<<    <     Malɨkɔ     2     >    >> 
Yeso akaukuso zɛgɛsɨ
(Matayɔ 9.1-8; Luka 5.17-26)
2
1 Kumbuso wa masyɛ makɛdɛ, Yeso igoku ndɨ ka Kapɛlɛnaʉmʉ. Bambanzʉ bʉkana ndɨ bɛ a ka ndabʉ. 2 Bamʉmʉkana kʉwa ndɨ kʉ budhingi, kadhwɛ kʉ kwa kʉ mikya pa kotigologʉ bata ndɨ mino, iki gʉtʉgʉ ya kunzi aka ko miso ma mupumi. Yeso a ndɨ kaʉbɨkyaga Lɨkpʉmʉka ko Kunzi. 3 Kʉwa wa, bambanzʉ badhulyoku ndɨ na zɛgɛsɨ. Batʉ bakwanganya lugo kabʉ bɔ ba ndɨ na ɨyɨ mʉbhɨnɨkaga. 4 Luki limoti, bakakwananagʉ ndɨ kasiliso kambwa ka Yeso ko bhulo ya ambaza ka bambanzʉ. Boukwilyo kʉwa ndɨ ngala kugbondo tili na pa nɨyɔ Yeso a ndɨ mino. Kumbuso yi, basiso kʉwa ndɨ zɛgɛsɨ nɔ kʉgʉ wa kalagba nɨyɔ a ndɨ mino wakanga pisi ka ngala yi nɨyɔ. 5 Nɨyɔ Yeso ɨna bhaya kabʉ bɛyɔ, abɨkya ndɨ zɛgɛsɨ nɔ bɛ : « Mikamɨ, nupilyini bʉnyɛ kakʉ. »
6 Bowonisili ba mʉtʉʉ bemoti-bemoti nɨbɔ ba ndɨ bakikonono wa, bapʉnga ndɨ kaimuuso bɛ : 7 « Ko bhulo ya ɨkɨ yɔ alʉkʉ yi nɨmʉna o mino kanzɨna bɛyɔ ? Akatʉmbwa Kunzi ! Wanɨ nɔ akwanana kapɨlya bʉnyɛ, kiki Kunzi aka mʉkaka ? » 8 Nɨyɔ aka yɔ Yeso andʉnga ndɨ mʉtamanagɨ kabʉ bɛyɔ, umuuso bɛ : « Ko bhulo ya ɨkɨ yɔ mo mino na inguo ya mʉtamanagɨ mi nɨmɔ ? 9 Ɨkɨ yɔ a yapʉpʉ kʉgbɛ kabɨkya zɛgɛsɨ bɛ : ‹ Nupilyini bʉnyɛ kakʉ ›, ikanɨ kabɨkya bɛ : ‹ Wamaga, wava kalagba kakʉ, wakpakyana › ? 10 Luki limoti, nakapa ambɛ wibhoni bɛ Mika mʉmbanzʉ a no ngu yɨpɨlya bʉnyɛ ka ɔbɨlɨ. » Kʉwa wa, abɨkya ndɨ zɛgɛsɨ nɔ bɛ : 11 « Nakaʉbɨkya ambɛ, wamaga, wava kalagba kakʉ, wɨga kʉ kakʉ ! » 12 Wa aka wa, alʉkʉ nɔ aka ndɨ bɨvanga ko miso ka batʉ basɨ wa, ava kalagba kakɨ, ɨga. Nɔkʉ ʉdhɨka ndɨ ɨbʉ basɨ bɨdhɛ, bapʉnga ndɨ kabhibhiso Kunzi, banabɨkya bɛ : « Takaninigʉ ndɨ inguo ya lɨkpʉmʉka li nɨlɨ ! »
Yeso akamaka Lawi
(Matayɔ 9.9-13; Luka 5.27-32)
13 Kʉwa wa, Yeso ɨga bata ndɨ ka mutili ma ibhombu ya Galilaya. Ambaza ka bambanzʉ wasɨ asingyoku ndɨ, apʉnga kaʉpá mʉtɨwɨ. 14 Wa a ndɨ mino kakɨtaga wa, amɨna Lawi, mika Alʉfayɔ, wakiko ka bhilo yilipiso manzanza. Yeso abɨkya ndɨ bɛ : « Ibyeku ! » Lawi amaga ndɨ, apʉnga kabɨbya.
15 Kumbuso yi, Yeso ɨnda ndɨ kalyalya kʉ ka Lawi. Ba ndɨ pa imoti na babɨbya kakɨ, bandɔmbɛ ba manzanza bakpʉ na bagya-manyɛ. A bɛyɔ, budhingi ba inguo ya batʉ bi nɨbɔ bikogo ndɨ kabɨbya bingbooo. 16 Nɨyɔ bowonisili ba mʉtʉʉ nɨbɔ bikogo ndɨ na Bafalisayɔ bamɨna ndɨ mino Yeso kalyalya pa imoti na bandɔmbɛ na bagya-manyɛ, bumuuso kʉwa ndɨ babɨbya kakɨ bɛ : « Ko bhulo ya ɨkɨ yɔ o mino kalyalya pa imoti na bandɔmbɛ na bagya-manyɛ ? »
17 Nɨyɔ Yeso ʉmʉkana ndɨ bɛyɔ, ʉbɨkya bɛ : « Kɛgʉ batʉ bapʉpʉ bɔ bakɨsaga mʉnganga, luki limoti, nɨbɔ ba bokolobu. Ɨmɨ, nakodhokugʉ kaʉkɨsa batʉ bongbingbili, luki limoti nɨbɔ banyɛ. »
Yeso akanzɨna ko bhulo yiginyo malɨlɨ ko ngbingo
18 Lɨsyɛ limoti, babɨbya ka Yuani Mubhatizai na Bafalisayɔ ba ndɨ koginyo malɨlɨ ko ngbingo. Kʉwa wa, bambanzʉ bodhoku ndɨ kamuuso Yeso bɛ : « Ko bhulo ya ɨkɨ yɔ babɨbya ka Yuani na nɨbɔ ka Bafalisayɔ aka bɔ boginyogo ɨbʉ malɨlɨ ko ngbingo, nɨ nɨbɔ kakʉ bakɛgʉ sɛ ɨbʉ koginyo ? »
19 Yeso usikisyo ndɨ bɛ : « Makasɨma bɛ bawai-dhakɨ mombukwono dhumo wo vononi bakwananatʉ koginyo malɨlɨ ngbingo yi nɨnɔ ba mbɛyɨ mino pa imoti na mbʉnya muko ? Kɨgyananɨgʉ ! Ngbingo yi nɨnɔ mbʉnya muko o mino pa imoti na ɨbʉ aka, bakakwananɨgʉ koginyo malɨlɨ. 20 Luki limoti, ikotʉ ndɛkɛ na lɨsyɛ nɨlɔ batʉmba mino mbʉnya muko lugo kabʉ. Ka lɨsyɛ li nɨlɔ, boginyo sɛ kʉwa ndɛkɛ malɨlɨ ko ngbingo. »
21 Mʉmbanzʉ gʉtʉgʉ bemoti aka kodikogɨgʉ ɨnzanza na panga ya kutuko kwa mbɨya. Kagya bɛyɔ, panga ya mbɨya yi nɨyɔ anʉwatʉ ɨnzanza, ngala ahʉmana kʉwa kʉgbɛ. 22 Na bata, kɛgʉ na mʉmbanzʉ gʉtʉgʉ bemoti aka nɨnɔ abʉngwaga vinya wa mbɨya kʉsɔ wa bambɨkɛ ba yɨgbangbalaga. Kagya bɛyɔ, vinya opumukisogotʉ bambɨkɛ, bambɨkɛ ʉlɨkaga, vinya agbɔ wasɨ. Kinili, okwononi kabʉngwa vinya wa mbɨya kʉsɔ wa bambɨkɛ ba ya mbɨya gɔnɨ.
Yeso nɨ ngama wa lɨsyɛ la Kimumbiso
(Matayɔ 12.1-18; Luka 6.1-5)
23 Ka lɨsyɛ limoti la kimumbiso, Yeso a ndɨ kakɨtaga ka botiko ba ya nganʉ. Babɨbya kakɨ bapʉnga ndɨ katɨnaga bɛkaza bi na lɨgʉndʉ. 24 Kʉwa wa, Bafalisayɔ bamuuso ndɨ Yeso bɛ : « Ko bhulo ya ɨkɨ yɔ babɨbya kakʉ bo mino kagya nɨlɔ bapakya ka lɨsyɛ la kimumbiso ? »
25 Yeso usikisyo ndɨ bɛ : « Makanotongulogigʉ ndɨ ibunu lɨkpʉmʉka nɨlɔ ngama Dhaudhi agya ndɨ, ngbingo yi nɨnɔ a ndɨ mino na nza pa imoti na batʉ bi nɨbɔ ba ndɨ na ɨbʉ ? 26 Ogulyo ndɨ ka ndabʉ ko Kunzi, alya mukati nɨmɔ bapága ndɨ Kunzi, ʉpága ndɨ gɔnɨ batʉ bi nɨbɔ. Likpʉmʉka li nɨlɔ igyonoso ndɨ ko ngbingo ko kumu-kumu Abhiatali. Luki limoti, mʉtʉʉ abɨkyaga ndɨ bɛ bokumu aka bɔ balyagɨ mukati mi nɨmɔ. » 27 Yeso opipiloku kʉwa ndɨ bɛ : « Kunzi agya ndɨ lɨsyɛ la kimumbiso ko bhulo ya ka bambanzʉ, luki limoti, kʉgyagʉ ndɨ bambanzʉ ko bhulo ya lɨsyɛ la kimumbiso. 28 Kinili, Mika mʉmbanzʉ a gɔnɨ ngama kʉgʉ wa lɨsyɛ la kimumbiso. »