<<    <     Malɨkɔ     12     >    >> 
Lizuni ka bagya-ligubho bʉdɨya
12
1 Kumbuso yi, Yeso apʉnga ndɨ kaʉnzɨnɨlya pisi ka mozuni. -bɨkya ndɨ bɛ : « Alʉkʉ bemoti akʉna ndɨ tiko ya muzabhibhu, okungulo ndɨ bikululu. Akpɔ lɨbyɛ lɨʉta bhumo yi, opiko ndɨ mʉnala ko bhulo ka bobubulyo bo tiko. Kumbuso yi, ʉkanana ndɨ na bagya-ligubho bo tiko yi nɨyɔ bɛ bandagɨtɔ, akpakyana ndɨ. 2 Nɨyɔ ngbingo mʉpwa muzabhibhu ɨtʉlyana, atɨka mʉgya-ligubho kakɨ bemoti kʉ ka bagya-ligubho bo tiko yi nɨyɔ bɛ ɨndɨ kavɨlya masɔlɔ mi ma kakɨ. 3 Luki limoti, bagwi ndɨ mʉgya-ligubho nɔ, balya ndɨ na bhʉma bɨsʉsʉsʉ, bamigisoku papuyi aka. 4 Mombukwono tiko atikoku bata ndɨ mʉgya-ligubho wagɔgɔ. Baipogo ndɨ ka mʉ bikokoko, babubiso bitu. 5 Atikoku bata wagɔ, bamwɔ. Utikoku kʉwa ndɨ bagɔgɔ bakpʉ, bagya-ligubho bɔ bʉbhʉma ndɨ bemoti-bemoti, bʉmwɔgɔ bagɔgɔ. 6 Mombukwono tiko asɨkana kʉwa ndɨ na mʉtʉ bemoti aka : mʉtʉ yi ndɨ nɨ mikakɨ nɨnɔ mʉpaka. Ka mulibo, atɨka ndɨ, anasɨma bɛ babangatʉ mikakɨ. 7 Luki limoti, bagya-ligubho bi nɨbɔ banzɨna ndɨ lugo kabʉ bɛ : ‹ Mʉtʉ yi nɨnɔ alya ndɛkɛ lisimo nɨmʉ. Dhoniku, tamwini, kyɛ lisimo iki ndɛkɛ lokusu ! › 8 Bagwi ndɨ miki nɔ, bamwɔ, bombimbo manda kakɨ kunzi wo tiko. »
9 Yeso uuso ndɨ bɛ : « Mombukwono tiko agya kʉwa banʉ bʉnɨ ? Odhoku banʉ, ulumwisogo bagya-ligubho, ʉpá batʉ bagɔgɔ tiko yi nɨyɔ.   10 Makanotongulogigʉ ndɨ nɨlɔ bokpikogo kʉsɔ wa Mobiso Motu bɛ :
‹ Lɨtalʉ nɨlɔ bopipiko bombimbo ndɨ
ilu kʉwa lɔ ɨɨta ndɨ lɨtalʉ la ɨzangɨya ka mubumbe.
11 Mombukwono dhosu nɔ agya ndɨ bɛyɔ,
a lɨkpʉmʉka lɨmbanga ko miso kusua! › »
12 Bangama ka Bayudha bakɨsa ndɨ pisi kagwi Yeso. Luki limoti, babanga ndɨ ambaza ka bambanzʉ. Bibhotʉ ndɨ bɛ Yeso a ndɨ katwa lizuni li nɨlɔ ko bhulo kabʉ aka. Basa ndɨ, bɨmagalya ɨbʉ.
Yuuso ko bhulo yɨkalya manzanza
13 Batikilyoku ndɨ Yeso Bafalisayɔ bemoti-bemoti na batʉ ba lidu ka Ɛlɔdhɨ. Batʉ bi nɨbɔ bapʉnga ndɨ kalɨkaga na mʉnzɨna. 14 Bodhoku ndɨ kamuuso Yeso bɛ : « Muwonisili ! Tibhogotʉ ambɛ wa mʉtʉ wa lɨngʉnʉ, wakabangagɨgʉ mʉmbanzʉ gʉtʉgʉ bemoti aka. Wakandagɨgʉ gɔnɨ ɨzangɨya ka mʉmbanzʉ bɛgɛyɔ. Luki limoti, watɨwaga lɨkpʉmʉka ko Kunzi ka lɨngʉnʉ. Tɨbɨkya nɛkɨ ambɛ, takwananatʉ ikanɨ takakwananɨgʉ kakalya manzanza ka Ngama mudhingi wa Lʉma ? Takalyɨtɔ ikanɨ takokolyonitɔ ? »
15 Luki limoti, Yeso ibho ndɨ tamanaga kabʉ ya kʉbɔbɔkʉ, usikisyo ndɨ bɛ : « Ko bhulo ya ɨkɨ yɔ mo mino kɛlɨkaga ? Ipóniku ambuma bemoti, namɨnɨ. » 16 Bapá ndɨ ambuma bemoti. Yeso umuuso ndɨ bɛ : « Mulundu no lino ka wanɨ lɨ ? » Basikisyo ndɨ bɛ : « Ma ka Ngama Kaizali. » 17 Yeso aka kʉwa ndɨ na ɨbʉ bɛ : « Mupóni nɛkɨ Kaizali makpʉmʉka kakɨ, mapá Kunzi nɨmɔ kakɨ gɔnɨ. Nɨyɔ bʉkana sikisyo yi nɨyɔ, bombomboyo ndɨ kʉgbɛ. »
Basadhukayɔ bakamuusogo Yeso bhulo yipupo ka mbʉkʉ
18 Basadhukayɔ babɨkyaga bɛ bamanda kopupogɨgʉ ka mbʉkʉ. Bemoti-bemoti lugo kabʉ bakpudoku ndɨ Yeso, bamuuso kʉwa bɛ : 19 « Muwonisili ! Musa atɨbɨkya ndɨ bɛ : ‹ Mamakɨ mʉmbanzʉ kokwo, asa mukakɨ nɨ kobukutigʉ na ɨyɨ, akwanana bɛ mamakɨ amɨgɨlyɨ woko yi nɨnɔ, kyɛ abʉkʉtɨlyagɨ yaa-dhakɨ nɨnɔ okwo ndɨ bomiki. › 20 A ndɨ na bomika muko madɨya na ɨka. Pʉta ava ndɨ muko, okwo nɨ kobukutigʉ na ɨyɨ. 21 Syononogo kakɨ ava ndɨ woko yi nɨnɔ. Ɨyɨ okwo ndɨ bɛgɛyɔ nɨ kobukutigʉ na ɨyɨ. Igyonoso mʉdɔngɔnɨ bɛgɛyɔ ka mamabʉ nɨnɔ wa yɨsaa, 22 na kabʉ basɨ madɨya na ɨka. Bolumwogo ndɨ nɨ bakobukutigʉ na ɨyɨ. Kumbuso ɨbʉ kokwogo, muko yi nɨnɔ okwo ndɨ gɔnɨ. 23 Ka lɨsyɛ lipupo ka bambʉkʉ, muko yi nɨnɔ iko ndɛkɛ wa ka wanɨ ? A bɛyɔ, ɨbʉ basɨ madɨya na ɨka bavatʉ ndɨ ! » 24 Yeso usikisyo ndɨ bɛ : « Mabubungogo, kyɛ makɛgʉ kotombisyo Mobiso Motu ikanɨ ngu ko Kunzi. 25 A bɛyɔ, ngbingo yi nɨnɔ bamanda bopupo ndɛkɛ mino ka bambʉkʉ, balʉkʉ bakʉvɨgʉ ndɛkɛ bata boko ikanɨ boko kavyɛgɛ. Luki limoti, biko ndɛkɛ mʉdɔngɔnɨ abhɛ bamalaika kʉgʉ wa lɨsyɛ ! 26 Ko bhulo yipupo ka bambʉkʉ, makanotongulogigʉ mbɛyɨ ndɨ kʉsɔ wa kɨtabʉ ka Musa nɨlɔ Kunzi abɨkya ndɨ buwobhi na gbɔgɔ nɨyɔ a ndɨ kagbʉndɨkana ? Abɨkya ndɨ Musa bɛ : ‹ Ɨmɨ, na Kunzi ka Abhalahamʉ, Kunzi ka Isaka na Kunzi ka Yakɔbɔ. b › » 27 Yeso omotiloku ndɨ bɛ : « Kunzi kɛgʉ Kunzi ka bamanda, luki limoti, a Kunzi ka batʉ nɨbɔ ba na ɔbɨlɨ. Ibunu, ma bubungogo lɨngʉnʉ. »
Mʉtʉʉ mudhingi kʉgbɛ
(Mat 22.34-40; Lk 10.25-28)
28 Muwonisili wa mʉtʉʉ bemoti a ndɨ wa ngbingo yi nɨnɔ Yeso ba ndɨ mino ka bodongoso na Basadhukayɔ. Muwonisili nɔ ɨna ndɨ bɛ Yeso usikisyo ndɨ yanza. Akpudoku kʉwa ndɨ, amuuso bɛ  : « Mʉtʉʉ tino mɔ a mudhingi kʉgbɛ kakɨtaga magɔ masɨ ? » 29 Yeso asikisyo ndɨ bɛ : « Mʉtʉʉ nɨmɔ a mudhingi kʉgbɛ kakɨtaga magɔ masɨ nɨma : ‹ kana, Ɨzɛlɛlɨ ! Mombukwono dhosu Kunzi kusu nɨ Mombukwono dhosu yɨkaka aka. 30 Mʉpa Mombukwono dhakʉ Kunzi na lɨmbɛngɨ kakʉ lasɨ, na mʉtamanagɨ kakʉ masɨ na yimibho kakʉ yasɨ, no ngu kakʉ yasɨ. › c 31 Mʉtʉʉ ma yɨba nɨma : ‹ Mʉpa mamakʉ mʉdɔngɔnɨ bɛyɔ wɨpaga mino ɨwɛ mombukwono dhakʉ. › d Kɛgʉ na mʉtʉʉ magɔgɔ nɨmɔ okitogi nɨmana mɨba ma na ɨzangɨya. »
32 Muwonisili wa mʉtʉʉ abɨkya ndɨ Yeso bɛ : « A bɨnza, Muwonisili ! Wobikyi ka lɨngʉnʉ bɛ Kunzi a mʉkaka na kɛgʉ no Kunzi wagɔgɔ kiki nɨ ɨyɨ aka. 33 Mʉmbanzʉ akwanana kapa Kunzi na lɨmbɛngɨ kakɨ lasɨ, na yimibho kakɨ yasɨ, no ngu kakɨ yasɨ na kapa mamakɨ mʉdɔngɔnɨ bɛyɔ ɨpaga mino ɨyɨ mombukwono dhakɨ yi. Nɨyɔ a na ɨzangɨya kʉgbɛ kaʉkɨtaga gʉtʉgʉ banyama basɨ nɨbɔ tabhʉsyɨlyaga Kunzi ikanɨ bapɛpɛ bagɔgɔ basɨ nɨbɔ tapága. » 34 Yeso ɨna ndɨ bɛ asikisyi na yimibho, abɨkya bɛ : « Wakɛgʉ byɨ na Bʉngama ko Kunzi. » Kumbuso yi, mʉmbanzʉ gʉtʉgʉ bemoti aka kɨkpʉndagʉ ndɨ bata kamuuso lɨkpʉmʉka.
Kilisito na Ngama Dhaudhi
35 Ngbingo yi nɨnɔ Yeso a ndɨ mino kapá mʉtɨwɨ ka ndabʉ ko Kunzi, uuso ndɨ bɛ : « Bowonisili ba mʉtʉʉ bakwanana pɨyɛ kabɨkya lɨkɨ bɛ Kilisito a mika Ngama Dhaudhi ? 36 Dhaudhi bɨkpɛ, nɨ a mutumo na Lɨmbɛngɨ Lotu, abɨkya ndɨ bɛ :
‹ Mombukwono dhosu Kunzi abɨkya ndɨ Mombukwono dhamɨ bɛ :
Dhoku kaiko ka kumbanzɨkanɨkɔ kamɨ,
kadhwɛ kʉ kwa kʉ nubhiso ndɛkɛ mino bomuyoniso kakʉ kusili wa bakagba kakʉ. › e
37 Dhaudhi ɨyɨ mombukwono dhakɨ yi amakaga Kilisito bɛ ‹ Mombukwono dhosu. › Igyonoso kʉwa lɨkɨ bɛ Kilisito iki gɔnɨ mika Dhaudhi ? »
Ambaza wakpʉ ka bambanzʉ a ndɨ kamʉkana Yeso na magyagya.
Yeso akauyoyiso bowonisili ba mʉtʉʉ
38 Kʉsɔ wa mʉtʉʉ kakɨ, Yeso ʉbɨkyaga ndɨ bambanzʉ bɛ : « Wibuulyonito na bowonisili ba mʉtʉʉ. Bapaga kakpakyana nɨ bimokisyogini balɔpɔ bandandanda, bɛ bumuusogi na ɨbhɨbha ka bapa ba ya musilyoni. 39 Ka bandabʉ ba ya likungoni, bapaga kaikonono ka moliki ma kambwa aka, ka bodhumo, bapaga kaikonono ka bapa ba ya ɨbhɨbha aka. 40 Bʉkʉpyaga bowoko mukumbo kabʉ masɨ, bagyaga malʉmba mandandanda kaiwoniso kambwa ka bambanzʉ. Kinili, bʉmakya ndɛkɛ ka mʉkɔmbʉ mapʉ kʉgbɛ ! »
Yeso akabhɨbha apɛpɛ ko woko
(Lk 21.1-4)
41 Kʉwa wa, Yeso iko ndɨ ka kpɔlɔ wa mʉmbɨ ma sadhaka ka ndabʉ ko Kunzi. A ndɨ kaɨna bɛyɔ bambanzʉ ba ndɨ mino kapá sadhaka. Batʉ ba lɨngama bakpʉ ba ndɨ kapá buyi budhingi. 42 Woko bemoti wa yangya odhoku ndɨ gɔnɨ ɨyɨ, apá ɨkya mafalanga maba nɨmɔ kɛgʉ ndɨ na ɨzangɨya. 43 Yeso ʉmaka kʉwa ndɨ babɨbya kakɨ, ʉbɨkya bɛ : « Nakamʉbɨkya ka lɨngʉnʉ ambɛ, woko wa yangya yi nɨmʉ opí ɨyɨ yakpʉ, kaʉkɨtaga batʉ bagɔgɔ basɨ. 44 A bɛyɔ, batʉ bagɔgɔ basɨ bopí buyi nɨbɔ bakɛgʉ bi bata nobu na ligubho. Luki limoti, ɨyɨ, kʉsɔ wa yangya kakɨ, opí masɨ nɨmɔ o bi nomu kaibuulyogo ka ɔbɨlɨ kakɨ. »