Kanabi-nabii ronga kaguru-guru
2
1 Iponoha ario sosaba kanabi-nabii hai tongano umatino Apu Alla. Kanamo na'anda ko'ira guru palsuu diekana dahira nta mesosaba hai comiu. Dahoo nta saba pompotisudo da sai menona, da mososa'o miano. Ko'ira kaguru-guru nta mehapuiho Apundo da ari huda'ira mebinta hai dosa. Petangkeahanomo koie kai oru konahira abalaa. 2 Mau kicana koie, dahosi me'alu miano danta nunu'o bangu ngkabariado da endeo. Tendenomo koie bangudo, kai me'alu miano da paruruo sala da tekona da me'o'alahio Apu Alla. 3 Tendenomo saraka'ako doi, kando pongkarangiakomiu kule kando pokomporekomiu. Mebinta iponoha, sadia'omo hukumando, ronga silaka'a dahomo totarimahira.4 Nai pompe'o'oloi Apu Alla hukuma'ira mala'ekati da mengkodosa, deenapo basiakohira hai bolo lia da rondoma hai naraka, kokeenamo dahando totarimaa oleo pe'adili'a. 5 Kanamo koie dunia iponoha, Apu Alla nai poturusio kai tepulosi hai hukuma. Kai pompokoda'a e'e waa owose hai ira miano da mosa'o niweweundo. Te'iaasi i Nuh ronga opitu meha miano da pinokosalamano, hina moleleako dadaano toraa da po'eheno Apu Alla. 6 Kanamo na'ana Sodom ronga Gomora: Apu Alla mokolono'akono'o api, kai tewali pe'ontoando miano danta tora mosa'o oleo mperumbui.a 7 Sawali i Lut pokosalama'o, hina moweweu da tekona, ntaperano marasai tendenomo miano mosa'o da sa'ia-iaa bangudo. 8 Kana'umpe koie i Lut dahanomo moo'ia hai tongado ko'ira miano, ronga dompa'o mopoe larono da mowua hi tapio oleo ontoo ronga modeaho niweweundo da mosa'o. 9 Dadi, mentoda'anomo hi kuasa Apu Alla mokosalama'o miano da nunu'o po'eheno hi porora'i posoba-soba. Ronga hukuma'ira pera miano mosa'o dungku oleo pe'adili'a, 10 kontu'uma ko'ira pera miano da nunu'o po'eheno pelaroando da pokomowusee wotolundo, ronga da moko'anu-anuo pomparentaano Apu Alla. Taperando moseka ronga mentaba, dungku kasando pontangkoro moko'anu-anuhira mala'ekati da ko'angga. 11 Siangkopo ko'ira mala'ekati da moko-mokorapo ronga maku-makuasapo ka'iaa ko'ira miano, nando da'a anu ngkabaria'ira mala'ekati suere hindo tuntuhira kando hinukuma hai ra'ino Apu Alla.
12 Sawali ko'ira kaguru-guru kana pinotuwu da sai hina akalano, kanamo kadadi da te'iaasi tehina nta nirako ronga sinumbele. Mau da sai tino'orindo dahirasi moko'anu-anuo. Tendenomo niweweundo da mosa'o yahomo danta pokobinasahira kana kadadi mo'ila. 13 Ronga dahira nta awaa karasai da mobea, kowati gadindo tendenomo niweweundo da mosa'o. Tora lia mohende'a koiemo da mehawado, mau dungku tonga oleo kanasi hi malo. Niweweundo taperano sadaka ronga mowuse. Kimi mperonga mpongkaa, taperando mohende'ako gau ngkule. 14 Sapo'ontondo tina te'iaamo endeo da pinekirindo, ronga nando isea mpoweweu dosa. Miano da sai morodo pelaroano ndo'undekio. Pelaroando tabulu'omo saraka. Tewalihiramo miano kona ntunda. 15 Ndobintaamo sala da mongkote, kando membualo. Ndonunu'omo sipano i Bileam anano i Beor, da mokeahako doi mosa'o. 16 Sawali Apu Alla namekora pokompehawa'o koie nabii Bileam tendenomo niweweuno da mosa'o, kana'umpe mau kolodai pogau'akonomo kana miano, tabe'o kai osie molawu moweweu da sa'ia-iaa.b
17 Ko'ira kaguru-guru kana dadaando mata bundu da komea, ronga seru da pinuurino ngalu'ea. Ariomo Apu Alla mompasadia'akondo poo'iaha da dompa rondoma. 18 Hindo pogau te'iaasi mentaba, sawali nahina batuano. Pekirindo da endeo koiemo po'undekindo miano da tinapundo tepulosi mebinta hai miano da sai molinyaa pekirindo. 19 Ko'ira kaguru-guru dandi'ira miano nta mokolalesahira, mainakaa wotolu mpantado dahirapo tepo'ata hai sipa da mompokobinasa miano. Kana'umpe ki daamo da nangio miano, koiemo tepo'ataano. 20 Miano da to'orio Apu Yesus Kristus Gurusalamato tepulosi'iramo hai kuasano dunia da mompokomowuse. Sawali kindo kona bengkaro mbule ronga monangi hai kuasano dunia, dadaando dahomo nta kolalo mosa'o ka'iaa isono. 21 Nangkuamo koie, kolaloo moico ki sando da'a paisa to'orio sala da tekona hi ari potisu'ira Apu Alla, ka'iaa kindo to'orio, sawali nando da'asi nunu'o koide parenta. 22 Hapa da niweweundo, menonaanomo die parere da kanahi, « Yo dahu pohule'o kaaho pemeluno, »c ronga « Wawi da ari nibaho pohule'osi melembo hai lombu. »