Yeso akatwa lizuni ka mʉkʉkʉna
( Matayɔ 13.1-9; Luka 8.4-8 )
4
1 Yeso apʉnga bata ndɨ kapá mʉtɨwɨ nɨ a ka kpɔlɔ-kpɔlɔ wa ibhombu ya Galilaya. Ambaza mudhingi kʉgbɛ ka bambanzʉ asingyoku ndɨ. Kʉwa wa, adaka ndɨ ka ɨngbɔlɔ yidhingi, iko. Ɨngbɔlɔ yi a ndɨ ka lɨmbɛngɨ lo libo, na bambanzʉ ba ndɨ kubhi, buwobhi no libo. 2 Yeso apʉnga ndɨ kauwonisilo makpʉmʉka makpʉ pisi ka mozuni. Kʉsɔ wa mʉtɨwɨ kakɨ, a ndɨ kaʉbɨkya bɛ : 3 « kononi ! Mʉtʉ bemoti ɨnda ndɨ kakʉna+\fr 4:3 Kakʉna : Ka Ɨzalɛlɨ bomisyogo nɨ ɨbʉ masɔlɔ mumisyo tiko. 4 Nɨyɔ a ndɨ kakʉna bɛyɔ, masɔlɔ magɔgɔ anyʉkaga ko pisi. Bombu bodhoku ndɨ, balya. 5 Masɔlɔ magɔgɔ anyʉkaga ndɨ ka pa ya ngyengye nɨyɔ kɛgʉ ndɨ na lɨtɔmbʉ lakpʉ. Nɨmɔ abaka ndɨ bɨgala-gala kyɛ lɨtɔmbʉ kɛgʉ ndɨ lakpʉ wa. 6 Luki limoti, nɨyɔ mɔnɨ osumbo, awɨsɨya na ʉmɨlaga kyɛ lyo yi kigwinonogʉ ndɨ bɨnza ka lɨtɔmbʉ. 7 Magɔgɔ anyʉkaga ndɨ lugo wo kpokiki. Nɨyɔ kpokiki yi nɨyɔ abaka, akandaga ndɨ bɨkpɛkɨ-kpɛkɨ nɨ kobukutigʉ. 8 Luki limoti, magɔgɔ anyʉkaga ndɨ ka lɨtɔmbʉ la dhɔbɔ. Abaka, opingo, apá ndɨ bɛkaza bɨyʉyʉyʉ. Ɨkaza imoti-imoti abʉkʉtaga ndɨ mobhumo batɛkɛbɛ basaa, yagɔgɔ batɛkɛbɛ madɨya na yagɔgɔ mɨya. » 9 Kumbuso yi, Yeso omotiloku ndɨ bɛ : « Nɨnɔ apa kaʉkana, ʉkana ! »Ko bhulo ya ɨkɨ yɔ Yeso anzɨnaga ndɨ mino pisi ka mozuni
(Matayɔ 13.10-17; Luka 8.9-10)
10 Nɨyɔ Yeso ɨtɛ ndɨ mino byɨ na ambaza ka bambanzʉ, batʉ nɨbɔ ba ndɨ na ɨbʉ pa imoti na batʉtʉmbwa tɛkɛbɛ na baba bapʉnga ndɨ kamuusogo ko bhulo ya mozuni. 11 Usikisyo ndɨ bɛ : « Ibunu, mibhoni ndɨ bodhikidi ba ya Bʉngama ko Kunzi. Luki limoti, batʉ bagɔgɔ bʉkanaga ɨbʉ pisi ka mozuni. 12 Kʉwa wa gɔ wa
‹ Bakwanana kaanda bɨnza,
luki limoti, nɨ bakɛgʉ kaɨna.
Bakwanana kaʉkana bɨnza,
luki limoti, nɨ bakɛgʉ kotombisyo.
Bakotombisyogo ndɨ,
bakwanana ndɨ kaikyonilyo Kunzi,
Kunzi ʉpɨlya bʉnyɛ. › »
Yeso akatʉmbʉlaga isi ya lizuni ka mʉkʉkʉna
( Matayɔ 13.18-23; Luka 8.11-15 )
13 Kumbuso yi, Yeso ʉbɨkya bata batʉ nɨbɔ ba ndɨ wa bɛ : « Makɛgʉ kotombisyo isi ya lizuni li nɨlɨ ! Makwanana kʉwa kotombisyo besi ba ya mozuni magɔgɔ lɨkɨ ? 14 Mʉkʉkʉna akakʉna Lɨkpʉmʉka ko Kunzi. 15 Batʉ bemoti-bemoti ba abhɛ kpɔlɔ-kpɔlɔ wo pisi kʉ Lɨkpʉmʉka ko Kunzi anyʉkaga ndɨ mino. Bʉkanagatʉ, luki limoti mumuyoniso odhoku bɨgala, anyɔ Lɨkpʉmʉka li nɨlɔ ikuni kʉsɔ kabʉ. 16 Bagɔgɔ ba abhɛ pa ya ngyengye nɨyɔ kɛgʉ ndɨ na lɨtɔmbʉ lakpʉ. Nɨyɔ bʉkanaga Lɨkpʉmʉka ko Kunzi, bogwi na magyagya bɨgala-gala. 17 Luki limoti, Lɨkpʉmʉka li nɨlɔ kikogɨgʉ no lyo kʉsɔ kabʉ, bogwigo ko ngbingo mʉkɛdɛ aka. Nɨyɔ bʉkpɛkɨ-kpɛkɨ na yigyogyiso usilyogo mino ko bhulo ya Lɨkpʉmʉka ko Kunzi, bɨgala-gala aka basa bhaya. 18 Bagɔgɔ bata ba abhɛ pa yo kpokiki kʉ bakʉna ndɨ mino masɔlɔ magɔgɔ. Bʉkanagatʉ Lɨkpʉmʉka ko Kunzi, 19 luki limoti, yɨtatamana, mʉkɨsa ma lɨngama nɨmɔ ʉbɔgɔ bambanzʉ na mʉsasa magɔgɔ dhidhidhi akandaga Lɨkpʉmʉka nɨlɔ kʉsɔ kabʉ bɨkpɛkɨ-kpɛkɨ, nɨ kopigʉ masɔlɔ. 20 Ka mulibo, batʉ bagɔgɔ ba abhɛ lɨtɔmbʉ la dhɔbɔ kʉ masɔlɔ magɔgɔ anyʉkaga ndɨ mino. Bʉkanaga Lɨkpʉmʉka ko Kunzi, babhaɨlya, abʉkʉta bhumo. Batʉ ba bhaya bi bemoti-bemoti babʉkʉtaga bhumo batɛkɛbɛ basaa, bagɔgɔ batɛkɛbɛ madɨya, bagɔgɔ bata mɨya. »
Yeso akatwa lizuni la tala
21 Kʉwa wa, Yeso ʉbɨkya bata ndɨ bɛ : « Bakatʉnagɨgʉ tala kyɛ bagbukumisyi na mʉmbɨ ikanɨ babhisi kusyokoto wa kanga. Luki limoti, babhisogo kʉgʉ. 22 A bɛyɔ, lasɨ nɨlɔ a lakɨsʉma imibhisikosotʉ ndɛkɛ, na lasɨ nɨlɔ a ko dhikidi ipupiso bɨngbanganya. 23 Nɨnɔ apa kaʉkana, ʉkana ! »
24 Yeso ʉbɨkya bata ndɨ bɛ : « Ɛɛɛ, wiminyonito sɛ na lɨkpʉmʉka nɨlɔ makaʉkana lɔ ! Mʉdɔngɔnɨ bɛyɔ mʉgyaga mino bɛngɛnɨ, bamʉgya ndɛkɛ ibunu bɛgɛyɔ, na bamʉmatɨlya bata kakɨtaga. 25 A bɛyɔ, mʉtʉ yi nɨnɔ a no luki, bamatɨlyatʉ ndɛkɛ bata. Luki limoti, nɨnɔ kɛgʉ nolu, bakʉpya ndɛkɛ gʉtʉgʉ lɨkɛdɛ nɨlɔ a nolu. »
Lizuni lo bhumo nɨyɔ ɨbakɨlyaga ni iyu aka
26 Yeso obikyoku ndɨ bata bɛ : « Bʉngama ko Kunzi a mʉdɔngɔnɨ abhɛ mʉtʉ nɨnɔ akʉna ndɨ masɔlɔ ko tiko kakɨ. 27 Alalaga ndɨ bɨpɛ no bhiti, anozuzuko masyɛ masɨ. Ko ngbingo yi nɨnɔ, tiko anabaka, malɨlɨ anopingo nɨ alʉkʉ nɔ kɛgʉ kaibho bɛ akabaka lɨkɨ. 28 Lɨtɔmbʉ yɨkaka aka lɔ obokisogo malɨlɨ, apʉngaga mbɛyɨ mapakʉ mi, kumbuso yi ɨkaza, ka mulibo bhumo yɨngata kʉgʉ wa ɨkaza. 29 Ngbingo yi nɨnɔ mʉpʉnga atana mino, apʉnga kabhuulyo kyɛ iko nɨ ngbingo mubhuulyo itulyonini. »
Yeso akatwa lizuni la libhumo lɨkɛdɛ
30 Kumbuso yi, Yeso obikyoku bata ndɨ bɛ : « Takwanana kokingyoso Bʉngama ko Kunzi na ɨkɨ ? Towoniso pisi ka lizuni tino ? 31 A libhumo lɨkɛdɛ mʉdɔngɔnɨ abhɛ maya ma gbɛdɛ-gbɛdɛ. Nɨyɔ bakʉnaga, ikogo lɨkɛdɛ kʉgbɛ kakɨtaga bhumo yasɨ ya ɔbɨlɨ. 32 Luki limoti, kumbuso kakʉna, opingo, ɨɨta sɨbhʉkʉsɔ sidhingi kakɨtaga bhʉkʉtɔ tasɨ to tiko. Abaka tabhɨ yakpʉkpʉ, bombu bagya bandabʉ kabʉ kʉgʉ yi, biko kaɨgbʉka ka kululuko kwi. »
33 Yeso ʉtɨwaga ndɨ bambanzʉ pisi ka mozuni dhidhi dhi bɛyɔ ka nɨma. tɨwaga ndɨ bɛyɔ kyɛ bakwananɨtɔ kotombisyo. 34 nzɨnɨlyaga ndɨ pisi ka mozuni aka. Luki limoti, nɨyɔ bikogo ndɨ asɨ na babɨbya kakɨ aka, ʉtʉmbʉlyaga ndɨ makpʉmʉka masɨ bɨngbanganya.
Yeso ogbumini mbumbo
(Matayɔ 8.23-27; Luka 8.22-25)
35 Na bʉgɔgɔ ba lɨsyɛ li nɨlɔ aka lɔ, Yeso ʉbɨkya babɨbya kakɨ bɛ : « Tozobhini kʉsyakʉ. » 36 Basa kʉwa ndɨ ambaza ka bambanzʉ, babɨbya baga ndɨ pa imoti na Yeso ka ɨngbɔlɔ yidhingi nɨyɔ a ndɨ mino. Bɛngbɔlɔ bayidhingi-dhingi ba yagɔgɔ atʉ ndɨ gɔnɨ buwobhi na ɨbʉ wa. 37 Mbumbo yapʉ kʉgbɛ odhoku ndɨ bigbututu, mʉbaka apʉnga kokotukosogo libo kʉsɔ wa ɨngbɔlɔ yi nɨyɔ, ɨngbɔlɔ apʉnga ndɨ komwogo libo. 38 Yeso a ndɨ miso ya kumbuso wa ɨngbɔlɔ, mʉlala bɨpɛ, mʉ kʉgʉ wa kuse. Babɨbya kakɨ babhanda ndɨ, babɨkya bɛ : « Muwonisili, tanolumwogo : nɨlɔ kɛgʉ gʉtʉgʉ ɨwɛ kaudhwiso lɨmbɛngɨ aka ? »
39 Nɨyɔ Yeso ozuzuko, apamɨlya ndɨ mbumbo, abɨkya libo bɛ : « Dhaka ! Pɨla bipisiii ! » Kʉwa wa, mbumbo adhakɨlya ndɨ, pa aka ndɨ lɨngʉnʉ bɨwooo. 40 Kumbuso yi, Yeso umuuso ndɨ bɛ : « Ko bhulo ya ɨkɨ yɔ mo mino kabanga ? Makɛgʉ nɛkɨ na bhaya ? 41 Luki limoti, babɨbya babanga ndɨ kʉgbɛ. Bapʉnga ndɨ kauusono bɛ : « Inguo ya mʉmbanzʉ tino mbɛyɨ mʉ ? Gʉtʉgʉ mbumbo aka no libo akamʉkana ! »