Surano
Petrus
da ko'orua
Salamu
1
1 Die surangku, aku Simon Petrus, ata ntinenano Yesus Kristus, nta lako hai comiu da parasaeamo kana cami, tendenomo hi adili Apu Alla Apunto ronga Yesus Kristus Gurusalamato.a2 Kahioomo Apu Alla kai e'elengua peehawakomiu ronga mapuhiakomiu'o barakati, tendenomo himi nto'orio Apu Alla ronga Yesus Apunto.
Peboboino ronga nirurukino Apu Alla
3 Tendenomo kuasano Apu Alla, kai poweekita luwu da paraluuto kato tora nunu'o po'eheno. Kai kana koie, tona nto'orio da ari kebaicita kato itai mo'awa angga ronga pereree'a da moico. 4 Kanamo koie carano Apu Alla kai weekita barakati ngko'angga ronga da dompa owose, hi ari dandicita. Koiemo barakati kami ntepulosi mebinta hai kea-keano dunia da mososa'o, kami itai mo'awa sipano Apu Alla.
5 Nangkuamo koie, kahioomo kami mpekora mepasipole tianiakono'o imanimiu sipa da moico, ronga sipamiu da moico tianiakono'o ponto'ori. 6 Koie ponto'orimiu tianiakono'o sipa montaha pelaroa, ronga sipa montaha pelaroa tianiakono'o sabara tineiho karasai. Sabaramiu tianiakono'o sambahea, 7 ronga sambahea tianiakono'o polou, naamo polou tianiakono'o pololaro. 8 Ki lako tetiani ko'ira sipa hai comiu, dakomiumo nta sadia kohasili ronga koguna hai larono ponto'orimiu Yesus Kristus Apunto. 9 Sawali inai da sai mesipa'ako kana koie, kanamo miano mowuro atawa mopusu, ronga kolumpeemo hi arimo Apu Alla mokomowuahakono'o dosano da ari tealo.
10 Nangkuamo koie, raro mpetila, mimpekora mepasipole kai mentoda buktiino, hi ari Apu Alla boboicomiu ronga rurukicomiu. Kimi mpoweweuhako kana koie, nami da'a nta paisa tesube kami ntuuna. 11 Kicanamo koie, ntaperamiu nta mo'awa kalalesaa mewiso hai pomparentaano Apunto Yesus Kristus Gurusalamato da sai hina puraano.
12 Nangkuamo koie, kaku sadia mokompehawakomiu dadaano ko'ira luwu, mau kimi nto'oriomo ronga morodo nunu'o koie pompotisu da menona da ari pinepopotisu'akomiu. 13 Hicu daapo tora, paraluu'o kaku pokompehawa'akokomiu'o ko'ira luwu. 14 Kana'umpe kuto'oriomo hi sai da'amo nta mengkau kaku bintaa die wotolungku, hina arimo Apu Yesus Kristus mo'awaakuo. 15 Nangkuamo kaku pepasipole to'u, mau kicu pebungkuakomo, kami sadia mehawa'o koie pompotisuku.
Menonaamo leleno nabii mekona hai Kristus
16 Aricamimo mo'awaakomiu mekona kuasano ronga nta leuhano Apunto Yesus Kristus. Da tinuluramami koie, na'iaa tulura ngkule da kinarangino miano mandara, sawali kona arimo ontoakono'o matamami hi owose kuasano.b 17 Kana'umpe dakami itai, tempono Apu Alla Tamano pa'angga'o ronga moko'owose'o, naamo tudu suara mebinta hai Apu Alla da tereree owose da kanahi, « Diemo Anaku da nilouku, Iaamo da po'ehengku. » 18 Wotolumami kopodeaho koie suara mebinta hai suruga tempomami mperonga hai wumbu ntangkenono Apu Alla.c
19 Nangkuamo koie, kai tetiani morodo pelaroamami parasaeaho koie lele da pinokodungkudo nabii. Moicoano kami mpeehawa'o koie gauno nabii, da kana to'u hulu da lolanga hai tongano rondomaa dungku kai molilinyaa, kai tepana olimpopo ngkomeanta hai pelaroamiu.d
20 Da paraluu'ea kami nto'orio yahoo, hi sai tewali miano montarangkani koie lele da pinokodungkudo nabii da teburi hai Boku Haratia nunu'o po'awa mpantano. 21 Kana'umpe nahina lele da pinokodungkudo nabii kicua po'eheno miano. Sawali Sangkoleono Alata'ala da kuasaihira ko'ira miano, kando pokodungku'o koie haratia da mebinta hai Apu Alla.