11
Kada ni sa kida da,a duꞌua kuenta dan kida da sa kida Cristu.Na modo nandeꞌe sa ku kuu ñayii kidakaꞌnu ñaꞌan xi Ndios
2 Kaꞌan guaꞌa da jni ndidaa ni vi xanii kuan ndikii nakaꞌan ñaꞌan ni d̶a, san kida ni ndidaa duꞌua kuenta káchi toꞌon da sa na kada ni. 3 Doko nchoj da sa na kini ni sa Jesucristu kuu d̶iki ndiden en tsie, san tsayee kuu d̶iki ñadeꞌe, san Ndios kuu d̶iki Jesucristu. 4 Ndidaa tsayee datavi d̶iki xi ora xikataꞌvi adi ora kaꞌan toꞌon táꞌvichiion Ndios, san jaꞌa nchukachi sa ti seniꞌno tsa ia kuu d̶iki tsa. 5 Doko ndidaa ñadeꞌe xikataꞌvi adi kaꞌan toꞌon táꞌvichiion Ndios, tu ti datavi ña d̶iki ña san jaꞌa nchu kachi sa ti seniꞌno ña tsa kuu d̶iki ña, kuan kuu kuenta datsa nchala ña d̶iki ña. 6 Kuan tu da ñadeꞌe ti datavi ña d̶iki ña, naditi ña ndidaa xidi ña; san tu kukaꞌan jnu ña sa diti ña xidi ña adi datsa nchala ña san guaꞌa ka na datavi ña d̶iki ña. 7 Tsayee ti nandeꞌe sa datavi tsa d̶iki tsa, kuan tsa yaꞌa ndee tsa sa kuu Ndios san niꞌin tsa sa tastuni ia;b san ñadeꞌe niꞌin ña sa tastuni xee ña. 8 Kuan tsayee ti kee tsa xi ñadeꞌe maska sa ñadeꞌe kee ña xi tsie. 9 Kuan adi tsayee kuguaꞌa sa kuxi ñadeꞌe, maska sa ñadeꞌe kuguaꞌa sa kuxi tsayee.c 10 Juandiku ñadeꞌe ya nchoxi sa chodaꞌa ña d̶iki ña na en señal sa tastuni ñaꞌan xee ña xan, jnu ndidaa ángel. 11 Doko ntsoo ndidaa ndo kuenta guaꞌa xininchisa ndo Jesucristu, nisa tsie ma kachi koo tsa tu ti io ñadeꞌe, san nisa ñadeꞌe ma kachi koo ña tu ti io tsie. 12 Kuan duꞌua kuenta ñadeꞌe kee ña xi tsie, san duꞌua ni tuku tsie kaku tsa xi ñadeꞌe; doko ndidaa jaꞌa kidaguaꞌa Ndios.
13 Kani-ini ni ndidaa ni tu danaꞌa guaꞌa sa ñadeꞌe na kakataꞌvi ña xi Ndios san ma datavi ña d̶iki ña. 14 Kuan xini ndo sa sakanuu kuu sa en tsayee na dandoo kani tsa xidi d̶iki tsa, 15 doko sa yeñuꞌu kuu xi ndidaa ñadeꞌe sa nakoo kani xidi ñan, kuan Ndios sañaꞌan ia sa nakoo xidi kani ña ndasa na kutavi d̶iki ña. 16 San tu andu nchu naa sa saꞌa toꞌon yaꞌa, ntsoo ndidaa ndo ti neꞌe ndo enka costumbre, san nisa ndidaa x-congregación Ndios.
Sa xido ndagua ndidaa ñayii ora na kaꞌan tsa ultimo cena ku Toꞌo ndo
17 Io en sa ti kaꞌan guaꞌa da xi, sa kida ni ndidaa ni, kuan ora nataka ni ndidaa ni, luguar sa na kada ni sa guaꞌa san kada sa kuiꞌia kida ni. 18 Kuan nitoꞌon da sa kii nataka ni ndidaa ni kuenta x-congregación Ndios, taꞌantsa dagua ni ndidaa ni san sani ini da sa duꞌua kuu nchisa; 19 kuan nandeꞌe sa tuku tuku kani-ini ni ndidaa ni ndasa duꞌua na danaꞌa ñayii kuu xaꞌan Ndios. 20 Kuan ora nataka ni ndidaa ni, san ti kida ndaa ni sa dakuaꞌa ñaꞌan ku Toꞌo ndo Jesucristu sa saj dini ia, 21 kuan ora saj ni, ti sakuntsatu ni maska sa ndiden ndiden ni saj ni ora nchoj ni san dagua ñayii kuita ka, san dagua ñayii naxini. 22 Ña ama ti io xeꞌe ni ndidaa ni sa kaj ni xiꞌin koꞌo ni ña? Ña sani-ini ni sa ti xaꞌvi x-congregación Ndios juandiku kida ni sa na kukaꞌan jnu ndidaa ñayii kundaꞌvi? Nasa nchoj ni sa na kachi da jni? nchoj ni sa na kaꞌan guaꞌa da jni ña? Ma kaꞌan guaꞌa da jni sa saꞌa ndidaa jaꞌa.
Duꞌua kachi sa na kada ndo ora ultimo cena ku Toꞌo ndo
23 Kuan ndidaa sa dákuaꞌa ñaꞌan Jesucristu d̶a ndidaa jaꞌa kuu sa dakuaꞌa ñaꞌan da jni tuku: Niñu díko ñaꞌan xi Jesucristu, teen ia ita-stila; 24 san kuenta tuꞌu sañaꞌan ia taxaꞌvi xi Ndios, taꞌvi ia san kachi ia: Teen, sa kaxi. Jaꞌa kuu ku kikikoño ntsu sa na kuañaꞌan sa saꞌa yoꞌo ndidaa yo. Kada jaꞌa san nakaꞌan ñaꞌan kuntsu. 25 San duꞌua ni, tén ia copa tuku kuenta tuꞌu saj dini ia, san kachi ia: Vinu tinchiꞌio ñoꞌon copa yaꞌa nchukachi sa kuu tratu saad ku niñi ntsu;e kada jaꞌa ndidaa guelta na koꞌo yo san nakaꞌan ñaꞌan ku ntsu. 26 Ndidaa guelta na kaj ni ndidaa ni ita-stila yaꞌa xiꞌin na koꞌo ni copa yaꞌa, kanandodo ni sa xíꞌi Jesucristu, ia kuu ku Toꞌo ndo, ntsa na ndixi ia.
Andu ti kida sa ndakuiti
27 San duꞌua andu na kaxi ita-stila ya xiꞌin na koꞌo x-copa ia kuu ku Toꞌo ndo, san ti sakuituni xanaa tsa sa kida tsa, kuidokuachi tsa xikikoño xiꞌin j-niñi Jesucristu. 28 Juandiku, ntsaꞌa ni ndidaa ni tu io ndoo xanaa ni antika sa kaj ni ita-stila xiꞌin koꞌo ni copa vinu tinchiꞌio. 29 Kuan tsa saxi ita-stila yukua xiꞌin tsa xiꞌi vinu tinchiꞌio yukua, san ti sakuituni xanaa tsa sa kuu xikikoño ku Toꞌo ndo Jesucristu, san tsa duꞌua kida taꞌan tsa kada Ndios. 30 Juandiku io kuaꞌa ntseꞌe tsa kuꞌu xi sa io ni ndidaa ni xiꞌin ñayii kúvita, xiꞌin kuaꞌa tsa sa xiꞌi. 31 Tu na ntsaꞌa guaꞌa ndo mee ndo san ma kuidokuachi ndo. 32 Doko tu Ndios kida ia sa na taꞌan ndo duꞌua kida ia ndasa na ndu ndaa ndo san adi kuenta kida ia sa taꞌan ndidaa ñayii ti xini ñaꞌan xi ia.