Yeso akaukuso mʉtʉ wa kʉbɔkʉkɔ kukwo
( Matayɔ 12.9-14; Luka 6.6-11 )
3
1 Kʉwa wa, Yeso ogulyo bata ndɨ ka ndabʉ ya likungoni ka Bayudha. Alʉkʉ bemoti a ndɨ kʉ bɛyɔ na kʉbɔkʉkɔ kukwo. 2 Batʉ bi nɨbɔ ba ndɨ kʉ bɛyɔ, bapʉnga ndɨ kanda Yeso bɨngbangbangba, ikanɨ aukusotʉ mʉtʉ yi nɨnɔ ka lɨsyɛ la kimumbiso. A bɛyɔ, ba ndɨ kakɨsa bɛ bamɨna na ɨbɔ no pisi tino, kyɛ bapɨ́lyagɨ bangbanga. 3 Yeso abɨkya kʉwa ndɨ mʉtʉ yi nɨnɔ bɛ : « Wamaga kambwa ka bambanzʉ basɨ kʉʉ. » 4 Kumbuso yi, Yeso umuuso ndɨ bɛ : « Mʉtʉʉ atɨbɨkya pɨyɛ bʉnɨ ? Okwononi kagya lɨkpʉmʉka lanza ka lɨsyɛ la kimumbiso ikanɨ kagya nɨlɔ lanyɛ ? Kaukuso mʉmbanzʉ ikanɨ kamwɔ ? » Luki limoti, badhakyana ndɨ biwo. 5 Yeso ʉnda ndɨ ɨbʉ basɨ bɨngbangbangba, kanɨ anʉmɨnɨlya kumbu ko bhulo ya mʉ mapʉ kabʉ. Abɨkya kʉwa ndɨ alʉkʉ nɔ bɛ : « Nana kʉbɔkʉkɔ. » Anana ndɨ, kʉbɔkʉkɔ aʉka. 6 Bafalisayɔ bopupo ndɨ ka ndabʉ ya likungoni, baga kamʉmʉkana bɨgala na batʉ ba lidu ka ngama Ɛlɔdhɨ +\fr 3:6 Ɛlɔdhɨ : A Ɛlɔdhɨ yi nɨnɔ bamakaga ndɨ bɛ Atipasi. kakɨsa pisi tino yɔ bamwisiso mino Yeso. Ambaza mudhingi ka bambanzʉ akasilyo Yeso
7 Kumbuso yi, Yeso bakɨda ndɨ na babɨbya kakɨ miso ya kpɔlɔ wa ibhombu ya Galilaya, nɨ ambaza mudhingi ka bambanzʉ anabɨbya bingbooo. Batʉ bi nɨbɔ botukyoku ndɨ ka Galilaya, ka Yudhɛya, 8 ka Yelusalɛma, ka iwili ya Idhumeya, ka iwili nɨyɔ kʉsyakʉ wa Yɔlɔdhanɨ na ka bewili nɨbayɔ buwobhi-buwobhi na gʉdʉ wa Tilo na Sidhɔna. Ambaza yi nɨnɔ asilyoku ndɨ Yeso, kyɛ ʉkana ndɨ mongoni ma masɨ nɨmɔ agyaga ndɨ. 9 Nɨyɔ ɨna bɛyɔ, ʉbɨkya kʉwa ndɨ babɨbya kakɨ bɛ babungusyilyogi ɨngbɔlɔ, kyɛ ambaza kamotosonitɔgʉ. 10 Yɛkɨ a ndɨ kauukuso bambanzʉ bakpʉ, batʉ basɨ ba bokolobu ba ndɨ kaiduso bɛ bavɨlɨ. 11 Nɨyɔ batʉ ba malɨmba bamɨnaga ndɨ Yeso, bogwogo ndɨ kambwa kakɨ, banapamɨkanaga bɛ : « Ɨwɛ nɨ miko Kunzi ! » 12 Luki limoti, Yeso ʉgbɨtyaga ndɨ bɛ bakanyonitɔgʉ mʉgɔngʉ kunzi.
Yeso akaʉpʉnaga batʉtʉmbwa tɛkɛbɛ na baba
( Matayɔ10.1-4; Luka 6.12-16 )
13 Kʉwa wa, Yeso aga ndɨ ka ngʉpa, ʉmakaga batʉ bi nɨbɔ a ndɨ na nza yi kabʉ, bakpudoku ndɨ. 14 pʉnaga ndɨ tɛkɛbɛ na baba lugo kabʉ, ʉlʉka kʉwa ndɨ bɛ batʉtʉmbwa. Agya ndɨ bɛyɔ kyɛ bikogi pa imoti na ɨbʉ, na iki kaʉtɨkaga kabɨkyaga Mongoni Manza, 15 ʉpá ndɨ gɔnɨ ngu yikpumyo malɨmba. 16 Mino ka batʉ tɛkɛbɛ na baba bi nɨbɔ nɨma : Simoni, nɨnɔ Yeso alʉka ndɨ gɔnɨ bɛ Pɛtɛlɛ, 17 Zaki na mamakɨ bɛyɔ ka Yuani. Ɨbʉ basɨ baba ba ndɨ bomika Zɛbhɛdhayɔ : Yeso ʉlʉka ndɨ bɛ Bhoanɛlɨgɛ, isi yi nɨ « Bomika ngbangbata »,+\fr 3:17 Bomika ngbangbata : Yeso alʉka ndɨ Zaki na Yuani bɛyɔ ko bhulyo ya dɨya. . 18 Andɨlɨya, Filipi, Bhatulumei, Matayɔ, Tʉma, Zaki mika Alʉfayɔ, Tadhei, Simoni nɨnɔ a ndɨ ka lidu ka Bazɨlɔtɨ 19 sɛ kʉwa Yudha Isikalioti, nɨnɔ asʉta ndɨ Yeso.
Yeso na lɨvananza kakɨ
20 Kumbuso yi, Yeso igoku ndɨ ka mʉsɛngɨ. Ambaza mudhingi ka bambanzʉ omumukonoku ndɨ bata. Yeso na babɨbya kakɨ bakɛgʉ bata ndɨ no ngbingo gʉtʉgʉ nɨnɔ mʉlyalya aka. 21 Nɨyɔ bava-kʉ-kakɨ bʉkana bɛyɔ, botukyoku ndɨ, bɨnda kava. A bɛyɔ, ba ndɨ kabɨkya bɛ mʉ kakɨ kɛgʉ bata manza.
Yeso akausikisyo batʉ nɨbɔ bapílyogi bangbanga
22 Lɨsyɛ limoti, bowonisili ba mʉtʉʉ nɨbɔ bodhoku ndɨ kotukyoku ka Yelusalɛma, babɨkya ndɨ bɛ : « Yeso a na Abhɨlɨ kʉsɔ kakɨ nɨnɔ ina bɛ Bhelizebhuli. Abhɨlɨ yi nɨnɔ a ngama wa malɨmba. Ɨyɨ nɔ akapá ngu yikpumyo malɨmba ! » 23 Kʉwa wa, Yeso ʉmaka ndɨ, ʉtʉlya mozuni mi nɨma : « Igyonoso lɨkɨ Abhɨlɨ kayikpumyo ɨyɨ mombukwono dhakɨ yi ? 24 Bɛvananza ba ya bʉngama bumoti bakapʉnga kaʉlanana lugo kabʉ, ibha bʉngama bi nɨbɔ oponzikonini. 25 Na batʉ ba lɨvananza limoti bakapʉnga kaʉlanana lugo kabʉ, ibha lɨvananza li nɨlɔ oponzikonini. 26 Kiko nɛkɨ nɨ Abhɨlɨ akabhʉmana na ɨyɨ mombukwono dhakɨ yi, na kiko nɨ bʉngama kakɨ igbononini, ngu kakɨ kakwananɨgʉ kaidhukulogo. Luki limoti, iko mulibo mi.
27 « Gʉtʉgʉ mʉtʉ bemoti aka kakwananɨgʉ kaingyo ka ndabʉ ka tutungyo, na katʉpa lɨngama kakɨ nɨ kanagwigʉ mbɛyɨ, akanda.
28 A bɛyɔ, nakamʉbɨkya bɨngbanganya ambɛ : Kunzi ʉpɨlyatʉ ndɛkɛ bambanzʉ bʉnyɛ na mosikoni masɨ nɨmɔ basɨkaga. 29 Luki limoti, mʉmbanzʉ kasɨkaga Lɨmbɛngɨ Lotu, kikigʉ ndɛkɛ na mʉpɨlya, kyɛ bʉnyɛ bi nɨbɔ iko wa aka wa kadhwɛ ka bɛnzɛ na bɛnzɛ. »
30 Yeso a ndɨ kaʉnzɨnɨlya bowonisili ba mʉtʉʉ bɛyɔ, kyɛ ba ndɨ kabɨkya bɛ a na lɨlɨmba.
Lɨvananza la lɨngʉnʉ ka Yeso
(Matayɔ 12.46-50; Luka 8.19-21)
31 Kʉwa wa, amakɨ na bamamakɨ Yeso bodhoku ndɨ. Bamaga ndɨ kunzi, batɨka mʉtʉ bemoti kamaka. 32 Ambaza ka bambanzʉ a ndɨ wakiko, akungulini Yeso bikululu, babɨkya kʉwa ndɨ bɛ : « Amakʉ na bamamakʉ ba kunzi kʉ, bakaʉkɨsa. » 33 Yeso usikisyo ndɨ bɛ : « Mama nɨ wanɨ ? Bomika-mama nɨ ba ɨkɨ ? » 34 Kumbuso yi, ʉnda ndɨ batʉ nɨbɔ ba ndɨ nɨ bakungulini wa bizumuuu, abɨkya ndɨ bɛ : « Mama na bomika-mama, ɨbʉ nɨba. 35 A bɛyɔ, bomika-mama na mama, nɨ mʉtʉ wasɨ nɨnɔ agyaga sɨpananɨsɔ ko Kunzi. »