Sa guaꞌa taxi Espíritu
12
Doko xanii, nchoj da sa nakini ni ndidaa ni don taxi x-espíritu Ndios.2 Naꞌa ni kuenta kuu ni ñayii ti xininchisa ñaꞌan xi Jesucristu, san xu chiñuꞌu ni ndidaa idolo ti kachi kaꞌan. 3 Nchoj da sa na kukuituni xanaa ni sa ndidaa ñayii kaꞌan sa saꞌa x-espíritu Ndios ti kida “maldecir ñaꞌan xi Jesucristu” san nisa en ñayii ti kachi danani ñaꞌan “Toꞌo xi Jesucristu” tu ti io Espíritu Santu xi.
4 Ndidaa ñayii kuu x-congregación Ndios den den don niꞌi ñayii, doko x-espíritu ia kuu endini. 5 San tuku tuku chiion kida ndo doko ia kuu ku Toꞌo kuu endini san xinokuachi ndo xi ia. 6 San ndiden ndiden kuu chiion kida ndo doko Ndios ia kida ndidaa jaꞌa ku ndo kuu endini ia. 7 Doko ndiden ndiden sañaꞌan ia don xi ñayii ndasa na chintsee ñaꞌan ñayii xi enka ñayii xininchisa ñaꞌan xi Jesucristu. 8 Kuan dagua ñayii niꞌi sa kaꞌan toꞌon kutuni ntseꞌe xi sa saꞌa x-espíritu Ndios; doko dagua ñayii niꞌi sa kaꞌan toꞌon xini ntseꞌe sa saꞌa x-espíritu ia; 9 san dagua ñayii niꞌi sa kininchisa ntseꞌe ka Ndios sa saꞌa x-espíritu ia; san dagua ñayii niꞌi don sa ndadaguaꞌa ñayii kuꞌu xi sa saꞌa x-espíritu Ndios; 10 San dagua ñayii niꞌi don sa kada milagru; san dagua ñayii niꞌi don profecía; san dagua ñayii niꞌi don san nakini espíritu sa ndaa xiꞌin espíritu naꞌntsa; dagua ñayii niꞌi don sa kaꞌan enka daꞌan; san dagua ñayii niꞌi don sa tediki daꞌan yaꞌa daꞌan yukua. 11 Doko x-espíritu Ndios kuu ia kida ndidaa jaꞌa, san endini kuu, san mee ia xini na don kuañaꞌan ia xi ndiden en ñayii.a
12 Kuan duꞌua ni tuku xikikoño ñayii eni kuu, doko kuaꞌa sa io xi, san kuani tuku tuku ndaa doko eni yikikoño kuu, san duꞌua ni kuu ntsoo ndidaa ndo ñayii xininchisa ñaꞌan xi Jesucristu tuku.b 13 Kuan xiꞌin endini Espíritu sendutsa ndo ndidaa ndo sa nduu ndo eni yikikoño, juandiku tu ñayii Israel adi griegu, ña esclavu ña adii esclavu; ndidaa ndo níꞌi eni Espíritu.
14 Kuan yikikoño ti io endini sa io xi maska sa kuaꞌa ntseꞌe sa io xi. 15 Kuan tu saꞌa kuan na kachi: “Ti kuu ntsu ndaꞌa, juandiku ti kuu ntsu xaꞌan yikikoño yaꞌa”, ama juan nchu kachi sa ti kuu xaꞌan yikikoño yukua ña? 16 San tu doꞌo kuaan na kachi: “Ti ku ntsu nduchinuu, juandiku ti kuu ntsu xaꞌan yikikoño yaꞌa”, ama juan nchu kachi sa ti kuu xaꞌan yikikoño yukua ña? 17 Tu nee yikikoño na ku kuu nduchinuu, ami kendoo doꞌo kuan? san tu ndidaa na ku kuu doꞌo, ami kendoo xíchi kuan? 18 Doko Ndios kída ia ndiden ndiden sa nandeꞌe xi yikikoño, san sakintsaa ia ndiden ndiden modo nchóxi ia. 19 Kuan tu eni na ku kuu ndidaa san ma ku kuu en yikikoño 20 San kuani kuaꞌa sa io xi doko eni yikikoño kuu.
21 Nduchinuu ma kachi kadaa xi ndaꞌa: “Ti nandeꞌe yo kuntsu.” Nisa diki ma kachi kadaa xi saꞌa: Ti nandeꞌe yo kuntsu 22 Ñaꞌan, kuan ndidaa sa io xi yikikoño ya, sa danaꞌa sa ti ntsee dika juan kuu sa nandeꞌe ntseꞌe ka. 23 San sa io xi yikikoño sa sani-ini ndo sa ti xaꞌvi xi, jaꞌa kuu sa dandukutu guaꞌa ka ndo, san duꞌua ni kida ndo xiꞌin sa io xi yikikoño sa ti nchoj ndo sa kini ñayii. 24 San duꞌua io sa ti nandeꞌe sa chiguaꞌa ndo xi yikikoño ya. Doko Ndios kida ia sa ndidaa sa sani-ini ndo sa ti xaꞌvi xi kuaan, na danuu ntseꞌe ka ndo; 25 Duꞌua kida ia ndasa ndidaa sa io xi yikikoño na chintsee taꞌan ndidaa. 26 San duꞌua ndidaa sa io xi yikikoño, tu dakaa uꞌu san ndidaa uꞌu xi, san tu kidakaꞌnu ñaꞌan xi en san ndidaa ku iꞌni.
27 San dini ndidaa ni kuu ni ndaꞌa saꞌa xikikoño Jesucristu. 28 X-congregación Ndios taxi ia ndiden ndiden chiion kada ni ndidaa ni, diꞌna nuu sani ia apóstol, danduu sani ia profeta, sa ku uni sani ia maestru,c san danduu ñayii na kada milagru, danduu ñayii senchiion Ndios sa ndadaguaꞌa ñayii, sani ia ñayii chintsee ñaꞌan, danduu ñayii kuu jnu xi, danduu ñayii kaꞌan enka daꞌan. 29 Kuadi ndidaa tsa kuu apóstol, nisa adii ndidaa tsa kuu profeta, san nisa adii ndidaa tsa ku maestru, san kuadi ndidaa tsa kida milagru. 30 Nisa adi ndidaa tsa senchiion Ndios sa ndadaguaꞌa ñayii, san nisa adii ndidaa tsa kaꞌan enka daꞌan, san nisa adi ndidaa ñayii niꞌi don sa tediki daꞌan kaꞌan ñayii. 31 Nduku ni sa niꞌi ni don naꞌnu ka sa kuxi ndidaa jaꞌa. Doko na dadana ñaꞌan da enka ichi guaꞌa ka jni.