<<    <     Malɨkɔ     8     >    >> 
Yeso akaulyolyiso bambanzʉ ɛlɔfʉ ɨkwanganya
(Matayɔ 15.32-39)
8
1 Lɨsyɛ lagɔgɔ, ambaza mudhingi ka bambanzʉ amʉmʉkana ndɨ bata. Batʉ bi nɨbɔ bakɛgʉ ndɨ no luki nɨlɔ bakwanana ndɨ kalya. Yeso ʉmaka kʉwa ndɨ babɨbya kakɨ, ʉbɨkya bɛ : 2 « Nakalya kumbu ko bhulo ya ka batʉ bi nɨba. Ba kʉwa na masyɛ masaa pa imoti na ɨmɨ, nɨ bakɛgʉ no luki nɨlɔ bakwanana kalya. 3 Nakumigiso ka bakʉkabʉ na banza, nzʉyɨ ʉdhɨkagatʉ ko pisi, kyɛ bagɔgɔ lugo kabʉ botukyiku bi byɨbyɨ byɨ. » 4 Babɨbya kakɨ basikisyo ndɨ bɛ : « Ta wanʉ ka ɨsa, takwanana kainisono na malɨlɨ nɨmɔ bikutogo nomu yanɨ ? » 5 Yeso umuuso ndɨ bɛ : « Ma na mukati mɨnga ? » Ɨbʉ aka ndɨ na ɨyɨ bɛ : « Madɨya na ɨka. »
6 Yeso ʉkpamya kʉwa ndɨ bambanzʉ bɛ bikononi wasɨ. Kumbuso kava mukati madɨya na ɨka mi nɨmɔ, abhibhiso ndɨ Kunzi, obunonogo, ʉpága babɨbya kakɨ bɛ bʉlʉpyagɨ bambanzʉ. Bagya ndɨ bɛyɔ aka yɔ. 7 Batʉ ndɨ gɔnɨ mino na bomikya bosi bakɛdɛ. Yeso abhibhiso ndɨ Kunzi ko bhulo ya bosi bi nɨbɔ, ʉbɨkya ndɨ babɨbya kakɨ bɛ bʉlʉpyagɨ gɔnɨ. 8 Bambanzʉ basɨ balyalya ndɨ, bikutogo bɨkpɛkɛdɛ-kpɛkɛdɛ. Kumbuso yi, babɨbya bamʉmʉla ndɨ bodhongbu ba ya mukati na bosi nɨbɔ basɨkana ndɨ, botumiso mʉmbɨ madɨya na ɨka. 9 Wɨna sɛ, bambanzʉ nɨbɔ balyalya ndɨ, ba ndɨ bhanda ɛlɔfʉ ɨkwanganya. Kumbuso yi, Yeso ʉpá ndɨ lɨgʉndʉ kaɨganana ka bakʉkabʉ. 10 Kolipyagʉ bata, badaka ndɨ na babɨbya kakɨ ka ɨngbɔlɔ, baga ka iwili ya Dhalamanuta.
Bafalisayɔ bakabɨkya Yeso bɛ ʉgyɨlyɨ likingyosi
(Matayɔ 16.1-4)
11 Bafalisayɔ basilyoku ndɨ Yeso, bapʉnga ndɨ na ɨbʉ bodongoso. Balɨka ndɨ bɛ ʉgyɨlyɨ likingyosi kotukyoku kʉgʉ wa lɨsyɛ. 12 Yeso alya ndɨ kumbu kʉgbɛ ka lɨmbɛngɨ, obikyoku bɛ : « Ko bhulo ya ɨkɨ yɔ batʉ ba masyɛ mi nɨma bo mino kakʉnga likingyosi ? Nakamʉbɨkya lɨngʉnʉ ambɛ, bakɨnɨgʉ ndɛkɛ gʉtʉgʉ limoti aka. » 13 Kumbuso yi, ʉsa ndɨ, adaka ndɨ bata ka ɨngbɔlɔ, azabha kʉsyakʉ wagɔgɔ wa ibhombu.
Yɨgya ka Bafalisayɔ na nɨyɔ ka Ɛlɔdhɨ
(Matayɔ 16.5-12)
14 Babɨbya ba ndɨ nɨ bobusolini kava mukati. Ba ndɨ nomu mumuti aka kʉsɔ wa ɨngbɔlɔ. 15 Yeso ʉkpamya ndɨ bɛ : « Angɛ ! Wibuulyonito na yɨgya ka Bafalisayɔ na nɨyɔ ka Ɛlɔdhɨ. A bɛyɔ, yɨgya kabʉ a mʉdɔngɔnɨ abhɛ sɨbhʉkʉsɔ nɨsɔ ofulisogo mukati a. »
16 Babɨbya bapʉnga ndɨ kaidhomiso na mʉtamanagɨ lugo kabʉ, kyɛ bakɛgʉ ndɨ na mukati.
17 Yeso ʉndʉnga ndɨ, umuuso bɛ : « Ko bhulo ya ɨkɨ yɔ mo mino kaidhomiso na mʉtamanagɨ bɛ makɛgʉ na mukati ? Makɛgʉ kotombisyo ? Makɛgʉ kaibho ? Mambɛngɨ kunu a nɛkɨ madhɨsɨlɨ aka ? 18 Ma no miso, makɛgʉ kaɨna ? Ma na motili, makɛgʉ kaʉkana ? Makɛgʉ katamana, 19 ngbingo yi nɨnɔ nobunonogo ndɨ mino mukati kubukumuti, nulyolyiso bambanzʉ ɛlɔfʉ kubukumuti ? Motumisogo ndɨ mbɨyɔ yɨnga na bodhongbu nɨbayɔ asɨkana ndɨ ? » Basikisyo ndɨ bɛ : « Tɛkɛbɛ na mɨba. » 20 Yeso uusoku bata ndɨ bɛ : « Ngbingo yi nɨnɔ nobunonogo ndɨ mino mukati madɨya na ɨka, nulyolyiso bambanzʉ ɛlɔfʉ ɨkwanganya, motumiso ndɨ mʉmbɨ mɨnga na bodhongbu nɨbayɔ asɨkana ndɨ ? Bosikisyo ndɨ bɛ : « Madɨya na ɨka. » 21 Yeso ʉbɨkya kʉwa ndɨ bɛ : « Makonotombisyigʉ aka ? »
Yesu akaukuso mʉtʉ wa kolobu ya mamɔmɔ ka Bhɛtɛsaidha
22 Yeso na babɨbya kakɨ bosilo ndɨ ka Bhɛtɛsaidha. Kʉ bɛyɔ, badhulyoku ndɨ na mʉtʉ wa kolobu ya mamɔmɔ, bɨtatanaga na ɨyɨ bɛ avɨlɨ. 23 Agwi ndɨ kʉbɔkʉkɔ, ɨnda na ɨyɨ kunzi wa mugi. Kʉ bɛyɔ, agbodyo ndɨ na botikito ko miso, abhisilyo mabɔkʉ, amuuso ndɨ bɛ : « Watʉ kaɨna luki ? » 24 Alʉkʉ nɔ ɨkwɛ ndɨ, abɨkya bɛ : « Nakaʉmɨna bambanzʉ, nakaʉmɨna mʉdɔngɔnɨ abhɛ bhʉkʉtɔ, luki limoti bakakpakyana. » 25 Yeso ɨgɨlya ndɨ bata kabhisilyo mabɔkʉ ko miso, alʉkʉ nɔ ɨna ndɨ bɨngbanganya. Aʉka ndɨ, apʉnga kotombisyo makpʉmʉka dhidhi dhi. 26 Yeso apá ndɨ lɨgʉndʉ kaɨga kʉ kakɨ, abɨkya bɛ : « Wakokpotonitɔgʉ mʉ ma sɛngɨ. »
Pɛtɛlɛ akabɨkya bɨngbanganya bɛ Yeso nɨ Kilisito
27 Kʉwa wa, Yeso na babɨbya kakɨ baga ndɨ miso ya sɛngɨ nɨyɔ ikogo ndɨ buwobhi na gʉdʉ wa Kaisalia-Filipi. Ngbingo yi nɨnɔ ba ndɨ mino ko pisi, umuuso babɨbya kakɨ bɛ : « Bambanzʉ babɨkyaga bɛ ɨmɨ nɨ wanɨ ? » 28 Basikisyo ndɨ bɛ : « Batʉ bemoti-bemoti babɨkyaga bɛ ɨwɛ nɨ Yuani Mubhatizai, bagɔgɔ bɛ ɨwɛ nɨ mugyalandʉ Ɨlɨa na bagɔgɔ bata bɛ wa bemoti ka bogyalandʉ. » 29 Yeso umuuso kʉwa ndɨ bɛ : « Sɛ kʉwa ibunu, mabɨkyaga bɛ ɨmɨ nɨ wanɨ ? » Pɛtɛlɛ asikisyo ndɨ bɛ : « Ɨwɛ nɨ Kilisito. »
30 Yeso ʉgbɨtyaga kʉwa ndɨ bɛ bakabikyonitɔgʉ mʉmbanzʉ lɨkpʉmʉka li nɨlɔ.
Yeso akatʉmbʉlaga bhulo ya kukwakʉ no pupo kakɨ ka mbʉkʉ
31 Kumbuso yi, Yeso apʉnga ndɨ kaʉpá babɨbya kakɨ mʉtʉʉ bɛ : « Okwononi bɛ Mika mʉmbanzʉ igyogyisi kʉgbɛ. Bagʉgʉ, bokumu-kumu na bowonisili ba mʉtʉʉ bakyatʉ ndɛkɛ. Bamwisiso, luki limoti, kumbuso wa masyɛ masaa, opupoku ka mbʉkʉ. » 32 Yeso ʉbɨkyaga ndɨ lɨkpʉmʉka li nɨlɔ bɨngbanganya. Kʉwa wa, Pɛtɛlɛ amaka ndɨ ka kpɔlɔ, apʉnga kayoyiso. 33 Luki limoti, Yeso oikono ndɨ, ʉnda babɨbya kakɨ bizumuuu, anyakɨlya Pɛtɛlɛ, abɨkya bɛ : « Abhɨlɨ mʉ ! Tʉkya ko miso kamɨ ! Mʉtamanagɨ kakʉ kɛgʉ abhɛ nɨmɔ ko Kunzi, luki limoti a abhɛ nɨmɔ ka bambanzʉ. »
Mʉmbanzʉ akwanana kabɨbya Yeso lɨkɨ ?
34 Kumbuso yi, Yeso amaka ndɨ ambaza pa imoti na babɨbya kakɨ, ʉbɨkya bɛ : « Mʉmbanzʉ kapa kɛbɨbya, asɨ katamana kʉgʉ wa ɔbɨlɨ kakɨ mombukwono dhakɨ yi, abhɨnɨkɨ mʉsalabha kakɨ, ɛbɨbya. 35 A bɛyɔ, mʉmbanzʉ kapa kabuulyogo ɔbɨlɨ kakɨ, aputikosotʉ. Luki limoti, nɨnɔ aputikoso ndɛkɛ ko bhulo ya kamɨ na ko bhulo ya Mongoni Manza, abuulyogotʉ. 36 Mʉmbanzʉ kinisono na lɨngama lasɨ la ɔbɨlɨ, luki limoti, aputikoso ɔbɨlɨ kakɨ, iko na ɨzangɨya tino ? 37 Kɛgʉ no luki gʉtʉgʉ limoti aka nɨlɔ mʉmbanzʉ akwanana kakalya ko bhulo ya yiukuso ɔbɨlɨ kakɨ. 38 Mʉtʉ wasɨ nɨnɔ ɨmʉkanaga suni ko bhulo ya kamɨ na ko bhulo ya lɨkpʉmʉka kamɨ, ko miso ka batʉ ba lɨsyɛ li nɨlɨ, nɨbɔ banyɛ na bakamibhigʉ Kunzi, Mika mʉmbanzʉ amɨnɨlya ndɛkɛ ɨyɨ suni bɛgɛyɔ. Iko bɛyɔ ko ngbingo yi nɨnɔ odhoku ndɛkɛ mino pa imoti na bamalaika botu kʉsɔ wa ɨbhɨbha ka Abhakɨ. »