<<    <     Malɨkɔ     13     >    >> 
Yeso akabɨkya bɛ bapanzatʉ banʉ ndabʉ ko Kunzi
(Matayɔ 24.1-2; Luka 21.5-6)
13
1 Ngbingo yi nɨnɔ Yeso a ndɨ mino kopupo ka ndabʉ ko Kunzi, bemoti ka babɨbya kakɨ abɨkya ndɨ bɛ : « Muwonisili, wɨna ! Matamʉ tino mana manzanza ma ! Bandabʉ tino bayɨna bayidhingi-dhingi ba ! »
2 Yeso asikisyo ndɨ bɛ : « Watʉ kaɨna bandabʉ bayidhingi-dhingi bi nɨba-yɨna ? Kotigoligʉ ndɛkɛ wanʉ lɨtʉlʉ gʉtʉgʉ limoti aka kʉgʉ wa lagɔgɔ, bodukoso ndɛkɛ masɨ bɨgbatata. »
Yigyogyiso nɨyɔ akodhoku kambwa wa mulibo ma ɔbɨlɨ
3 Yeso a ndɨ wakiko kʉgʉ wa ngʉpa ya Mizeitunu kambwa wa ndabʉ ko Kunzi. Kʉwa wa, Pɛtɛlɛ, Yakɔbɔ, Yuani na Andɨlɨya bamuuso ndɨ bɨkɛdɛ bɛ : 4 « Tɨbɨkya nɛkɨ, lɨkpʉmʉka li nɨlɔ igyonoso ndɛkɛ ngbingo tino ? Luki tino lɔ atitombisyo ndɛkɛ ngbingo yi nɨnɔ makpʉmʉka mi nɨmɔ masɨ odhoku ndɛkɛ mino ? »
5 Yeso usikisyo ndɨ bɛ : « Wiminyonito, mʉmbanzʉ gʉtʉgʉ bemoti aka kamubonitɔgʉ. 6 Bambanzʉ budhingi bodhogokuto ndɛkɛ ko lino kamɨ, banabɨkya bɛ : ‹ Ɨmɨ nɨ Masiya ›. Bʉbɔgɔ ndɛkɛ bambanzʉ budhingi. 7 Ngbingo yi nɨnɔ mʉkanaga ndɛkɛ mino bomongoni ba mʉnga na bakʉambɛ bi, makobongonitɔgʉ. Okwononi bɛ masɨ nɨmɔ igyonosito, luki limoti, kikigʉ mbɛyɨ mulibo ma ɔbɨlɨ.  8 A bɛyɔ, lɨvananza limoti abhʉmana ndɛkɛ na lɨvananza lagɔgɔ, bʉngama bumoti ʉlanana na bʉngama bagɔgɔ. Ka bewili dhidhidhi, iko ndɛkɛ na bazigizo na ayʉndɨ wapʉ. Makpʉmʉka mi nɨma masɨ iko ndɛkɛ mʉdɔngɔnɨ abhɛ mʉpʉnganagɨ ma mʉzʉzʉla ma libukuti.
9 Luki limoti, ibunu, wibuulyonito ! Bamulikisotʉ ndɛkɛ ka bongbongu, bamʉbhʉma bɨbɛtɛlɛ ka bandabʉ ba ya likungoni ka Bayudha. Bamusombiso ndɛkɛ kambwa ka bangama ba bewili na bangama bakpʉkpʉ ko bhulyo kamɨ. Miko kʉwa ndɛkɛ badhɛmʉ kamɨ kambwa kabʉ. 10 A bɛyɔ, okwononi mbɛyɨ bɛ babɨkyagɨ Mongoni Manza ka bambanzʉ basɨ. 11 Ngbingo yi nɨnɔ bamugwi ndɛkɛ mino, bɨnda na ibunu kamusombiso, makombomboyonitɔgʉ kambwa bɛ tobikyoku bʉnɨ. Luki limoti, bikyoni nɨlɔ aka lɔ amupupo ko ngbingo yi nɨnɔ aka nɔ. A bɛyɔ, kɛgʉ ibunu bɔ manzɨna ndɛkɛ, luki limoti a Lɨmbɛngɨ Lotu. 12 Bomika-muko bemoti bɨkpɛ basʉtanaga ndɛkɛ ka kukwakʉ, bhabha agya ndɛkɛ mʉdɔngɔnɨ bɛgɛyɔ no mikakɨ. Bomiki bʉɨtɨlya ndɛkɛ babʉkʉta kabʉ, bumwisiso. 13 Bambanzʉ basɨ bamʉmʉya ndɛkɛ ko bhulyo kamɨ, luki limoti, mʉtʉ yi nɨnɔ okibhio ndɛkɛ kadhwɛ ka mulibo, inisonotʉ na muukuso. »
Igyogyiso idhingi
14 « Mamɨnatʉ ndɛkɛ alʉkʉ nɨnɔ bamakaga bɛ ‹ Mʉpʉpʉta mʉmbanga ›,a bamomosini ka pa nɨyɔ kokwononigʉ bɛ iki mino. ( Mʉtʉ yi nɨnɔ akatangʉlaga lɨkpʉmʉka li nɨlɨ, ʉkanɨtɔ isi yi bɨnza.) Kʉwa wa, batʉ nɨbɔ biko ndɛkɛ ka Yudhɛa, bakwanana kapɨkɨta miso ya bangʉpa. 15 Mʉmbanzʉ nɨnɔ iko ndɛkɛ kugbondo, bakakwananɨgʉ bata kosyo kovoku luki kʉsɔ wa ndabʉ. 16 Mʉmbanzʉ nɨnɔ iko ndɛkɛ ko tiko, kakwananɨgʉ bata kaɨga ka mʉsɛngɨ kava kutuko kakɨ. 17 Ka masyɛ mi nɨmɔ, boko ba bamʉma na nɨbɔ biko ndɛkɛ kaulunguso bomiki balya ndɛkɛ kumbu idhingi. 18 Mukungoni Kunzi ambɛ lɨkpʉmʉka li nɨlɔ kigyonosonitɔgʉ ko ngbingo wa ndɔbɔ. 19 A bɛyɔ, ka masyɛ mi nɨmɔ, igyogyiso iko ndɛkɛ yakpʉ kʉgbɛ nɨyɔ kanigyonosigʉ katʉkya ka mʉpʉnganagɨ ma ɔbɨlɨ, wa Kunzi agya ndɨ mino masɨ kadhwɛ na lɨsyɛ li nɨlɨ. Na inguo ya yigyogyiso yi nɨyɔ kigyonosigʉ ndɛkɛ bata. 20 Mombukwono dhosu kokundumosi ndɨ masyɛ mi nɨmɔ, ibha kɛgʉ na mʉmbanzʉ gʉtʉgʉ bemoti aka nɨnɔ aʉka ndɨ. Luki limoti, okundumoso ndɨ bɛyɔ ko bhulyo ka bambanzʉ nɨbɔ ʉpʉnaga ndɨ. 21 Kiko nɨ mʉmbanzʉ amubikyini bɛ : ‹ Kilisito a wanʉ ! › ikanɨ ‹ A kʉ ! ›, makabinikyononitɔgʉ. 22 A bɛyɔ, bakilisito ba kʉbɔbɔkʉ na bogyalandʉ ba kʉbɔbɔkʉ bodhokuto ndɛkɛ. Bagyaga ndɛkɛ makpʉmʉka mʉmbanga-mbanga na mokingyosi kaubungusogo bambanzʉ. Bubungusogo ndɛkɛ yagɔgɔ, gʉtʉgʉ nɨbɔ aka bɔ Kunzi ʉpʉnaga ndɨ. 23 Ɛɛɛ ibunu, wibuulyonito nɛkɨ ! Ɨmɨ, namutukusyogini motili ka masɨ nɨmɔ kambwa aka. »
Mika mʉmbanzʉ akaigoku
24 Luki limoti, ka masyɛ mi nɨmɔ, kumbuso wa igyogyiso yi nɨyɔ, mɔnɨ olimiko ndɛkɛ bipi. Tɨmba kanzɨgʉ ndɛkɛ bata. 25 Mangʉtʉ onyukogoku ndɛkɛ kʉgʉ wa lɨsyɛ. Makpʉmʉka mo ngu nɨmɔ kʉgʉ wa lɨsyɛ ɨzʉkʉla ndɛkɛ bingbwuku-ngbwuku. 26 Bamɨna kʉwa ndɛkɛ Mika mʉmbanzʉ kodhoku kʉsɔ wa bɛkʉba, mutumo no ngu yidhingi na ɨbhɨbha. 27 tɨka ndɛkɛ bamalaika ka mondu masɨ makwanganya ma ɔbɨlɨ katʉkya ka mutili mumoti kadhwɛ ka magɔgɔ, kaʉmʉmʉla bambanzʉ basɨ nɨbɔ ʉpʉnaga ndɨ.
Yeso akatwa lizuni la sɨbhʉkʉsɔ
(Matayɔ 24:32-35; Luka 21:29-33)
28 « Ukononi mʉtɨwɨ nɨmɔ sɨbhʉkʉsɔ akapá. Ngbingo yi nɨnɔ mapakʉ ma sɨbhʉkʉsɔ obhuukonogo mino, magɔgɔ apʉnga kabaka, mibhogo bɨnza bɛ bongbingo igomosyonini. 29 Mʉdɔngɔnɨ gɔnɨ, ngbingo yi nɨnɔ ibunu mɨna ndɛkɛ mino makpʉmʉka mi nɨmɔ kaigyonoso, wibhoni bɨnza ambɛ dhoku ko Mika mʉmbanzʉ a buwobhi, na a kʉwa ka mupumi. 30 Nakamʉbɨkya lɨngʉnʉ ambɛ, batʉ ba lɨvananza li nɨlɨ bakolumwogɨgʉ basɨ nɨ makpʉmʉka mi nɨmɔ masɨ kanigyonosigʉ. 31 Lɨsyɛ na lɨtɔmbʉ akɨtagatʉ, luki limoti, lɨkpʉmʉka kamɨ kakɨtagɨgʉ ndɛkɛ gʉtʉgʉ iki yi aka. »
Kunzi yɨkaka aka nɔ akaibho ngbingo wa mulibo
(Matayɔ 24:36-44)
32 « Kɛgʉ na mʉmbanzʉ gʉtʉgʉ bemoti aka nɨnɔ akaibho lɨsyɛ ikanɨ ngbingo yi nɨnɔ makpʉmʉka mi nɨmɔ igyonoso ndɛkɛ mino, iki bamalaika ba kʉgʉ wa lɨsyɛ, gʉtʉgʉ Miki aka. Luki limoti, Bhabha aka mʉkaka nɔ akaibho. 33 Wibuulyonito ! Wikoni bongbingo basɨ bakɨtʉlya, kyɛ makibhigʉ ngbingo yi nɨnɔ odhoku ndɛkɛ mino. 34 Iko ndɛkɛ mʉdɔngɔnɨ abhɛ alʉkʉ bemoti nɨnɔ atʉkyɨlya ndɨ lɨgʉndʉ. Asa ndɨ ndabʉ kakɨ, ʉsɨlya bagya-ligubho kobuulyogo. Apá ndɨ mʉtʉ yɨkaka-yɨkaka pisi ya ligubho, akpamya ndɨ zamʉ bɛ iki wakɨtʉlya kobuulyogo mupumi. 35 Wikoni nɛkɨ bakɨtʉlya, kyɛ makibhigʉ ngbingo tino nɔ mombukwono ndabʉ igoku ndɛkɛ mino : yagɔgɔ iko ndɛkɛ na bʉgɔgɔ ikanɨ ka gʉndʉ, yagɔgɔ ka kɔkʉ wa mambwa ikanɨ na bʉsɔbɨ. 36 Kigoku bigbututu, kokwononigʉ bɛ amʉtakanyɨ ka batɔtɔ bingbwungono. 37 Nɨlɨna nakamʉbɨkya lɨ, nakaʉbɨkya bambanzʉ basɨ : wikoni bakɨtʉlya. »