonaakono Apu Alla ronga sai tekebaako naamo sai pinosala'i hai ra'ino. 15 Mi'angga'omo koie sabarano Apunto kana me'asa wotu hi weekomiu kami nto'ori pinokosalama, kana hi ari moburiakokomiu i Paulus, petilato da telou, nunu'o mandarano hi potisu'o Apu Alla. 16 Luwuo surano, sadia burio koie daakana. Dahoo meha da mohali pinaha'ano hai surano i Paulus, yahomo ko'ira miano da sai hina ponto'orindo, ronga da sai montodo parasaeando kando boli'io batuano, kana da biasa poweweundo mekona hai meha ihino Boku Haratiano Apu Alla. Koie poweweu ngkanaico yahomo danta mokobinasaa wotolundo pantado.
17 Sawali comiu, raro mpetila, peri'oukomiumo to'orio. Kuamo koie, mimpedagai kando osie pokomporeakomiu'o pompotisu ntesalado ko'ira miano ngkabaria, kami bintanio pentadeamiu da morodo. 18 Kahioomo kai e'elengua tetiani ponto'orimiu dadaano Apu Yesus Kristus Gurusalamato, ronga kami ntetiani menasaa pompeehawano. Kahioomo kai pinoko'owose diekana dungku samengka-mengkauno! Amin.